ପଟ୍ଟାମୁଣ୍ଡାଇ,୭ା୨(ସ୍ବ.ପ୍ର.):କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ବାଲିପାଟଣା ପଞ୍ଚାୟତର ଖଡିପାଳ-ଆଗାଡିଆ ମୌଜାରୁ ଶତାଧିକ ତାଳ ଗଛ ଦୁର୍ବୃତ୍ତମାନେ କାଟି ନେଇଛନ୍ତି। ଏ ନେଇ ୧୫ ଦିନ ତଳେ ତହସିଲରେ ଅଭିଯୋଗ ପରେ ତଦନ୍ତ ଆରମ୍ଭ ହୋଇଥିଲା। ପଟ୍ଟାମୁଣ୍ଡାଇର ତତ୍କାଳିନ ତହସିଲଦାର ଓ ରାଜନଗର ବନଖଣ୍ଡ ଫରେଷ୍ଟର ମହନ୍ତ କୁମାର ମଲ୍ଲିକ ସଦଳବଳ ଘଟଣାସ୍ଥଳରେ ପହଞ୍ଚତ୍ ଗଛ କଟା ଓ ନିର୍ମାଣାଧୀନ ରାସ୍ତା କାର୍ଯ୍ୟର ତଦନ୍ତ କରିଥିଲେ। ଗଛ ଲଗା ଯାଇଥିବା ପ୍ଲଟର ସତ୍ୟତା ଉପରେ ମାପ କରାଯାଇ ଯାଞ୍ଚ କରାଯାଇଥିଲା। ଘଟଣାସ୍ଥଳରେ ଅଭିଯୋଗକାରୀ ଲୋକମାନେ ରୁଣ୍ଡ ହୋଇଥିଲେ। ତେବେ ତଦନ୍ତ ପରେ ଫରେଷ୍ଟର ଓ ରାଜସ୍ବ ବିଭାଗ କୌଣସି କାର୍ଯ୍ୟାନୁଷ୍ଠାନ ନ ନେଇ ଫେରି ଆସିଥିଲେ। ଏହାକୁ ନେଇ ସାଧାରଣରେ ଅସନ୍ତୋଷ ଦେଖିବାକୁ ମିଳିଥିଲା। ଗଛ କଟା ଉପରେ ତ୍ୱରିତ କାର୍ଯ୍ୟାନୁଷ୍ଠାନ ନ ନେଇ ବିଳମ୍ବ ତଦନ୍ତକୁ ଅନେକ ଗ୍ରହଣ କରି ପାରି ନ ଥିଲେ। ଏ ସମ୍ପର୍କ ରାଜନଗର ବନଖଣ୍ଡ ଫରେଷ୍ଟର ମଲ୍ଲିକଙ୍କୁ ଘଟଣା ସମ୍ପର୍କରେ ପଚାରିବାରୁ ତଦନ୍ତ ପ୍ରକ୍ରିୟା ଚାଲୁ ରହିଛି। ଉପରିସ୍ଥ ଅଧିକାରୀଙ୍କ ସହ ଆଲୋଚନା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଥିଲେ। ମାତ୍ର ଆଜକୁ ପ୍ରାୟ ୧୫ଦିନ ଅତିବାହିତ ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆ ନ ଯିବାରୁ ଦୁର୍ବୃତ୍ତମାନେ ଅନ୍ୟ ଗଛ ମଧ୍ୟ କାଟି ନେଇ ଯାଉଛନ୍ତି ବୋଲି ସ୍ଥାନୀୟ ଗ୍ରାମବାସୀ ଶିବପ୍ରସାଦ ପରିଡା, ଦାମୋଦର ପରିଡା, କାଳନ୍ଦୀ ସ୍ବାଇଁ, ଅନିରୁଧ ବିଶ୍ୱାଳ, ସୁବାସ ବଳ, ପୁଷ୍ପଲତା ସାହୁ, ରାଜେନ୍ଦ୍ର ସାହୁ ଅମରବର ପାତ୍ର, ବିନୋଦ ମଲିକ, ଶଙ୍କର ମଳିକ, ଅକ୍ଷୟ ମହାଳିକ, ଜିତେନ୍ଦ୍ର ସ୍ବାଇଁଙ୍କ ସମେତ ଶତାଧିକ ଲୋକ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଅନ୍ୟପକ୍ଷରେ କିଛି ମାସ ତଳେ ତହସିଲଦାରଙ୍କ ବାସଭବନ ପାଖରୁ ଲକ୍ଷାଧିକ ଟଙ୍କାର ଶିଶୁ ଗଛ କଟା ହୋଇଗଲା। ଅଭିଯୋଗ ପରେ ଫରେଷ୍ଟର ମଲିକ ଘଟଣା ସ୍ଥଳରେ ପହଞ୍ଚତ୍ ତଦନ୍ତ ପରେ ଲକ୍ଷାଧିକ ଟଙ୍କାର ଶିଶୁ ଗଛ କୁଆଡେ ଗଲା ତାହାର ହିସାବ ମିଳିଲା ନାହିଁ । କିଏ ଏହି ଶିଶୁ ଗଛ କାଠ ନେଲା ତାହାର ହିସାବ ନା ଅଛି ବନ ବିଭାଗ ପାଖରେ ନା ଅଛି ରାଜସ୍ବ ବିଭାଗ ପାଖରେ। ସେହିଭଳି ଲକ୍ଷାଧିକ ଟଙ୍କାର ଶତାଧିକ ତାଳ ଗଛ କଟାକୁ ନେଇ ଜନସାଧାରଣ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଯଦି ଏହାର ଉପଯୁକ୍ତ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆ ନ ଯାଏ ତାହା ହେଲ ପରିବେଶବିତ୍ ବିଭୂତି ଭୂଷଣ ତ୍ରିପାଠୀଙ୍କ ସମେତ ଅଭିଯୋଗକାରୀ ଗ୍ରାମବାସୀ ରାଜରାସ୍ତାକୁ ଓହ୍ଲାଇବା ସହ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି। ଏ ସମ୍ପର୍କରେ ରାଜନଗର ରେଞ୍ଜର ଚିତରଞ୍ଜନ ବେଉରାଙ୍କୁ ପଚାରିବାରୁ ପଟ୍ଟାମୁଣ୍ଡାଇ ତହସିଲ ଏରିଆ ଭିତରେ ଗଛ ସବୁ ରହୁଛି। ତେଣୁ ତହସିଲ ପ୍ରଶାସନ ଯାହା କିଛି ପଦକ୍ଷେପ ନେବ ବୋଲି ସେ କହିଛନ୍ତି।