ବିଷମକଟକ,୧୭।୧(ଡି.ଏନ୍.ଏ.) ଖରିଫ ଋତୁରେ ଚାଷୀ ଜମିରେ ଫଳାଇଥିବା ଧାନ ମଣ୍ଡିରେ ବିକ୍ରିକରି ଭଲ ଟଙ୍କା ପାଇବାର ଆଶା ରଖିଥିଲେ। ଅଦିନିଆ ବର୍ଷା ଚାଷୀଙ୍କ ଆଶାକୁ ମାଟିରେ ମିଶାଇ ଦେଇଛି। ମଙ୍ଗଳବାରଠାରୁ ହୋଇଥିବା ଲଗାଣ ବର୍ଷାରେ ଜମିରେ ପଡ଼ିଥିବା ଧାନଫସଲ ଭିଜି ଗଜା ହୋଇଛି। ରାୟଗଡ଼ା ଜିଲା ବିଷମକଟକ ବ୍ଲକରୁ ଚାଷୀଙ୍କଠାରୁ ଏଭଳି ଅଭିଯୋଗ ଆସିଛି।
ପାଗ ଶୁଖିଲା ଦେଖି ଅନେକ ଚାଷୀ ଧାନ ଅମଳ କରି ଖଳାରେ ରଖିଛନ୍ତି। ଏହା ମଧ୍ୟରେ ବର୍ଷା ହୋଇଯିବାରୁ ଧାନ ଘୋଡ଼ାଇବା ସମ୍ଭବ ହୋଇ ନ ଥିଲା। ଫଳରେ ଧାନ ଭିଜି ଗଜା ହୋଇଯିବା ସହ ରଙ୍ଗ ବଦଳିଯାଇଛି। ଯେଉଁ ଚାଷୀ ଧାନ କାଟିଛନ୍ତି, ଜମିରେ ପାଣି ଭର୍ତ୍ତି ହୋଇଯିବାରୁ ଧାନ ପାଣିରେ ଭାସୁଥିବା ଅଭିଯୋଗ ହୋଇଛି। ଏବେ ଭିଜା ଧାନ କ’ଣ କରିବେ ସେହି ଚିନ୍ତାରେ ପଡ଼ିଛନ୍ତି ଚାଷୀ। ଶୁକ୍ରବାର ବିଷମକଟକ ବ୍ଲକ ଚାଟିକଣା, ଡାକୁଲୁଗୁଡ଼ା, ଡୁକୁମ, ବିଷମକଟକ, ହାଟ ମୁନିଗୁଡ଼ା ଭଳି ଅନେକ ପଞ୍ଚାୟତର ଚାଷୀ ତହସିଲଦାର ଶୁଭେନ୍ଦୁ ଜେନାଙ୍କୁ ସାକ୍ଷାତ୍ କରି କ୍ଷୟକ୍ଷତି ବିଷୟରେ ଅବଗତ କରିଥିଲେ। ତେବେ ଚାଷୀଙ୍କ ସମସ୍ୟା ଶୁଣି ସମସ୍ତ ଚାଷୀ ବ୍ୟକ୍ତିଗତ ଭାବେ ନିଜ କ୍ଷୟକ୍ଷତି ସଂକ୍ରାନ୍ତରେ ଲିଖିତଭାବେ ଜଣାଇବାକୁ ତହସିଲଦାର କହିଥିଲେ। କ୍ଷେତ୍ର ଅଧିକାରୀଙ୍କ ଦ୍ୱାରା ତଦନ୍ତ କରାଯିବା ପରେ କ୍ଷୟକ୍ଷତିର ଆକଳନ କରି ଉପରିସ୍ଥ ଅଧିକାରୀଙ୍କୁ ଜଣାଇବା ନିମନ୍ତେ ସେ ପ୍ରତିଶ୍ରୁତି ଦେଇଥିଲେ। ଅନ୍ୟପକ୍ଷରେ ସରକାର ଚାଷୀଙ୍କୁ ସାହାଯ୍ୟ କରିବା ପାଇଁ ବିଭିନ୍ନ ସ୍ଥାନରେ ଗୋଦାମ ନିର୍ମାଣ କରିଛନ୍ତି। ବିଷମକଟକ ବ୍ଲକର କେତୋଟି ନିର୍ଦ୍ଦିଷ୍ଟ ସ୍ଥାନରେ ଗୋଦାମ ରହିଛି। ଚାଷୀ ସେଠି ଧାନ ରଖିବା ସମ୍ଭବ ନୁହେଁ। ତେଣୁ ମିଲର୍ସମାନେ ଚାଷୀଙ୍କ ଅମଳ ଧାନକୁ ବର୍ଷା ସମୟରେ ନିଜ ଗୋଦାମ ଗୃହରେ ରଖି ସାହାଯ୍ୟ କରୁଥିଲେ। ଏବେ ଚାଷୀଙ୍କ ଧାନ ରଖିବାକୁ ଏମ୍ଆଇ ଦେବଦତ୍ତ ଲେଙ୍କା ମିଲର୍ସଙ୍କୁ ସମ୍ପୂର୍ଣ୍ଣ ମନା କରିଥିବା ଜଣାପଡ଼ିଛି। ସରକାରୀ ନିୟମ ନ ଥିବା ସେ କହିଛନ୍ତି। ଫଳରେ ଚାଷୀ ସୁରକ୍ଷିତ ସ୍ଥାନରେ ଧାନ ରଖି ନ ପାରି ନଷ୍ଟ ହୋଇଥିବା ଜଣାପଡ଼ିଛି। ଅନେକ ଚାଷୀଙ୍କ ଧାନ ମଣ୍ଡିରେ ବିକ୍ରି ପାଇଁ ଟୋକନ ଫେବୃୟାରୀ, ମାର୍ଚ୍ଚ ପାଇଁ ଆସିଛି। ଏବେ ଚାଷୀ ଧାନ କେଉଁଠି ରଖିବେ ଚିନ୍ତାର ବିଷୟ ହୋଇଥିବା ଅଞ୍ଚଳର ଜି. ସୁବାରାଓ, ବାବୁଲା ପୂଜାରୀ, ଜି. ପ୍ରଦୀପ ଗୁଡୁଲା, କ୍ରିଷ୍ଣା ରାଓଙ୍କ ସମେତ ଅନେକ ଚାଷୀ ପ୍ରକାଶ କରିଛନ୍ତି।