ଲାଞ୍ଜିଗଡ,୯ା୨(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ଲାଞ୍ଜିଗଡ଼ ଠାରେ ରବିବାର ଜିଲା କଂଗ୍ରେସ କମିଟିର କର୍ମୀ ସମ୍ମିଳନୀ ସହିତ ବିଶାଳ ଶୋଭାଯାତ୍ରା ଅନୁଷ୍ଠିତ ହେଇଥିବା ବେଳେ ଲାଞ୍ଜିଗଡ଼ର ପାରିପାର୍ଶ୍ବିକ ଅଞ୍ଚଳର ବିକାଶ ପାଇଁ ରାଜ୍ୟପାଳଙ୍କ ଉଦେଶ୍ୟରେ ଏକ ଦାବିପତ୍ର ପ୍ରଦାନ କରିଛନ୍ତି ।
ଜିଲା ଲାଞ୍ଜିଗଡ ବ୍ଳକ ଏକ ଆଦିବାସୀ ଅଧ୍ୟୁଷିତ ଅଞ୍ଚଳ ହୋଇଥିବା ବେଳେ ଶିକ୍ଷା, ସ୍ବାସ୍ଥ୍ୟ ଗମନାଗମନ ଆଦି କ୍ଷେତ୍ରରେ ଆଜି ବି ରାଜ୍ୟର ପଛୁଆ ଅଞ୍ଚଳ ଭାବେ ରହିଯାଇଛି। ବିଗତ ପଚିଶ ବର୍ଷର ବିଜେଡି ସରକାର ଅଞ୍ଚଳର ବିକାଶ ପାଇଁ, ଆଦିବାସୀ ଜନଜାତିର ବିକାଶ ପାଇଁ କିଛି କଲେ ନାହିଁ, କିମ୍ବା ବିକାଶକୁ ଆଦୌ ଗୁରୁତ୍ବ ଦେଲେ ନାହିଁ।
ବର୍ତ୍ତମାନ କେନ୍ଦ୍ର ଓ ରାଜ୍ୟରେ ଭାଜପାର ଡବଲ ଇଞ୍ଜିନ ସରକାର ଚାଲିଛି। ଆଦିବାସୀଙ୍କ ବିକାଶର ଦ୍ୱାହି ଦେଇ ଆଦିବାସୀ ବ୍ୟକ୍ତିତ୍ୱଙ୍କୁ ମୁଖ୍ୟମନ୍ତ୍ରୀ ଭାବେ ଆସନରେ ବସାଇ ଦେଲେ ହେବନାହିଁ ରାଜ୍ୟ ଓ ରାଜ୍ୟବାସୀଙ୍କ ବିକାଶ ପାଇଁ ଯଦି ପଦକ୍ଷେପ ନନେବେ ତାହେଲେ କଂଗ୍ରେସ ରାଜରାସ୍ତାକୁ ଓହ୍ଲାଇବ ବୋଲି ଆଜି କଳାହାଣ୍ଡି ଜିଲା ଲାଞ୍ଜିଗଡ ଠାରେ ଅନୁଷ୍ଠିତ କର୍ମୀ ସମ୍ମିଳନୀରେ ଯୋଗଦେଇ ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଭକ୍ତ ଚରଣ ଦାସ ଏହା କହିଛନ୍ତି।
ପାହାଡିଆ ଅଞ୍ଚଳରେ ବସବାସ କରୁଥିବା ଆଦିବାସୀ ମାନଙ୍କ ପାଇଁ ପକ୍କାଘର,ପ୍ରତି ୫୦ ଘର ଥିବା ଗାଁକୁ ଗମନା ଗମନ ପାଇଁ ରାସ୍ତା, ପ୍ରତି ୫ଶହ ଲୋକସଂଖ୍ୟା ଅଞ୍ଚଳରେ ଗୋଟିଏ ସ୍ଵାସ୍ଥ୍ୟ କେନ୍ଦ୍ର, ଉତ୍ତମ ଶିକ୍ଷା ପାଇଁ ସ୍କୁଲ, ଅଞ୍ଚଳରେ ପ୍ରତ୍ୟେକ ଘରକୁ ବିଜୁଳି ଯୋଗାଣ, ପ୍ରତ୍ୟେକ ଘରକୁ ପାନୀୟ ଜଳ, କାରଖାନାର ପରିପାର୍ଶ୍ଵିକ ଅଞ୍ଚଳରେ ଥିବା କେତେଗୋଟି ଗାଁକୁ ବିସ୍ଥାପିତ କରି ଅନ୍ୟ ଜାଗାରେ ଥଇଥାନ କରିବା ପାଇଁ ସରକାରଙ୍କୁ ଦାବୀପତ୍ରରେ ଜଣାଇଛନ୍ତି।
କଳାହାଣ୍ଡି ଜିଲା କଂଗ୍ରେସ କମିଟିର ଆହ୍ୱାନରେ ଲାଞ୍ଜିଗଡ ବ୍ଲକ କଂଗ୍ରେସ କମିଟି ଦ୍ୱାରା ଆୟୋଜିତ ଏହି କର୍ମୀ ସମ୍ମିଳନୀରେ ବହୁସଂଖ୍ୟକ କଂଗ୍ରେସ ନେତା ଓ କର୍ମୀ ଆରବିକେ କଲୋନୀ ଛକରୁ ଏକ ବିରାଟ ଶୋଭାଯାତ୍ରାରେ ବାହାରି କାରଖାନାର ମୁଖ୍ୟ ଫାଟକ ସାମ୍ନା ଦେଇ ଲାଞ୍ଜିଗଡ ସହରରେ ପହଞ୍ଚିଥିଲେ। ଏହାପରେ ଲାଞ୍ଜିଗଡ ଥାନା ଅଧିକାରୀଙ୍କ ଜରିଆରେ ରାଜ୍ୟପାଳ ଉଦେଶ୍ୟରେ ଏକ ଦାବିପତ୍ର ପ୍ରଦାନ କରିଥିଲେ।
ବ୍ଲକ କଂଗ୍ରେସ ସଭାପତି ବିଜୟ ନାଏକଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଜିଲା କଂଗ୍ରେସ ସଭାପତି ଭାରତ ଭୂଷଣ ବେମାଲ,ବରିଷ୍ଠ କଂଗ୍ରେସ ନେତ୍ରୀ ଦ୍ରୌପଦୀ ମାଝୀ,ବରିଷ୍ଠ କଂଗ୍ରେସ ନେତା ସିଦ୍ଧାର୍ଥ ନାୟକ,ଟି. ପ୍ରଭାକର ରାଓ, ମୁରଲୀଧର ନାଏକ , ଡୋକା ମାଝୀ, ସୁରେନ୍ଦ୍ର ମାଝୀ, ସଦାନନ୍ଦ ନାଏକ, ମହିଳା ସଭାନେତ୍ରୀ ଶାନ୍ତି ହରିଜନ, ମନୋଜ କୁମାର ରାଉତ,କଂଗ୍ରେସ ନେତା ପ୍ରଦୀପ ମାଝୀଙ୍କ ସମେତ ଶତାଧିକ ଦଳୀୟ କର୍ମୀ ସାମିଲ ହୋଇଥିଲେ।