ଓ୍ବାଶିଂଟନ, ୧୬।୧(ପି.ଟି.): ଆମେରିକା ସଂସଦ ଭବନ କ୍ୟାପିଟୋଲ ବିଲ୍ଡିଂ ଦଙ୍ଗା ଘଟଣାରେ ସୁରକ୍ଷା ସଂସ୍ଥା ଏପର୍ଯ୍ୟନ୍ତ ଶତାଧିକ ଲୋକଙ୍କୁ ଗିରଫ କଲାଣି। ୨୦ରେ ନବନିର୍ବାଚିତ ରାଷ୍ଟ୍ରପତି ଜୋ ବାଇଡେନ୍ ଶପଥ ନେବାକୁ ଯାଉଥିବାବେଳେ ସୁରକ୍ଷା ବ୍ୟବସ୍ଥାର ଅନୁଧ୍ୟାନ କରାଯାଉଥିବା ଏଫ୍ବିଆଇ ନିର୍ଦ୍ଦେଶକ ଖ୍ରୀଷ୍ଟୋଫର କହିଛନ୍ତି।
ବାଇଡେନ୍ଙ୍କ ବିଜୟକୁ ଆନୁଷ୍ଠାନିକ ସ୍ବୀକୃତି ଦେବା ଲାଗି କ୍ୟାପିଟୋଲ ବିଲ୍ଡିଂରେ କଂଗ୍ରେସର ମିଳିତ ଅଧିବେଶନ ଚାଲିଥିବାବେଳେ ଏହାକୁ ଭଣ୍ଡୁର କରିବା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ହଜାର ହଜାର ସମର୍ଥକ ସେଠାରେ ଧସେଇ ପଶି ଦଙ୍ଗା ସୃଷ୍ଟି କରିଥିଲେ। ଏହି ହିଂସାକାଣ୍ଡରେ ୫ ଜଣଙ୍କ ମୃତ୍ୟୁ ହେବା ସହ ଅନେକ ଆହତ ହୋଇଥିଲେ। କ୍ୟାପିଟୋଲ ବିଲ୍ଡିଂକୁ ଦଖଲ କରିବା ଆପରାଧିକ କାର୍ଯ୍ୟରେ ସମ୍ପୃକ୍ତି ଅଭିଯୋଗରେ ୧୦୦ରୁ ଊର୍ଦ୍ଧ୍ୱ ଲୋକଙ୍କୁ ଗିରଫ କରାଯାଇଛି। ତଦନ୍ତ ଜାରି ରହିଥିବାରୁ ଆହୁରି ଅନେକ ଗିରଫ ହୋଇପାରନ୍ତି। ବାଇଡେନ୍ଙ୍କ ଶପଥ ପୂର୍ବରୁ ଅନ୍ଲାଇନ ଚାଟରଙ୍କୁ ନେଇ ଚିନ୍ତା ବଢ଼ୁଛି। କ୍ୟାପିଟୋଲ ହିଲ୍ ହିଂସା ପୁଣିଥରେ ସଂଘଟିତ କରିବା ପାଇଁ କେତେଜଣ ଯୋଜନା କରୁଥିବାରୁ ଏହା ଉପରେ ସୁରକ୍ଷା ସଂସ୍ଥାଗୁଡ଼ିକ କଡ଼ା ନଜର ରଖିଛନ୍ତି। ୨୦୦ରୁ ଅଧିକ ସନ୍ଦିଗ୍ଧଙ୍କୁ ଚିହ୍ନଟ କରାଗଲାଣି। ଦଙ୍ଗାକାରୀଙ୍କୁ ଚିହ୍ନଟ ଲାଗି ଏଫ୍ବିଆଇକୁ ୧,୪୦,୦୦୦ ଟିପ୍ ମିଳିଥିବା ନ୍ୟାୟ ବିଭାଗ ପକ୍ଷରୁ କୁହାଯାଇଛି। ଏଫବିଆଇର ପଦକ୍ଷେପକୁ ଉପରାଷ୍ଟ୍ରପତି ମାଇକ୍ ପେନ୍ସ ପ୍ରଶଂସା କରିଛନ୍ତି।
ବାଇଡେନ୍ଙ୍କ ଶପଥ ଉତ୍ସବରେ ଲେଡି ଗାଗା, ଜେନିଫର ପ୍ରଦର୍ଶନ କରିବେ
ଆମେରିକାର ୪୬ତମ ରାଷ୍ଟ୍ରପତି ଭାବେ ଜୋ ବାଇଡେନ୍ ୨୦ ତାରିଖରେ ଶପଥ ନେବାକୁ ଯାଉଥିବାବେଳେ ଏହି କାର୍ଯ୍ୟକ୍ରମରେ ବିଶିଷ୍ଟ ପପ୍ ଗାୟିକା ଜେନିଫର ଲୋପେଜ୍ ଏବଂ ଲେଡି ଗାଗା ଯୋଗଦେବେ। ଗାଗା ଜାତୀୟ ସଙ୍ଗୀତ ଗାନ କରିବାକୁ ଥିବାବେଳେ ଲୋପେଜ୍ କ୍ୟାପିଟୋଲର ଓ୍ବେଷ୍ଟ ଫ୍ରଣ୍ଟରେ ସଙ୍ଗୀତ ପରିବେଷଣ କରିବେ। ୭୮ ବର୍ଷୀୟ ବାଇଡେନ୍ଙ୍କ ସହ ଉପରାଷ୍ଟ୍ରପତି ଭାବେ କମଲା ହାରିସ୍ (୫୬) ମଧ୍ୟ ଏହି ଉତ୍ସବରେ ଶପଥ ଗ୍ରହଣ କରିବେ। ତେବେ କରୋନା ମହାମାରୀ ଓ ସୁରକ୍ଷାଗତ କାରଣକୁ ନେଇ ଉତ୍ସବକୁ କାଟଛାଣ୍ଟ କରାଯାଇଛି। ଶପଥ ଗ୍ରହଣ ସହ ଜଡ଼ିତ ଅନ୍ୟାନ୍ୟ କାର୍ଯ୍ୟକ୍ରମ ଭର୍ଚୁଆଲି କରାଯିବ।
