କୋଟ୍ଟୟମ୍, ୭।୯: କେରଳର କୋଟ୍ଟୟମ୍ରେ ଥିବା ଓ୍ବାଇକୋମ୍ ମହାଦେବ ମନ୍ଦିରରେ ଭୋକିଲାଙ୍କୁ ଦୁଇବେଳା ଭୋଜନ ଦେବାର ପରମ୍ପରା ପୁରାତନ କାଳରୁ ପ୍ରଚଳିତ। ଏଠାରେ ପ୍ରତିଦିନ ସକାଳେ ଏବଂ ସନ୍ଧ୍ୟାରେ ୨ ହଜାର ଲୋକଙ୍କ ପାଇଁ ଭୋଜନ ରନ୍ଧା ଯାଇଥାଏ। ସ୍ଥାନୀୟ ମୁତ୍ତାସ ନାମପୁଥୁରି ସମ୍ପ୍ରଦାୟର ୧୦୮ ପରିବାର ଏଭଳି ନିଆରା ପରମ୍ପରା ପାଳନ କରିଥାନ୍ତି। ପିଢ଼ି ପରେ ପିଢ଼ି ଏହି ପରିବାର ଏହା କରିଆସୁଛନ୍ତି। ମନ୍ଦିରରେ ମହାଦେବଙ୍କୁ ଓ୍ବେକୟପ୍ପନ ଏବଂ ଅନ୍ନଦାତା ପ୍ରଭୁ ବୋଲି ଶ୍ରଦ୍ଧାଳୁ କହିଥାନ୍ତି। ମନ୍ଦିରରେ ଜଳନ୍ତା କୋଇଲାରେ ମହାଦେବଙ୍କୁ ପୂଜା କରାଯାଇଥାଏ। ଉତ୍ସବ ସମୟରେ ଏଠାରେ ଭୋଜନ ପାଇଁ ୩୬ ଶହ କିଲୋଗ୍ରାମ୍ ଚାଉଳର ଅନ୍ନ ପ୍ରସ୍ତୁତ ହୋଇଥାଏ। ପରିବା କାଟିବା କାର୍ଯ୍ୟ ନାୟାର ସମ୍ପ୍ରଦାୟର ୧୬ ପରିବାର କରିଥାନ୍ତି। ରାତିରେ ମନ୍ଦିର କବାଟ ବନ୍ଦ ପୂର୍ବରୁ ପୂଜକ ବାହାରକୁ ଆସି କେହି ଭୋକିଲା ଅଛନ୍ତି ବୋଲି ବଡ଼ ପାଟିରେ ପଚାରି ଥାନ୍ତି। କୌଣସି ଉତ୍ତର ନ ମିଳିଲେ କବାଟ ବନ୍ଦ ହୋଇଥାଏ ବୋଲି ମନ୍ଦିର ପୂଜକ ସୁରେଶ ପୋଟ୍ଟି କୁହନ୍ତି। ଲକ୍ଡାଉନ୍ ସମୟରେ ମଧ୍ୟ ଏଠାରେ ଭୋଜନ କାର୍ଯ୍ୟ ଜାରି ରହିଥିବା ସେ କହିଛନ୍ତି।
