ଇସ୍ତାନବୁଲ୍,୬।୨: ତୁର୍କୀ ଓ ସିରିଆରେ ରବିବାର ବିଳମ୍ବିତ ରାତିରେ ବଡ଼ ଧରଣର ଭୂକମ୍ପ ଅନୁଭୂତ ହୋଇଛି। ଲୋକମାନେ ଶୋଇଥିବା ସମୟରେ ଭୂକମ୍ପ ହେବାରୁ ୨,୩୦୦ରୁ ଊର୍ଦ୍ଧ୍ୱ ପ୍ରାଣ ହରାଇବା ସହ ୧୦ହଜାରରୁ ଉର୍ଦ୍ଧ୍ୱ ଆହତ ହୋଇଛନ୍ତି। ଆହତଙ୍କ ମଧ୍ୟରୁ କେତେକଙ୍କ ଅବସ୍ଥା ଗୁରୁତର ରହିଛି। ଏଥିସହ ଭଗ୍ନାବଶେଷ ତଳୁ ଉଦ୍ଧାର କାର୍ଯ୍ୟ ଜାରି ରହିଛି। ଭଗ୍ନାବଶେଷ ତଳେ ଶହ ଶହ ଲୋକ ରହିଯାଇଥିବା ବିଶ୍ୱାସ କରାଯାଉଛି। ତେଣୁ ମୃତ୍ୟୁସଂଖ୍ୟା ବହୁତ ବଢ଼ିବା ଆଶଙ୍କା ରହିଛି। ଭୂକମ୍ପରେ ବହୁ ଘର ମାଟିରେ ମିଶିଯାଇଛି। ରାତିରେ ହୋଇଥିବା ଭୂକମ୍ପର ତୀବ୍ରତା ରିକ୍ଟର ସ୍କେଲ୍ରେ ୭.୮ ରହିଥିଲା, ଯାହାର କମ୍ପନ ଗ୍ରୀନ୍ଲାଣ୍ଡ ଏବଂ ସାଇପ୍ରସ୍ ଦ୍ୱୀପ ପର୍ଯ୍ୟନ୍ତ ଅନୁଭୂତ ହୋଇଥିଲା। ଏହାର କିଛି ଘଣ୍ଟା ପରେ ଆଉ ଏକ ଭୂକମ୍ପ ହେବାରୁ ତୁର୍କୀର କେତେକ ବୃହତ୍ ସହର ଧ୍ୱଂସ ପାଇଛି, ଯେଉଁଠି ଘଞ୍ଚ ଜନବସତି ରହିଥିଲା। ସିରିଆ ଗୃହଯୁଦ୍ଧ ସମୟରେ ଲକ୍ଷ ଲକ୍ଷ ଲୋକ ପଳାଇଆସି ଉକ୍ତ ଅଞ୍ଚଳରେ ରହିଥିଲେ। ସିରିଆର ବିଦ୍ରୋହୀ ଏବଂ ସରକାରଙ୍କ ନିୟନ୍ତ୍ରଣରେ ଥିବା ଅଞ୍ଚଳରେ ଅନୂ୍ୟନ ୭୮୩ ଜଣଙ୍କ ମୃତ୍ୟୁ ଘଟିଛି। ତୁର୍କୀରେ ଭୂକମ୍ପ ଜନିତ ମୃତ୍ୟୁସଂଖ୍ୟା ୧୦୦୦ରୁ ଊର୍ଦ୍ଧ୍ୱ ପହଞ୍ଚିଥିବା ବେଳେ ୩ ହଜାରରୁ ଊର୍ଦ୍ଧ୍ୱ ଆହତ ହୋଇଥିବା ଏହାର ରାଷ୍ଟ୍ରପତି ରେସିପ୍ ତାୟିପ ଏର୍ଡୋଗାନ୍ ସୂଚନା ଦେଇଛନ୍ତି। ଦୁଇ ଦଶନ୍ଧି ମଧ୍ୟରେ ଏହା ସବୁଠୁ ଶକ୍ତିଶାଳୀ ଭୂକମ୍ପ ବୋଲି ସେ କହିଛନ୍ତି। ଅନ୍ୟପଟେ ତୁର୍କୀର ଏକ ହସ୍ପିଟାଲ ଭୁଶୁଡ଼ି ପଡ଼ିବାରୁ ନବଜାତ ଶିଶୁଙ୍କ ସମେତ ରୋଗୀମାନଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି। ତୁର୍କୀ କର୍ତ୍ତୃପକ୍ଷ ଲେବଲ୍ ୪ ସତର୍କ ସୂଚନା ଜାରି କରିବା ସହ ଅନ୍ତର୍ଜାତୀୟ ସହାୟତା ପାଇଁ ନିବେଦନ କରିଛନ୍ତି।