ବନ୍ତ,୧୭।୭(ଡି.ଏନ୍.ଏ.)- ଭଦ୍ରକ ଜିଲା ବନ୍ତ ତହସିଲ ଛୟାଳସିଂହ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଅଧୀନ ଶାଳକଣିଆ,ବାଙ୍ଗୋରପଦୀ, ସଖିପାଟଣା ମୌଜାର ସରକାରୀ ଚକ ରାସ୍ତା ଓ ସରକାରଙ୍କ ଦ୍ୱାରା ଚିହ୍ନିତ ଜଳସେଚନ ନାଳକୁ କେତେକ ଚାଷୀ ଅବରୋଧ କରିଛନ୍ତି। ଫଳରେ ଚାଷଜମିରୁ ବାଙ୍ଗୋରପଦୀ ମାଇନର କେନାଲ ଜଳ ଓ ବର୍ଷାପାଣି ନିଷ୍କାସନ ହୋଇ ପାରୁନାହିଁ ା ଅବରୋଧ ନ ହଟିଲେ ଚଳିତ ଖରିଫ ଋତୁରେ ପ୍ରାୟ ଶହେ ଏକର ଚାଷ ଜମି ପଡ଼ିଆ ପଡ଼ିବ ବୋଲି ଚାଷୀମାନେ ଅଭିଯୋଗ କରିଛନ୍ତି ା ୭ଦିନ ମଧ୍ୟରେ ସମ୍ପୃକ୍ତ ଚକ ରାସ୍ତା ଓ ଜଳ ସେଚନ ନାଳକୁ ଅବରୋଧମୁକ୍ତ କରା ନ ଗଲେ ଚାଷୀମାନେ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ା ଏନେଇ ଉପରୋକ୍ତ ମୌଜାର ଅନନ୍ତ ଚରଣ ପୃଷ୍ଟି, ରତିକାନ୍ତ ରାଉତ, ପୁରୁଷୋତ୍ତମ ବାରିକ, ରତ୍ନାକର ସାହୁ, ଅଭିମନ୍ୟୁ ମିଶ୍ର, ନରେନ୍ଦ୍ର ରାଉତ, ବିଷ୍ଣୁ ରାଉତ, ଭାସ୍କର ଶତପଥୀ, ରବୀନ୍ଦ୍ର କର, ଶଶୀକାନ୍ତ ସାହୁ, ଅରବିନ୍ଦ ଦାଶ, ଭାଗବତ ପଣ୍ଡା, ବ୍ରଜ କିଶୋର ମିଶ୍ର, ଧୀରେନ୍ଦ୍ର ସେନାପତିଙ୍କ ସମେତ ବହୁ ଚାଷୀ ତହସିଲଦାର, ଥାନାଧିକାରୀ, ବ୍ଲକ ସହକାରୀ କୃଷି ଅଧିକାରୀଙ୍କୁ ଲିଖିତ ଅଭିଯୋଗ କରିଛନ୍ତି ା ବୁଧବାର ଥାନାଧିକାରୀ ମୀନା ବିନ୍ଧାଣୀ ଘଟଣାସ୍ଥଳ ପରିଦର୍ଶନ କରିବା ସହ ପାଣି ପଞ୍ଚାୟତ କର୍ମକର୍ତ୍ତାଙ୍କୁ ଡକାଇ ଆଲୋଚନା କରିଥିଲେ। ଏ ସମ୍ପର୍କରେ ଥାନାଧିକାରୀଙ୍କୁ ପଚାରିବାରୁ ତହସିଲଦାରଙ୍କ ଉପସ୍ଥିତିରେ ପାଣି ପଞ୍ଚାୟତ କର୍ମକର୍ତ୍ତାଙ୍କ ସହ ଆଲୋଚନା କରାଯାଇ ପଦକ୍ଷେପ ନିଆଯିବ ବୋଲି କହିଥିଲେ। ସେହିପରି ବ୍ଲକ ସହକାରୀ କୃଷି ଅଧିକାରୀ ରମେଶ ଚନ୍ଦ୍ର ରାୟଙ୍କୁ ପଚାରିବାରୁ ଘଟଣା ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଥିବା କହିଥିଲେ ା