ବାହାନଗା,୭।୬ : ବାହାନଗା ଟ୍ରେନ ଦୁର୍ଘଟଣାରେ ପ୍ରାଣ ହରାଇଥିବା ଲୋକଙ୍କ ମୃତଦେକୁ ନେଇ ଦ୍ୱନ୍ଦ୍ୱ ବଢ଼ିବାରେ ଲାଗିଛି। ମୃତଦେହ ଗଦାରେ ମାନବିକତା, ହଜି ଯାଉଛି। ଟଙ୍କା ଲୋଭରେ ନକଲି ଦାବିଦାରଙ୍କ ସଂଖ୍ୟା ବଢୁଛି। ଏଭଳି ସମ୍ବେଦନଶୀଳ ଘଟଣାରେ କିଏ ଅସଲି ଅବା କିଏ ନକଲି ପରିବାର ସଦସ୍ୟ ତାହା ଚିହ୍ନଟ କରିବା ସମ୍ଭବ ହୋଇ ପାରୁ ନାହିଁ। ତେଣୁ ପ୍ରଶାସନର ଚିନ୍ତା ବଢ଼ିବାରେ ଲାଗିଛି।
ଏବେ ଅସଲି ପ୍ରିୟପରିଜନଙ୍କ ଚିହ୍ନଟ ପାଇଁ ନୂଆ ପଦକ୍ଷେପ ଗ୍ରହଣ କରାଯାଇଛି। ବିଏମସି କମିଶନର ବିଜୟ ଅମୃତା କୁଲଙ୍ଗେ କହିଛନ୍ତି ପରିବାରର ପ୍ରକୃତ ସଦସ୍ୟଙ୍କୁ ଚିହ୍ନଟ କରିବା ପାଇଁ ଡିଏନଏ ପରୀକ୍ଷା ପାଇଁ ୩୩ ଟି ରକ୍ତ ନମୁନା ପଠାଯାଇଛି।
ଓଡିଶାରେ କୌଣସି ଡିଏନଏ ପରୀକ୍ଷା ବ୍ୟବସ୍ଥା ନ ଥିବାରୁ ଏହାକ ଏମ୍ସ ଭୁବନେଶ୍ୱରଙ୍କ ତତ୍ତ୍ୱାବଧାନରେ ଏମ୍ସ ଦିଲ୍ଲୀକୁ ପଠାଯାଇଛି। ଏମ୍ସ ଭୁବନେଶ୍ୱର କାର୍ଯ୍ୟର୍ନିବାହୀ ନିର୍ଦ୍ଦେଶକ ପ୍ରଫେସର ଅଶୁତୋଷ ବିଶ୍ୱ କହିଛନ୍ତି ଯେ ଆମେ ଗୋଟିଏ ଦିନ ମଧ୍ୟରେ ରିପୋର୍ଟ ପଠାଇବାକୁ ଅନୁରୋଧ କରିଛୁ।
ଏମ୍ସ ଭୁବନେଶ୍ୱରରେ ପଶ୍ଚିମବଙ୍ଗର ଜୟନଗରର ପରଭେଜ ସହରଦ ଲାସ୍କା ନିଜକୁ ଆବୁବୋକା ଲାସ୍କଙ୍କର ପୁତ୍ର ଭାବରେ ପରିଚିତ କରାଇଥିଲେ। ତାଙ୍କ କହିବାନୁସାରେ, ଟ୍ରେନ ଦୁର୍ଘଟଣାରେ ତାଙ୍କ ପିତାଙ୍କ ମୃତ୍ୟୁ ସମ୍ପର୍କରେ ସୂଚନା ପାଇବା ପରେ ବାହାନଗା ମୃତଦେହ ସଂଗ୍ରହ କରିବାକୁ ଏଠାରେ ପହଞ୍ଚିଛନ୍ତି। ବାପାଙ୍କ ମୃତ୍ୟୁର ଫଟୋ ଅଛି, କିନ୍ତୁ ମୃତଦେହକୁ ଅନ୍ୟ କେହି ନେଇଯାଇଥିବା ସେ ଅଭିଯୋଗ କରିଛନ୍ତି। ବର୍ତ୍ତମାନ ଏମ୍ଦ ଡିଏନଏ ପରୀକ୍ଷା ପାଇଁ ତାଙ୍କ ରକ୍ତ ନମୁନା ସଂଗ୍ରହ କରିଛି। ରିପୋର୍ଟ ଆସିବା ପରେ ତାଙ୍କ ପିତାଙ୍କୁ ଚିହ୍ନଟ କରାଯିବ ବୋଲି କୁହାଯାଉଛି।
