ଶୀତଦିନେ ତ୍ୱଚା ଭଳି କେଶ ମଧ୍ୟ ରୁକ୍ଷ ହୋଇଯାଏ। ତେଣୁ ଏହାର ଉପଯୁକ୍ତ ଯତ୍ନ ନେବାକୁ ହେବ। ଏଥିପାଇଁ ଜାଣି ରଖନ୍ତୁ କିଛି ଟିପ୍ସ…
-କେଶକୁ ହେଲ୍ଦି ରଖିବା ପାଇଁ ହେଲେ ବାଲାନ୍ସ ଡାଏଟ୍ ସହ ନ୍ୟୁଟ୍ରିସନ୍ ସପ୍ଲିମେଣ୍ଟ ମଧ୍ୟ ଆବଶ୍ୟକ। ଭିଟାମିନ୍ ଏ କେଶ ମୂଳକୁ ମଶ୍ଚରାଇଜ୍ କରି ରଖିଥାଏ। ତେଣୁ ଗାଜର, ପାଳଙ୍ଗ ଓ ଶାକରକନ୍ଦ ଆଦି କେଶ ପାଇଁ ବହୁତ ଭଲ। ଲେମ୍ବୁ, କମଳା ଆଦି ଖଟା ଫଳରେ ଭିଟାମିନ୍ ସି ପ୍ରଚୁର ମାତ୍ରାରେ ରହିଥାଏ, ଯାହା କେଶକୁ ମଜଭୁତ କରେ। ତେଣୁ ବିଭିନ୍ନ ପ୍ରକାର ସବୁଜ ପନିପରିବା ଓ ଫଳ ଅଧିକ ଖାଆନ୍ତୁ।
-ଶୀତଦିନେ କେଶ ମୂଳ ଅଧିକ ଶୁଷ୍କ ହୋଇଯାଏ। ତେଣୁ ସପ୍ତାହକୁ ଥରେ କିମ୍ବା ୨ଥର ଉଷୁମ ତେଲ ମାଲିସ କରନ୍ତୁ। ଭୃଙ୍ଗରାଜ, ଅଁଳା, ବ୍ରାହ୍ମି ଓ ରାଇସ୍ ବ୍ରାନ୍ ତେଲ କେଶରେ ଲଗାଇପାରିବେ। ଟ୍ରି ଟ୍ରି, ରୋଜ୍ମେରୀ ଭଳି ତେଲକୁ ନଡ଼ିଆତେଲ କିମ୍ବା ଅନ୍ୟ ତେଲରେ ମିଶାଇ ଲଗାନ୍ତୁ।
-ସପ୍ତାହକୁ ଥରେ ଡିପ୍ କଣ୍ଡିସନିଂ ଟ୍ରିଟ୍ମେଣ୍ଟ କରନ୍ତୁ। ରୂପି ଦୂରକରିବା ପାଇଁ ଆଣ୍ଟି ଡାନ୍ଡ୍ରପ୍ ହେୟାର ମାସ୍କ ଲଗାନ୍ତୁ। କେଶ ଅଧିକ ଝଡୁଥିଲେ କେଶ ମୂଳରେ ନିୟମିତ ମାଲିସ୍ କରନ୍ତୁ।
-କେଶ ଅଧିକ ରୁକ୍ଷ ଓ ଖରାପ ହୋଇଗଲେ ହେୟାର ମାସ୍କ ନିଶ୍ଚୟ ଲଗାନ୍ତୁ। ଏହା କେଶକୁ ପୋଷଣ ଦେବା ସହ କେଶ ଝଡ଼ିବା ରୋକିଥାଏ।
-ଶୀତଦିନେ ଅଧିକ ଥର ଶାମ୍ପୁ କରନ୍ତୁ ନାହିଁ। ଏହାଦ୍ୱାରା କେଶର ପ୍ରାକୃତିକ କୋମଳତା କମିଯାଇଥାଏ। କେଶର ଆବଶ୍ୟକତା ଅନୁସାରେ ସପ୍ତାହକୁ ଥରେ କିମ୍ବା ୨ଥର ଧୁଅନ୍ତୁ। ଶାମ୍ପୁ କରିବା ପରେ କଣ୍ଡିସନିଂ ନିଶ୍ଚୟ କରନ୍ତୁ।
-ଅତ୍ୟଧିକ ଥଣ୍ଡା ପ୍ରଭାବରେ କେଶ ଅଧିକ ଶୁଷ୍କ ହୋଇଯାଏ। ତେଣୁ ଏଭଳି ସମସ୍ୟାରୁ ରକ୍ଷା ପାଇବାକୁ ହେଲେ କେଶକୁ ଭଲଭାବେ ଘୋଡ଼ାଇ ବାହାରକୁ ଯାଆନ୍ତୁ। ଏହାଦ୍ୱାରା କେଶ ମୁଲାୟମ ଓ ସୁସ୍ଥ ରହେ।
ଶୀତଦିନେ ଗରମ ପାଣିରେ ସ୍ନାନ କରିବାକୁ ଭଲଲାଗେ,
-କିନ୍ତୁ ଏହା କେଶ ପାଇଁ କ୍ଷତିକାରକ। ଗରମ ପାଣି ପ୍ରଭାବରେ କେଶର ପ୍ରାକୃତିକ ତୈଳ ଅଂଶ ନଷ୍ଟ ହୋଇଯାଏ। ଫଳରେ କେଶ ରୁକ୍ଷ ଓ ଖରାପ ଦେଖାଯାଏ। ତେଣୁ କେଶକୁ ଅଳ୍ପ ଉଷୁମପାଣିରେ ଧୁଅନ୍ତୁ।