ଭୁବନେଶ୍ବର,୬ା୯(ବ୍ୟୁରୋ):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର କ୍ୟାପିଟାଲ ଫାଉଣ୍ଡେଶନ ସୋସାଇଟି ପକ୍ଷରୁ ଜୀବନବ୍ୟାପୀ ସାଧନା ପୁରସ୍କାର ଗ୍ରହଣ କରିଛନ୍ତି। ଏହି ପୁରସ୍କାର ମୁଖ୍ୟମନ୍ତ୍ରୀଙ୍କୁ ମିଳିବା ପରେ ବିଜେଡି ଶିବିରରେ ଖୁସିର ଲହରି ଖେଳିଯାଇଛି। ଏଥିପାଇଁ ଦିଲ୍ଲୀରେ ଦଳୀୟ ନେତାମାନେ ବ୍ୟାପକ ଆୟୋଜନ କରିଥିଲେ। ସେଠାରେ ରହୁଥିବା ପ୍ରବାସୀ ଓଡ଼ିଆଙ୍କୁ ଏକତ୍ରିତ କରିବା ସହ ଦଳର ଯୁବ ଓ ଛାତ୍ର ନେତାମାନେ ସେମାନଙ୍କ ସହିତ ଯୋଗଦେଇଥିଲେ। ମୁଖ୍ୟମନ୍ତ୍ରୀ ପୁରସ୍କାର ଗ୍ରହଣକରି ଫେରିବା ପରେ ସେଠାରେ ସମସ୍ତେ ତାଙ୍କୁ ସ୍ବାଗତ କରିଥିଲେ। ମୁଖ୍ୟମନ୍ତ୍ରୀ ଦିଲ୍ଲୀରେ ସୋମବାର ରହିଥିବା ବେଳେ ସେଠାକୁ ସମ୍ବର୍ଦ୍ଧନା ଦେବା ଲାଗି ଗସ୍ତ କରିଥିବା ନେତାମାନେ ଫେରିଆସିଛନ୍ତି। ଅନ୍ୟପଟେ ମୁଖ୍ୟମନ୍ତ୍ରୀ ତାଙ୍କ ୬ ଦିନିଆ ଗସ୍ତ ଶେଷକରି ମଙ୍ଗଳବାର ପୂର୍ବାହ୍ନ ୧୧.୨୫ ମିନିଟ୍ରେ ଭୁବନେଶ୍ୱର ବିମାନବନ୍ଦରଠାରେ ପହଞ୍ଚିବା କାର୍ଯ୍ୟକ୍ରମ ରହିଛି। ତେବେ ବିମାନବନ୍ଦରଠାରେ ମୁଖ୍ୟମନ୍ତ୍ରୀଙ୍କୁ ସ୍ବାଗତ ଜଣାଇବା ଲାଗି ପ୍ରବଳ ଭିଡ଼ ଜମିବ। ଦଳର ସହସ୍ରାଧିକ ନେତା ଓ କର୍ମୀ ଏକାଠି ହୋଇ ମୁଖ୍ୟମନ୍ତ୍ରୀଙ୍କୁ ସେଠାରେ ସମ୍ବର୍ଦ୍ଧିତ କରିବା କାର୍ଯ୍ୟକ୍ରମ ସ୍ଥିର ହୋଇଛି। ତେଣୁ ପ୍ରବଳ ଭିଡ଼ ହେବାକୁ ଥିବାରୁ ଏହାକୁ ଦୃଷ୍ଟିରେ ରଖି ବିମାନଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି କମିଶନରେଟ ପୋଲିସ ସ୍ବତନ୍ତ୍ର ପରାମର୍ଶ ଜାରି କରିଛି। ବିମାନରେ ଯାତ୍ରା କରିବାକୁ ଥିବା ଯାତ୍ରୀମାନେ ଧାର୍ଯ୍ୟ ସମୟଠାରୁ ୩ ଘଣ୍ଟା ପୂର୍ବରୁ ବିମାନବନ୍ଦରରେ ପହଞ୍ଚିବାକୁ କମିଶନରେଟ ପୋଲିସ ପକ୍ଷରୁ ପରାମର୍ଶ ଦିଆଯାଇଛି।
ତେବେ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିବା ଲାଗି ପ୍ରତି ନିର୍ବାଚନମଣ୍ଡଳୀ ଓ୍ବାରି ନେତାମାନେ ୨୦୦ରୁ ୩୦୦ ଲେଖାଏ କର୍ମୀଙ୍କୁ ସାଙ୍ଗରେ ଆଣି ଆସିବା ଲାଗି ଦଳର ଶୀର୍ଷସ୍ତରରୁ ନିର୍ଦ୍ଦେଶ ଦିଆଯାଇଛି। ଏଥିଲାଗି ବ୍ୟାପକ ଆୟୋଜନ ମଧ୍ୟ ହୋଇଛି। ଓଡ଼ିଶାର ବିଭିନ୍ନ ପାରମ୍ପରିକ ନୃତ୍ୟ ସାଙ୍ଗକୁ ରାସ୍ତା ସାରା ନବୀନଙ୍କ ପୋଷ୍ଟର, ବ୍ୟାନର ଏବଂ ଦଳୀୟ ପତାକାରେ ଛାଉଣି କରିଦିଆଯାଇଛି। ନବୀନ ବିମାନବନ୍ଦରଠାରେ ପହଞ୍ଚିବା ପରେ ସେଠାରୁ ତାଙ୍କୁ ସ୍ବାଗତ କରିବା ସହିତ ଏକ ବିଶାଳ ରାଲି ଜରିଆରେ ନବୀନ ନିବାସକୁ ପାଛୋଟି ନିଆଯିବ। ଏହାସହ ବିମାନବନ୍ଦରଠାରେ ମୁଖ୍ୟମନ୍ତ୍ରୀ ପୁଣିଥରେ ଉକ୍ତ ଜୀବନବ୍ୟାପୀ ସାଧନା ସମ୍ମାନକୁ ରାଜ୍ୟବାସୀଙ୍କ ଉଦ୍ଦେଶ୍ୟରେ ସମର୍ପଣ କରିବା ନେଇ ପୁଣିଥରେ ଘୋଷଣା କରିବେ। ହେଲେ ଭୁବନେଶ୍ୱର ସାଙ୍ଗଠନିକ ଜିଲା ଅଧୀନରେ ଆସୁଥିବା ନିର୍ବାଚନମଣ୍ଡଳୀ ନେତାମାନଙ୍କୁ ପ୍ରାୟ ହଜାରେ ଲେଖାଏ କର୍ମୀଙ୍କୁ ଆଣିବା ପାଇଁ କୁହାଯାଇଛି।