ଜଳେଶ୍ୱର,୧୨ା୧୨(ଡି.ଏନ.ଏ.): ଚଳିତ ଖରିଫ ଋତୁରେ ପ୍ରତିକୂଳ ପାଗ ସତ୍ତ୍ୱେ ବାଲେଶ୍ୱର ଜିଲ ଜଳେଶ୍ୱର ବ୍ଲକର ଚାଷୀମାନେ ଖରିଫ ଧାନଚାଷ ରୁଆପୋତା କରିଥିଲେ। କିନ୍ତୁ ଚକଡାପୋକର ପ୍ରାଦୁର୍ଭାବ ଯୋଗୁ ଅମଳ ବେଳକୁ ଶତାଧିକ ଏକର ଜମିର ଚାଷ ନଷ୍ଟ ହୋଇଛି। କେଣ୍ଡାରେ ଗୋଟିଏ ଧାନ ନ ଥିବା ବେଳେ ଗଛଗୁଡିକ ଶୁଖିଯାଇ ଜମିରେ ଛିଡା ହୋଇଛି।
ନିର୍ଦ୍ଦିଷ୍ଟ ସମୟରେ ବର୍ଷା ହୋଇ ନ ଥିବାରୁ ଖରିଫ ଧାନଚାଷର ତଳି ନିର୍ଦ୍ଦିଷ୍ଟ ସମୟରେ ପଡିପାରି ନ ଥିଲା।
ପରେ ରୁଆପୋତା ଚାଲିଥିବା ବେଳେ ପଶ୍ଚିମବଙ୍ଗର ଉଦ୍ବୃତ୍ତ ବର୍ଷାପାଣି ଓ ସୁବର୍ଣ୍ଣରେଖାର ବନ୍ୟା ବିସ୍ତୀର୍ଣ୍ଣ ଅଞ୍ଚଳ ବୁଡାଇ ଦେଇଥିଲା। ତଥାପି ଚାଷୀମାନେ ପ୍ରାୟ ୧୯ହଜାର ହେକ୍ଟର ଜମିରୁ ଅଧିକ ରୁଆପୋତା କରିପାରିଥିଲେ। କିନ୍ତୁ ଏଥିରୁ ୧୨୫୮ ହେକ୍ଟର ଜମିର ଚାଷ ବନ୍ୟା ଓ ବର୍ଷାପାଣିରେ ନଷ୍ଟ ହୋଇଥିବା ଦର୍ଶାଯାଇଥିଲା। କିନ୍ତୁ ଥୋଡ ସମୟରେ ବିଭିନ୍ନ ସ୍ଥାନରେ ବିସ୍ତୃତ ଭାବେ ଚକଡାପୋକ ପ୍ରାଦୁର୍ଭାବ ଦେଖାଦେଇଥିଲା। ଏନେଇ କୃଷି ଅଧିକାରୀ, କୃଷି ବୈଜ୍ଞାନିକମାନେ ବାରମ୍ବାର ଘଟଣାସ୍ଥଳକୁ ଯାଇ ପରିସ୍ଥିତି ଅନୁଧ୍ୟାନ କରିଥିଲେ ଓ ଚାଷୀଙ୍କ ମଧ୍ୟରେ ସଚେତନତା କରିଥିଲେ। ପରିସ୍ଥିତି ଏପରି ଥିଲା କୌଣସି କୀଟମରା ଔଷଧ ବାରମ୍ବାର ସ୍ପେ କରି ମଧ୍ୟ ଚାଷୀମାନେ ଉପକୃତ ହୋଇପାରି ନ ଥିଲେ। ଏବେ ଧାନକଟା ଚାଲିଥିବା ବେଳେ ଚକଡାପୋକ ଲାଗିଥିବା ଜମିରେ ଗୋଟିଏ ହେଲେ ଧାନକେଣ୍ଡା ନାହିଁ। ଏପରିକି ସେ ସ୍ଥାନର ଧାନଗଛଗୁଡିକ ପୋଡିଗଲା ଭଳି ହୋଇଛି। ଚାଷୀମାନେ ଏପରି ଶହ ଶହ ଏକର ଜମିର ଚାଷ ବିଲରେ ଛାଡି ଦେଇଛନ୍ତି। ସେ ଧାନଗଛଗୁଡିକୁ ଗୋରୁମାନେ ମଧ୍ୟ ଛୁଉଁନାହାନ୍ତି। ପରିସ୍ଥିତି ଏପରି ହୋଇଛି ଯେ ଚାଷୀ କାଟିବାକୁ ଅମଙ୍ଗ ଥିବା ବେଳେ ରବିଋତୁରେ ଧାନ ରୁଆପୋତା କରିବା ଅସମ୍ଭବ ହୋଇପଡିଛି।
ଚକଡାପୋକ ଦ୍ୱାରା ଏପରି ଅମଳ ହୋଇ ନ ଥିବା ଧାନକ୍ଷେତର ପରିମାଣ ତଦନ୍ତ ହେବା ସହିତ ଚାଷୀମାନଙ୍କୁ ରବି ଋତୁ ସହାୟତା ଯୋଗାଇବାକୁ ଦାବି ହୋଇଛି।