ଜେନେଭା, ୨୧।୯ : ବିଭିନ୍ନ ଦେଶରୁ କୂଟନୀତିଜ୍ଞ ତଥା ମାନବାଧିକାର ସମର୍ଥକମାନେ ଜାତିସଂଘକୁ ମାନବିକତା ବିରୋଧରେ ଅପରାଧ ରିପୋର୍ଟ ଅନୁଯାୟୀ ଚାଇନା ବିରୋଧରେ କଡା ପଦକ୍ଷେପ ନେବାକୁ ନିବେଦନ କରିଛନ୍ତି। ସେମାନେ କହିଛନ୍ତି ଯେ ଅନୁସୂଚିତ ଜାତି ଜନଜାତିର ନିର୍ଯାତନା ସମ୍ପର୍କରେ ଚାଇନା ବିରୋଧରେ ଆସିଥିବା ଅଭିଯୋଗକୁ କିପରି ମୁକାବିଲା କରାଯିବ ସେନେଇ ଭବିଷ୍ୟତରେ ବିଶ୍ୱ ସଂସ୍ଥା ପକ୍ଷରୁ ବିଚାର କରାଯିବା ଜରୁରୀ। ଏବେ ସମଗ୍ର ଦୁନିଆର ଆଖି ଏହା ଉପରେ କେନ୍ଦ୍ରୀତ ହୋଇଛି।
ମାନବ ଅଧିକାର ସଂଗଠନ ତଥା ଗଣମାଧ୍ୟମ ଦୀର୍ଘ ବର୍ଷ ଧରି ଉଇଗୁରୁ ଏବଂ ଅନ୍ୟ ମୁସଲମାନ ଗୋଷ୍ଠୀଙ୍କୁ ଜିନଜିଆନରେ ନିର୍ଯାତନା ଦିଆଯାଉଥିବା ନେଇ ରିପୋର୍ଟ ପ୍ରକାଶ କରି ଆସୁଛନ୍ତି। ଚାଇନା ଏହି ଗୋଷ୍ଠୀଙ୍କୁ ଜିନଜିଆଙ୍ଗରେ ନିର୍ଯାତନା ଦେବା, ଯୌନ ଉତ୍ପୀଡ଼ନ ଏବଂ ସେମାନଙ୍କୁ ଦେଶ ଛାଡିବାକୁ ବାଧ୍ୟ କରିଥିବା ଅଭିଯୋଗ ହୋଇଛି। ମିଳିତ ଜାତିସଂଘ ମାନବ ଅଧିକାର କାର୍ଯ୍ୟାଳୟ ଦ୍ୱାରା ଗତ ମାସରେ ପ୍ରକାଶିତ ଏକ ରିପୋର୍ଟ ଏହି ଅଭିଯୋଗକୁ ଆହୁରି ଜୋରଦାର କରିଛି।
ଏନେଇ ଜାତିସଂଘର ବିଶେଷ ରାଷ୍ଟ୍ରଦୂତ ଫନାର୍ଡ ଡି ବେରେଂନ୍ସ ଆଟଲାଣ୍ଟିକ୍ କାଉନସିଲ ଆଣ୍ଡ ହ୍ୟୁମାନ ରାଇଟସ୍ ଓ୍ବାଚ୍ ପକ୍ଷରୁ ଆୟୋଜିତ ଏକ କାର୍ଯ୍ୟକ୍ରମରେ କହିଛନ୍ତି ଯେ, ଏବେ ନିଷ୍କ୍ରିୟ ରହିବା ସମ୍ଭବ ନୁହେଁ। ଯଦି ଆମେ ଦଣ୍ଡ ନେଦେଇ କାହାକୁ ଛାଡ଼ିଦେଉ ତେବେ ଏହା କେଉଁ ବାର୍ତ୍ତା ପଠାଇବ? ତେଣୁ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ।
ମିଳିତ ଜାତିସଂଘରେ ଆମେରିକାର ଡେପୁଟି ଆମ୍ବାସାଡର ଜେଫ୍ରି ପ୍ରୋସକଟ କହିଛନ୍ତି ଯେ ଏହି ଅତ୍ୟାଚାରକୁ ନେଇ ବହୁ ପ୍ରତିକ୍ରିୟା ଦିଆଯାଉଛି। ଏହା ଆମର ଅନ୍ତର୍ଜାତୀୟ ବ୍ୟବସ୍ଥା ଉପରେ ଥିବା ବିଶ୍ୱାସକୁ ପ୍ରଭାବିତ କରିବ। ଏହା ଅତ୍ୟନ୍ତ ଦୁଃଖଦାୟକ ଯେ ଆଧୁନିକ ମିଳିତ ଜାତିସଂଘର ବ୍ୟବସ୍ଥାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ଏକ ଦେଶ ଏବଂ ଜାତିସଂଘରେ ସ୍ଥାୟୀ ମାନ୍ୟତା ପାଇଥିବା ଦେଶ ଏହାର ପ୍ରତିଶ୍ରୁତିକୁ ଗୁରୁତର ଭାବରେ ଉଲ୍ଲଂଘନ କରୁଛି।
ମିଳିତ ଜାତିସଂଘ ମାନବ ଅଧିକାର କାର୍ଯ୍ୟାଳୟ ରିପୋର୍ଟ ପ୍ରକାଶନରେ ଚାଇନା ଆଶ୍ଚର୍ଯ୍ୟ ଏବଂ ଅସନ୍ତୋଷ ବ୍ୟକ୍ତ କରିଛି। ଚାଇନା ଏହି ରିପୋର୍ଟକୁ ବେଆଇନ ଏବଂ ଅମାନ୍ୟ ବୋଲି କହିଛି।
