ଝାରସୁଗୁଡ଼ା ଅଫିସ/ସୁନ୍ଦରଗଡ଼/ହେମଗିର,୧୬ା୧୦(ଡି.ଏନ୍.ଏ.): କୋଇଲା ପରିବହନ ଭଡ଼ା ଓ ଲୋଡିଂ କ୍ଷେତ୍ରରେ ଛତିଶଗଡ଼ ରାୟଗଡ଼ ଅଞ୍ଚଳର କୋଇଲା ଟ୍ରକ୍ଗୁଡିକୁ ପାତରଅନ୍ତର କରାଯାଉଥିବା ଅଭିଯୋଗ କରାଯାଇଛି। ଏହି ପରିପ୍ରେକ୍ଷୀରେ ଛତିଶଗଡ଼ ରାୟଗଡ଼ର ଟ୍ରେଲର ଆସୋସିଏଶନ ତରଫରୁ ଗତ ଶୁକ୍ରବାର ମଧ୍ୟାହ୍ନ ୧୨ଟାରୁ ଓଡ଼ିଶା-ଛତିଶଗଡ଼ ସୀମାନ୍ତରେ ଓଡ଼ିଶା ଟ୍ରକ୍ଗୁଡିକୁ ଛତିଶଗଡ଼ ମଧ୍ୟକୁ ପ୍ରବେଶ କରିବାକୁ ଦିଆଯାଉନାହିଁ। ଫଳରେ ଛତିଶଗଡ଼-ଝାରସୁଗୁଡ଼ା ସୀମାନ୍ତ ୪୯ନଂ. ଜାତୀୟ ରାଜପଥର କନକତୋରା ଓ ଛତିଶଗଡ଼-ସୁନ୍ଦରଗଡ଼ ସୀମାନ୍ତ ପୂର୍ତ୍ତ ବିଭାଗ ରାସ୍ତାର ଟପରିଆ ନିକଟରେ ହଜାର ହଜାର କୋଇଲା ବୋଝେଇ ଗାଡ଼ି ଅଟକି ରହିଥିଲା। ଫଳରେ ସୁନ୍ଦରଗଡ଼, ଝାରସୁଗୁଡ଼ା ଅଞ୍ଚଳରେ ଥିବା ଏମ୍ସିଏଲ୍ ଓ ଅନ୍ୟାନ୍ୟ ଖଣିରୁ ପଡ଼ୋଶୀ ଛତିଶଗଡ଼ ରାଜ୍ୟ ରାୟଗଡ଼ ଅଞ୍ଚଳରେ ଥିବା କଳକାରଖାନାକୁ କୋଇଲା ପରିବହନ ବାଧାପ୍ରାପ୍ତ ହୋଇଥିଲା। କୋଇଲା ବୋଝେଇ ଗାଡ଼ି ଶହ ଶହ ସଂଖ୍ୟାରେ ଅଟକିବା ଯୋଗୁ ୪୯ନଂ. ଜାତୀୟ ରାଜପଥ ଅବରୋଧ ହୋଇ ଟ୍ରାଫିକ୍ ସମସ୍ୟା ସୃଷ୍ଟି ହୋଇଥିଲା। ସେହିପରି ସୁନ୍ଦରଗଡ଼-ରାୟଗଡ଼ ମଧ୍ୟରେ ଯାନବାହନ ଚଳାଚଳ ବ୍ୟାହତ ହୋଇଥିଲା। ଖବର ପାଇ ଶନିବାର ମଧ୍ୟାହ୍ନରେ ଝାରସୁଗୁଡ଼ା ଜିଲା ପ୍ରଶାସନ ଓ ପୋଲିସ ପ୍ରଶାସନ ସୀମାନ୍ତ କନକତୋରା ନିକଟରେ ପହଞ୍ଚତ୍ ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ଏଥିରେ ଝାରସୁଗୁଡ଼ା ଜିଲା ପ୍ରଶାସନ ତରଫରୁ ଲଖନପୁର ତହସିଲଦାର ବିଶ୍ବକେଶନ ପାଣ୍ଡେ, ଏସ୍ଡିପିଓ ଗୁପ୍ତେଶ୍ୱର ଭୋଇ, ରେଙ୍ଗାଲି ଆଇଆଇସି କ୍ରେସାନିଆ ସାମରିଆ, ବ୍ରଜରାଜନଗର ଟ୍ରକ୍ ଆସୋସିଏଶନ ସଭାପତି ଦେବ ଦାଶ, ସମ୍ପାଦକ ରାଜା ପୁରୋହିତ, ବନ୍ଧବାହାଲ ଟ୍ରକ୍ ମାଲିକ ସଂଘ କର୍ମକର୍ତ୍ତା, ଛତିଶଗଡ଼ ରାୟଗନ ବିଧାୟକ ପ୍ରକାଶ ନାୟକ, ରାୟଗଡ଼ ଟ୍ରେଲର ଆସୋସିଏଶନ କର୍ମକର୍ତ୍ତା ଆଶିଷ ଯାଦବ, ଝୋଟ ମିଲ୍ ଥାନା ପୋଲିସ ସାମିଲ ହୋଇଥିଲେ। ଛତିଶଗଡ଼ ଟ୍ରେଲର ଆସୋସିଏଶନର ଅଭିଯୋଗ ରହିଥିଲା ଯେ ସମ୍ବଲପୁର ଜିଲା ଖିଣ୍ଡା ତଲାବିରା କୋଲ୍ ମାଇନ୍ସ ଓ ସୁନ୍ଦରଗଡ଼ କୋଇଲା ଖଣିରେ ଛତିଶଗଡ଼ ଟ୍ରକ୍, ଟ୍ରେଲରକୁ ଓଡ଼ିଶା ଟ୍ରେଲର ତୁଳନାରେ କମ୍ ମାଲ୍ ଲୋଡିଂ ଦିଆଯାଉଛି। ଏହାସହ ପ୍ରତି ଲୋଡିଂ ପିଛା ଭଡ଼ା ମଧ୍ୟ କମ୍ ଦିଆଯାଉଛି। ଏହାର ସମାଧାନ କରାଯିବ ବୋଲି ପ୍ରଶାସନର ପ୍ରତିଶ୍ରୁତି ପରେ ସ୍ଥିତି ସ୍ବାଭାବିକ ହୋଇଥିଲା।