ପାରାଦୀପ,୧୯ା୧୦(ସ୍ବ.ପ୍ର.): ଜଗତ୍ସିଂହପୁର ଜିଲାର ପ୍ରମୁଖ ଶିଳ୍ପସହର ପାରାଦୀପ ପୌରାଞ୍ଚଳକୁ ୨୦୧୮ରେ ବାହ୍ୟ ମଳମୁକ୍ତ ଭାବେ ଘୋଷଣା କରାଯାଇଛି। ଏପରି କି ସ୍ବଚ୍ଛ ସହର ଭାବେ ଦୁଇଥର ରାଷ୍ଟ୍ରପତି ପୁରସ୍କାର ପାଇସାରିଲାଣି। ବାସ୍ତବରେ ତା’ର ବିପରୀତ ଚିତ୍ର ପୌରାଞ୍ଚଳରେ ଦେଖିବାକୁ ମିଳୁଛି। ଏବେ ବି ଅନେକ ବସ୍ତିର ଲୋକମାନେ ଖୋଲାରେ ଶୌଚ କରୁଛନ୍ତି। ଷଣ୍ଢକୁଦ ବସ୍ତି, ନୂଆବଜାର ଲୋକମାନେ ସମୁଦ୍ର ବେଳାଭୂମିରେ ଏସବୁ ଘଟଣା ଦେହସୁହା ହୋଇଗଲାଣି। ଏବେ ଅଠରବାଙ୍କି ଲକପଡା ବସ୍ତିରେ କୌତୂହଳପୂର୍ଣ୍ଣ ଶୌଚାଳୟ ଦେଖିବାକୁ ମିଳିଛି। ଏହି ବସ୍ତି ସଂଲଗ୍ନ କାଳିଆବୁଦା ନଦୀ ଉପରେ ବାଉଁଶ ଭାଡିରେ ଶତାଧିକ ଶୌଚାଳୟ ନିର୍ମାଣ କରାଯାଇଛି। ଉପରୋକ୍ତ ବସ୍ତିର ପ୍ରାୟ ୧୮୫ ପରିବାର ଏସବୁ ଶୌଚାଳୟକୁ ଯାଉଛନ୍ତି। ନଦୀ ଉପରେ ବାଉଁଶ ବନ୍ଧାହୋଇ ଛୋଟ ଘର ଭଳି କରାଯାଇଛି। ତା’ର ଚତୁଃପାଶର୍ବରେ କଳା ପଲିଥିନ ଘେରା ଯାଇଛି। ସେଠାକୁ ଯିବା ପାଇଁ କୂଳଠାରୁ ବାଉଁଶ ପୋଲ ହୋଇଛି। ସେଥିରେ କୌଣସି ପାଇଖାନା ଲାଗିନାହିଁ। ମଳତ୍ୟାଗ ପାଇଁ ଭାଡିରେ କିଛି ଅଂଶ ଫାଙ୍କା ରହିଛି। ଏମିତି ହାଇଟେକ ମଡେଲ ଶୌଚାଳୟ ଦ୍ୱାରା ସମ୍ପୃକ୍ତ ନଦୀ ଜଳ ପ୍ରଦୂଷିତ ହେଉଥିବା ସାଧାରଣରେ ଅଭିଯୋଗ ହୁଏ। କୈବର୍ତ୍ତ ଷୋଳଭାଇ ସଭା ସଂଗଠନ ପକ୍ଷରୁ ଉକ୍ତ ନଦୀକୁ ନିଲାମରେ ନିଆଯାଇ ମାଛଚାଷ କରାଯାଉଛି।
ସୂଚନାଯୋଗ୍ୟ, ବସ୍ତି ଲୋକଙ୍କ ପାଇଁ ପାରାଦୀପ ପୌରପାଳିକା ପକ୍ଷରୁ ଏପର୍ଯ୍ୟନ୍ତ ୨୫୨୭ ବକ୍ତିଗତ ଶୌଚାଳୟ କରାଯାଇଛି। ଏହାବାଦ ଗୋଷ୍ଠୀ ଓ ସର୍ବସାଧାରଣରେ ବ୍ୟବହାର ନିମନ୍ତେ ୪୭ ଶୌଚାଳୟ କରାଯାଇଛି। ସେଥିରୁ ୩୯ଟି ସ୍ବୟଂ ସହାୟକ ଗୋଷ୍ଠୀ ଓ ୮ଟି ସୁଲଭ ଶୌଚାଳୟ ପରିଚାଳନା କରୁଛନ୍ତି। ଅଠରବାଙ୍କି ଲକ୍ପଡା ପାଇଁ ପ୍ରାୟ ୩୦୦ ବ୍ୟକ୍ତିଗତ ଶୌଚାଳୟ ଓ ୩ ଗୋଷ୍ଠୀଗତ ଶୌଚାଳୟ ଯୋଗାଇ ଦିଆଯାଇଛି। ଏତଦ୍ବ୍ୟତୀତ ଏସାରଷ୍ଟିଲ (ଏବେର ଏଏମ୍ଏନ୍ଏସ୍) ପକ୍ଷରୁ ମଧ୍ୟ ଶତାଧିକ ଶୌଚାଳୟ ନିର୍ମାଣ କରାଯାଇଥିବା ନେଇ ବିଭିନ୍ନ କାନ୍ଥ ବାଡରେ ଲଗାଯାଇଥିବା ସୂଚନା ଫଳକରେ ଦର୍ଶାଯାଇଛି। ଏତେପରେ ମଧ୍ୟ ଲୋକମାନେ ନଦୀ ଉପରେ ଅସ୍ଥାୟୀ ଶୌଚାଳୟ ବ୍ୟବହାର କରୁଛନ୍ତି। ଏ ସମ୍ପର୍କରେ ପୌରାଧ୍ୟକ୍ଷ ବସନ୍ତ ବିଶ୍ୱାଳ କହିଛନ୍ତି, ପୌରପାଳିକା ପକ୍ଷରୁ ଏପରି ଶୌଚାଳୟକୁ ୨୦୧୯ ଓ ୨୦ରେ ଦୁଇଥର ଉଚ୍ଛେଦ କରାଯାଇଥିଲା। ଏହାସତ୍ତ୍ୱେ ଲୋକମାନେ ଅଭ୍ୟାସ ବଦଳାଉ ନାହାନ୍ତି। ଏନେଇ ସେଗୁଡ଼ିକୁ ପୁଣି ଉଚ୍ଛେଦ କରାଯିବା ସହ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରାଯିବ।