ପଟ୍ଟାମୁଣ୍ଡାଇ,୧୮ା୫(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଧୋୟାଞ୍ଚଳରେ ପ୍ରତିବର୍ଷ କାଣି ଓ ବ୍ରାହ୍ମଣୀ ନଦୀ ବନ୍ୟାରେ ତଟବର୍ତ୍ତୀ ଜମିର ଫସଲ ନଷ୍ଟ ହେଉଛି। ପ୍ରବଳ ବନ୍ୟାରେ ବହୁ ଚାଷ ଜମି ବାଲିଚର ହେଉଛି। ନଦୀ ତଟବର୍ତ୍ତୀ ଜମିର ସୁରକ୍ଷା ପାଇଁ ଉଭୟ ନଦୀ ପାର୍ଶ୍ୱରେ ତଟବନ୍ଧ ବିଭାଗ ପକ୍ଷରୁ ଏସ୍କେଫ୍ ନିର୍ମାଣ ସହ ନଦୀକୂଳରେ ପଥର ପ୍ୟାକିଂ କରାଯିବାକୁ ଧୋୟାଞ୍ଚଳ ଚାଷୀମାନଙ୍କ ପକ୍ଷରୁ ଦାବି ହୋଇଛି। ହେଲେ ତଟବନ୍ଧ ବିଭାଗ ପକ୍ଷରୁ ସେପରି କୌଣସି ପଦକ୍ଷେପ ନିଆଯାଉନାହଁ ବୋଲି ଅଭିଯୋଗ ହେଉଛି ।
ଧୋୟାଞ୍ଚଳ ସିଂହଗାଁ, ପେଣ୍ଠପାଳ, ତରଡିପାଳ, ଅଳପୁଆ, ଅଣ୍ଢରା, ଅମୃତମଣୋହି ଓ ବଲୁରିଆ ପଞ୍ଚାୟତ ଗ୍ରାମଗୁଡିକର ଦକ୍ଷିଣ ପାର୍ଶ୍ୱରେ ବ୍ରାହ୍ମଣୀ ନଦୀ ପ୍ରବାହିତ ହେଉଥିବା ବେଳେ ବାମପାର୍ଶ୍ୱରେ କାଣି ନଦୀ ପ୍ରବାହିତ ହେଉଛି। ଏହି ନଦୀ ନିକଟବର୍ତ୍ତୀ ଗ୍ରାମ ଓ ଚାଷ ଜମି ପାଇଁ ମାଡ଼ି ଆସୁଛି ବିପଦ । ନଦୀ ଆଁରେ ଲୀନ ହୋଇଯିବାକୁ ବସିଛି ଶତାଧିକ ଏକର ଚାଷଜମି । କିଛି ଜମି ନଦୀ ଗର୍ଭରେ ଲୀନ ହୋଇ ସାରିଥିବା ବେଳେ ନଦୀର କରାଳ ରୂପ ଗ୍ରାମବାସୀଙ୍କ ଚିନ୍ତା ବଢାଇ ଦେଇଛି । ଯାହାକୁ ନେଇ ଆଶା ଓ ଆଶଙ୍କାରେ ଗ୍ରାମବାସୀ ଦିନ କାଟୁଛନ୍ତି। ଦିନକୁ ଦିନ ନଦୀ ନିଜର ଆୟତନ ବୃଦ୍ଧି କରିବା ସହିତ ଗତିପଥ ବଦଳାଇ ଗ୍ରାମ ଆଡକୁ ମାଡ଼ି ଆସୁଛି। ସେଥିପାଇଁ ବନ୍ୟା ସମୟରେ ନଦୀ କୂଳ ଖାଇବାରେ ଲାଗିଛି । ଇତିମଧ୍ୟରେ ନଦୀ ଗର୍ଭରେ ପ୍ରାୟ ୧୦୦ ଏକର ଚାଷ ଜମି ଲୀନ ହୋଇ ସାରିଛି । ବିଶେଷକରି ଧାନ ଏବଂ ପରିବା ଜମି ନଦୀରେ ମିଶିଛି। ଆଡିବନ୍ଧରେ ପଥର ପ୍ୟାକିଂ କରିବା ନିମନ୍ତେ ଗ୍ରାମବାସୀ ବାରମ୍ବାର ପ୍ରଶାସନିକ ଅଧିକାରୀଙ୍କଠାରୁ ଆରମ୍ଭ କରି ଜନ ପ୍ରତିନିଧିଙ୍କ ଦୃଷ୍ଟି ଆକର୍ଷଣ କରିଛନ୍ତି। ହେଲେ ଆଜି