ବମ୍ବେ: ଦ୍ୱିତୀୟ ବିବାହ କରିବାକୁ ମନ ବଳାଇଲେଣି ବଲିଉଡ୍ର ହ୍ୟାଣ୍ଡସମ୍ ହଙ୍କ ହ୍ରିତିକ ରୋଶନ। ଚଳିତ ବର୍ଷ ସେ ପ୍ରେମିକା ସବା ଆଜାଦଙ୍କ ହାତ ଧରିପାରନ୍ତି। ଉଭୟ ପରିବାର ସମ୍ପର୍କକୁ ନେଇ ଖୁସି ଅଛନ୍ତି। ଏଣୁ ପ୍ରଶଂସକଙ୍କୁ ଖୁବ୍ଶୀଘ୍ର ଖୁସି ଖବର ମିଳିପାରେ ବୋଲି ଚର୍ଚ୍ଚା ଜୋର ଧରିଛି।
ପ୍ରଥମ ପତ୍ନୀ ସୁଜୈନ ଖାଁଙ୍କ ସହ ଛାଡ଼ପତ୍ର ହେବା ପରେ ହ୍ରିତିକଙ୍କ ଜୀବନକୁ ଆସିଥିଲେ ସବା। ଉଭୟଙ୍କ ମଧ୍ୟରେ ବୟସାଗତ ତଫାତ ଥିଲେ ହେଁ ସମ୍ପର୍କରେ ତାହା ପ୍ରଭାବ ପକାଇପାରିନାହିଁ। ଦୁହେଁ ପରସ୍ପର ସହ ସମୟ ବିତାଇବାକୁ ଭଲ ପାଉଛନ୍ତି। ପରିବାର ପକ୍ଷରୁ ସହମତି ମିଳିବା ପରେ ହ୍ରିତିକ ଏହି ସମ୍ପର୍କୁ ଆଗକୁ ନେବାକୁ ଚାହୁଁଛନ୍ତି।
କେବଳ କର୍ମ ଜୀବନରୁ ସାମାନ୍ୟ ବିରତି ମିଳିଲେ ଦୁହେଁ ବିବାହକୁ ନେଇ ଯୋଜନା କରିବେ। କାରଣ ଏବେ ଉଭୟ ବିଭିନ୍ନ ଶୁଟିଂରେ ବ୍ୟସ୍ତ। ସେ ସବୁ ଶେଷ ହେବା ପରେ ସେମାନେ ବିବାହ କରିବେ। ଏହା ବହୁତ ଭବ୍ୟ ହେବ ନାହିଁ। ସାଧାରଣ ଭାବେ କେବଳ ପରିବାର ଏବଂ ପ୍ରିୟଜନଙ୍କ ଗହଣରେ ସବାଙ୍କୁ ଜୀବନସାଥୀ କରିବେ ହ୍ରିତିକ ବୋଲି ଜଣାପଡ଼ିଛି।
ତେବେ ଆଜି ହ୍ରିତିକ ନିଜର ୪୯ତମ ଜନ୍ମଦିନ ପାଳନ କରୁଛନ୍ତି। ଏହି ଅବସରରେ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିଛି। ପୂର୍ବପତ୍ନୀ ସୁଜୈନଙ୍କଠାରୁ ଆରମ୍ଭ କରି ସବା ଏବଂ ସାଥୀ କଳାକାରମାନେ ତାଙ୍କ ଲାଗି ସ୍ବତନ୍ତ୍ର ବାର୍ତ୍ତା ଲେଖିଛନ୍ତି।