ସେହିଭଳି ମାଲଦାର ନୀତମ ରାୟ ଏବଂ ଚନ୍ଦନ ରାୟଙ୍କ ସନ୍ଧାନରେ ସେମାନଙ୍କ ସମ୍ପର୍କୀୟ ଫୋନି ମଣ୍ଡଳ ନିୟୋଜିତ ଅଛନ୍ତି। ଦୁର୍ଘଟଣାର ଖବର ପାଇବା ପରେ ସେ ବାଲେଶ୍ୱର, ସୋରୋ ସମେତ ଅନେକ ଅଞ୍ଚଳ ପରିଦର୍ଶନ କରିଥିଲେ। ସେଠାରୁ ଜାଣିବାକୁ ପାଇଥିଲେ ନୀତିମ ଏବଂ ଚନ୍ଦନଙ୍କର ମୃତ୍ୟୁ ହୋଇସାରିଛି।
ନୀତିମଙ୍କ ମୃତଦେହର ଫଟୋ ଫୋନିଙ୍କୁ ବାଲେଶ୍ୱର ପ୍ରଶାସନ ଦେଇଥିଲେ କିନ୍ତୁ ଏଥିରେ କୌଣସି ନମ୍ବର ନ ଥିଲା ତେଣୁ ଓଡିଶା କିମ୍ବା ପଶ୍ଚିମବଙ୍ଗ ସରକାରୀ ହେଲ୍ପଡେସ୍କ ସେମାନଙ୍କ ସହ ସହଯୋଗ କରୁନାହାଁନ୍ତି। ସେ କିମ, ସମ ହସ୍ପିଟାଲରେ ଘୁରି ବୁଲୁଛନ୍ତି କିନ୍ତୁ କିଛି ଲାଭ ହୋଇନାହିଁ। ସେମାନଙ୍କୁ କ୍ଷତିପୂରଣ ଅର୍ଥର ଆବଶ୍ୟକତା ନାହିଁ, କେବଳ ମୃତ ଶରୀର ବିଷୟରେ ସେମାନେ ସୂଚନା ପାଇବାକୁ ଚାହୁଁଛନ୍ତି।
ପଶ୍ଚିମବଙ୍ଗର ୨୪ ପରଗଣାରୁ ଅବଦୁଲ ୱାହାବ ଶେଖ ତାଙ୍କ ଭାଇ ଜିଆଉଦ୍ଦିନ ଶେଖଙ୍କୁ ପାଞ୍ଚ ଦିନ ଧରି ଖୋଜୁଥିଲେ ମଧ୍ୟ ସେ ନିରାଶ ହୋଇଛନ୍ତି। ତେଣୁ ପଶ୍ଚିମବଙ୍ଗର ହେଲ୍ପଡେସ୍କର ପରାମର୍ଶ କ୍ରମେ ଅବଦୁଲ ଡିଏନଏ ପରୀକ୍ଷା ପାଇଁ ତାଙ୍କ ରକ୍ତ ନମୁନା ଦେଇଛନ୍ତି।
ଏମାନଙ୍କ ସହିତ,ଏମ୍ସ କ୍ୟାମ୍ପସରେ ଏପରି ଅନେକ ଲୋକ ଅଛନ୍ତି, ଯେଉଁମାନେ ନିଜ ସମ୍ପର୍କୀୟଙ୍କ ସ୍ଥିତି ଜାଣିପାରୁ ନାହାଁନ୍ତି। ସେମାନେ କହିଛନ୍ତି ଅନ୍ୟ କେହି ସେମାନଙ୍କ ସମ୍ପର୍କୀୟଙ୍କ ମୃତଦେହ ନେଇଛନ୍ତି। ଅନେକ ଲୋକ ବାଲେଶ୍ୱରରୁ ସେମାନଙ୍କ ପ୍ରିୟଜନଙ୍କ ଶରୀରର ଫଟୋ ଆଣିଛନ୍ତି। ଫଟୋର ଟ୍ୟାଗ ନମ୍ବର ମଧ୍ୟ ଏମ୍ସ ହେଲ୍ପ ଡେସ୍କ ଦ୍ୱାରା ଯାଞ୍ଚ କରାଯାଉଛି ।
କେତେକ ଫଟୋ ତାଲିକାରେ ମିଳୁନାହିଁ । ଅନେକ ଫଟୋରେ ଟ୍ୟାଗ ନମ୍ବର ମଧ୍ୟ ନାହିଁ। ବହୁ ନକଲି ସମ୍ପର୍କୀୟ ମଧ୍ୟ ପହଞ୍ଚିଛନ୍ତି କାରଣ ରେଳବାଇ ମୃତକମାନଙ୍କ ପାଇଁ ଅନୁକମ୍ପାମୂଳକ ସହାୟତା ଦେଉଛନ୍ତି ତେଣୁ ପରିବାରର ମୃତଦେହକୁ ଉପଯୁକ୍ତ ବ୍ୟକ୍ତିଙ୍କୁ ହସ୍ତାନ୍ତର କରିବା ପାଇଁ ଡିଏନଏ ଟେଷ୍ଟ ବ୍ୟବସ୍ଥା କରାଯାଇଛି।