ପର୍ଯ୍ୟନ୍ତ ସେଥିରେ କୌଣସି ସୁଫଳ ମିଳିପାରିନାହିଁ । ରାଜ୍ୟ ସରକାର ପ୍ରତିବର୍ଷ ପଥର ପ୍ୟାକିଂ ବନ୍ଧ ନିର୍ମାଣ ପାଇଁ ଅର୍ଥ ବ୍ୟୟ କରୁଛନ୍ତି। ମାତ୍ର ସେଥିପ୍ରତି ବିଭାଗୀୟ କର୍ତ୍ତୃପକ୍ଷ ଅବହେଳା ପ୍ରଦର୍ଶନ କରି ବିଭିନ୍ନ ବନ୍ଧର ରକ୍ଷଣାବେକ୍ଷଣ ନାଁରେ ଅର୍ଥ ବ୍ୟୟ କରୁଥିବା ଅଭିଯୋଗ ହେଉଛି।
ବ୍ରହ୍ମଣୀ ଓ କାଣୀ ନଦୀ ପାର୍ଶ୍ୱରେ ୨ ମିଟର ଉଚ୍ଚତା ବିଶିଷ୍ଟ ପଥର ବନ୍ଧ (ଏସ୍କେଫ୍) ନିର୍ମାଣ କରାଗଲେ ଚାଷୀମାନଙ୍କ ବହୁ ଦିନର ସମସ୍ୟା ଦୂର ହୋଇ ପାରନ୍ତା ବୋଲି ସାଧାରଣରେ ମତ ପ୍ରକାଶ ପାଇଛି। ଅନ୍ୟପକ୍ଷେ ବ୍ରାହ୍ମଣୀ ନଦୀର ଦକ୍ଷିଣ ପାର୍ଶ୍ୱ ପଟ୍ଟାମୁଣ୍ଡାଇ ଜଳସମ୍ପଦ ବିଭାଗ ଅଧୀନରେ ଥିବା ବେଳେ ନଦୀ ପାଖ ଜମି ଓ ଗ୍ରାମର ସୁରକ୍ଷା ପାଇଁ ଅନେକ ସ୍ଥାନରେ ଏସ୍କେଫ୍ ନିର୍ମାଣ ସହିତ ପଥର ପ୍ୟାକିଂ କରାଯାଇଛି। ମାତ୍ର ଆଳି ତଟବନ୍ଧ ବିଭାଗ ଅଧୀନରେ ଥିବା ବ୍ରାହ୍ମଣୀ ବାମ ପାର୍ଶ୍ୱ ଓ କାଣୀନଦୀ ଦକ୍ଷିଣ ପାର୍ଶ୍ୱ ଜମି ଓ ଗ୍ରାମର ସୁରକ୍ଷା ନିମନ୍ତେ କୌଣସି ପଦକ୍ଷେପ ନିଆଯାଉନାହଁ। ଏହି ସମସ୍ୟା ସମାଧାନ ପାଇଁ ପ୍ରଶାସନିକ ଅଧିକାରୀଙ୍କ ସମେତ ନିର୍ବାଚିତ ପ୍ରତିନିଧି ପଦକ୍ଷେପ ନେବା ଜରୁରୀ ବୋଲି ସିଂହଗଁା ସମିତି ସଭ୍ୟ ଅଭୟ ସ୍ବାଇଁ, ଅଣ୍ଢରା ସରପଞ୍ଚ କଳ୍ପନା ଜେନା, ଅମୃତମଣୋହି ସରପଞ୍ଚ ନିରୁପମା ଦାସ, ପେଣ୍ଠପାଳ ସରପଞ୍ଚ ଅନ୍ନପୁର୍ଣ୍ଣା ସେଠୀ, ସାମାଜିକ କର୍ମୀ ହିମାଂଶୁ ବିଶ୍ୱାଳ, ନରେନ୍ଦ୍ର ଧଳ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ତଟବନ୍ଧ ବିଭାଗ ସହକାରୀ ଯନ୍ତ୍ରୀ ନିରଞନ ବେହେରାଙ୍କୁ ପଚାରିବାରେ ଏସ୍କେଫ୍ର ଆବଶ୍ୟକତା ରହିଛି। ବିଭାଗୀୟ ଉଚ୍ଚ କତ୍ତୃପକ୍ଷଙ୍କୁ ଏ ସମ୍ପର୍କରେ ଅବଗତ କରାଯିବ। ସେମାନେ ସମ୍ପୃକ୍ତ ସ୍ଥାନ ପରିଦର୍ଶନ କରିବା ପରେ ଆବଶ୍ୟକ ପଦକ୍ଷେପ ନିଆଯିବ ବୋଲି ସେ କହିଛନ୍ତି।