ନୂଆଦିଲ୍ଲୀ,୨୨।୪: ଦେଶରେ କରୋନା ସଂକ୍ରମଣ ଅଣାୟତ୍ତ ହେବାରେ ଲାଗିଛି। ହସ୍ପିଟାଲରେ କରୋନା ଆକ୍ରାନ୍ତଙ୍କ ପାଇଁ ଅକ୍ସିଜେନ୍ ଅଭାବ ସୃଷ୍ଟି ହୋଇଛି। ସେହିପରି ଟିକା ଡୋଜ୍ ନ ଥିବାରୁ କେତେକ ଟିକାଦାନ କେନ୍ଦ୍ର ବନ୍ଦ ହୋଇ ଯାଇଛି। ଏନେଇ ସୁପ୍ରିମ୍କୋର୍ଟ ଦେଶରେ ଅକ୍ସିଜେନ ଯୋଗାଣ ଏବଂ ଟିକାଦାନ ନିମନ୍ତେ ସରକାରଙ୍କର ଜାତୀୟ ଯୋଜନା ସମ୍ପର୍କରେ ପ୍ରଶ୍ନ କରିଛନ୍ତି। କରୋନା ନିୟନ୍ତ୍ରଣ ପାଇଁ ସରକାର କିଭଳି ଯୋଜନା କରିଛନ୍ତି ତାହା ସବୋର୍ଚ୍ଚ ନ୍ୟାୟାଳୟ ଜାଣିବାକୁ ଚାହିଁଛନ୍ତି। ମହାମାରୀ ଲଢ଼େଇ ନେଇ କୋର୍ଟ ସରକାରଙ୍କୁ ୪ ପ୍ରଶ୍ନ କରିଛନ୍ତି। ପ୍ରଥମ ପ୍ରଶ୍ନ ଅକ୍ସିଜେନ୍ ଯୋଗାଣ ଉପରେ ଥିବାବେଳେ ଦ୍ୱିତୀୟ ପ୍ରଶ୍ନ ଔଷଧ ଯୋଗାଣ ଉପରେ କୋର୍ଟ କେନ୍ଦ୍ର ସରକାରଙ୍କୁ ପଚାରିଛନ୍ତି। ସେହିପରି ତୃତୀୟ ପ୍ରଶ୍ନ କରୋନା ଟିକାଦାନର ପ୍ରଣାଳୀ ଏବଂ ଚତୁର୍ଥ ପ୍ରଶ୍ନ ଲକ୍ଡାଉନ୍ ଜାରି କରିବାର ଅଧିକାର କେବଳ ରାଜ୍ୟ ସରକାରଙ୍କର ମାତ୍ର କୋର୍ଟର ନୁହେଁ ବୋଲି କୋର୍ଟ କହିଛନ୍ତି। କେନ୍ଦ୍ର ସରକାରଙ୍କ କରୋନା ଲଢ଼େଇ ଜାତୀୟ ଯୋଜନା ସମ୍ପର୍କରେ ଅନୁଧ୍ୟାନ କରିବା ଲାଗି ସୁପ୍ରିମ୍କୋର୍ଟ ହରିଶ ସାଲ୍ବେଙ୍କୁ ଏମିକ୍ସ୍ କ୍ୟୁରି ନିଯୁକ୍ତ କରିଛନ୍ତି। ଏହି ମାମଲାର ପରବର୍ତ୍ତୀ ଶୁଣାଣି ଏପ୍ରିଲ୍ ୨୩ରେ ହେବ ବୋଲି କୋର୍ଟ ପକ୍ଷରୁ ସୂଚନା ପ୍ରଦାନ କରାଯାଇଛି। ଏହି ମାମଲାରେ ୬ ଭିନ୍ନ ଭିନ୍ନ ହାଇକୋର୍ଟର ରାୟ ନେଇ ଏକ ଅବୁଝା ପରିସ୍ଥିତି ସୃଷ୍ଟି ହୋଇଛି। ସୂଚନାଯୋଗ୍ୟ, କରୋନା ସଙ୍କଟକୁ ନେଇ ଦିଲ୍ଲୀ,ବମ୍ବେ, ସିକିମ୍, କୋଲକାତା,ଆହ୍ଲାବାଦ୍ ଆଦି ୬ଟି ଭିନ୍ନ ଭିନ୍ନ ହାଇକୋର୍ଟରେ ଶୁଣାଣି ଜାରି ରହିଛି।
