ସାନ୍ ଫ୍ରାନ୍ସସିସ୍କୋ,୪।୧୨(ପି.ଟି./ଆଇଏଏନ୍ଏସ୍): ବିଶ୍ୱର ସବୁଠୁ ଧନୀ ତଥା ଟୁଇଟର ସିଇଓ ଏଲନ୍ ମସ୍କ ଭାରତୀୟ ବଂଶୋଦ୍ଭବ ଡେମୋକ୍ରାଟ୍ ରୋ ଖାନ୍ନାଙ୍କୁ ପ୍ରଶଂସା କରି ସୋସିଆଲ ମିଡିଆ ସାଇଟ୍ର କେତେକ ଭିତିରି ଫାଇଲକୁ ଜାରି କରିଛନ୍ତି। ୨୦୨୦ ଆମେରିକା ରାଷ୍ଟ୍ରପତି ନିର୍ବାଚନ ଅବ୍ୟବହିତ ପୂର୍ବରୁ ଡେମୋକ୍ରାଟିକ୍ ପାର୍ଟି ପ୍ରାର୍ଥୀ ଜୋ ବାଇଡେନ୍ ଏବଂ ତାଙ୍କ ପ୍ରଥମ ସ୍ତ୍ରୀ ନେଲ୍ଲିଆ ହଣ୍ଟରଙ୍କ ପୁଅ ହଣ୍ଟର ବାଇଡେନ୍ଙ୍କ ଲାପ୍ଟପ୍ ଷ୍ଟୋରିର ସେନ୍ସରଶିପ୍ ସମ୍ପର୍କରେ ଅକ୍ଟୋବର ୧୪ରେ ‘ନ୍ୟୁୟର୍କ ପୋଷ୍ଟ’ରେ ‘ବାଇଡେନ୍ ସିକ୍ରେଟ୍ ଇମେଲ୍ସ’ ଶୀର୍ଷକ ଏକ ରିପୋର୍ଟ ପ୍ରକାଶ ପାଇଥିଲା। ସାମ୍ବାଦିକ ତଥା ଲେଖକ ମାଟ୍ଟ ତଇବ୍ବି ଟୁଇଟର ଫାଇଲ୍ସ ଉପରୁ ପରଦା ହଟାଇବାକୁ ଯାଇ ଶୁକ୍ରବାର ରାତିରେ ଟୁଇଟରରେ ଅନେକ ପୋଷ୍ଟ ଶେୟାର କରିଛନ୍ତି। ମସ୍କ ତଇବ୍ବିଙ୍କ ଆକାଉଣ୍ଟର ଏକ ଲିଙ୍କ୍କୁ ଟୁଇଟ୍ କରିଛନ୍ତି। ଏହି ଷ୍ଟୋରିକୁ ଚପାଇବା ପାଇଁ ମାଇକ୍ରୋବ୍ଲଗିଂ ପ୍ଲାଟ୍ଫର୍ମ ଜୋ ବାଇଡେନ୍ଙ୍କ ଟିମ୍ଠାରୁ କିପରି ଅର୍ଡର ନେଇଥିଲା ତାହା ଉକ୍ତ ଫାଇଲଗୁଡ଼ିକ ଜରିଆରେ ମସ୍କ ପ୍ରଘଟ କରିଛନ୍ତି।
ତଇବ୍ବି ନିଜ ପୋଷ୍ଟରେ ଉଲ୍ଲେଖ କରିଛନ୍ତି ଯେ, ପୂର୍ବ ପ୍ରକାଶିତ ରିପୋର୍ଟ ହଣ୍ଟରଙ୍କ ପରିତ୍ୟକ୍ତ ଲାପ୍ଟପ୍ ଉପରେ ପର୍ଯ୍ୟବସିତ। ଏହାକୁ ଚପାଇଦେବା ପାଇଁ ଟୁଇଟର ଅସାଧାରଣ ପଦକ୍ଷେପ ନେଇଥିଲା। ଏଥିସହ ଏସମ୍ପର୍କିତ ଲିଙ୍କ୍ ଓ ପୋଷ୍ଟିଂଗୁଡ଼ିକୁ ଅସୁରକ୍ଷିତ କହି ହଟାଇଦେଇଥିଲା। ଏପରି କି ଡାଇରେକ୍ଟ ମେସେଜ୍ ଜରିଆରେ ଏହାର ଟ୍ରାନ୍ସମିଶନକୁ ମଧ୍ୟ ବ୍ଲକ୍ କରିଦେଇଥିଲା। ଚାଇଲ୍ଡ ପର୍ନୋଗ୍ରାଫି ଭଳି ଅତି ସମ୍ବେଦନଶୀଳ ମାମଲାରେ ଏହି ଟୁଲ୍ ବ୍ୟବହୃତ ହୋଇଥାଏ। ଟୁଇଟର ମ୍ୟାନେଜ୍ମେଣ୍ଟ ଏପରି କରିବା ଯୋଗୁ ପବ୍ଲିକ୍ ପଲିସି ଏକ୍ଜିକ୍ୟୁଟିଭ୍ କ୍ୟାରୋଲିନ୍ ଷ୍ଟ୍ରୋମ୍ ଡବ୍ଲ୍ୟୁଟିଏଫ୍ କ୍ୱେରି ପଠାଇଥିଲେ। ଏହାକୁ ନେଇ କମ୍ପାନୀର ଅନେକ କର୍ମଚାରୀ ଚିନ୍ତିତ ହୋଇପଡ଼ିଥିଲେ। ଷ୍ଟ୍ରୋମ୍ଙ୍କ ପ୍ରଶ୍ନର ଉତ୍ତର ଆସିଥିଲା, ଲାପ୍ଟପ୍ ଷ୍ଟୋରି କମ୍ପାନୀର ‘ହ୍ୟାକ୍ଡ ମ୍ୟାଟେରିଆଲ୍ସ’ ପଲିସିକୁ ଉଲ୍ଲଂଘନ କରୁଥିବାରୁ ତାକୁ ହଟାଇଦିଆଯାଇଛି। ତଇବିଙ୍କ ମତରେ ତତ୍କାଳୀନ ସିଇଓ ଜ୍ୟାକ୍ ଡୋର୍ସିଙ୍କ ଅଜ୍ଞାତରେ ଏହି ନିଷ୍ପତ୍ତି ଟୁଇଟରର ଉଚ୍ଚ ପଦାଧିକାରୀମାନେ ନେଇଥିଲେ। ସେହି ପଦାଧିକାରୀମାନଙ୍କୁ ସହଯୋଗ କରିବାରେ ଭାରତୀୟ ବଂଶୋଦ୍ଭବ ହେଡ୍ ଅଫ୍ ଲିଗାଲ, ପଲିସି ଆଣ୍ଡ ଟ୍ରଷ୍ଟ ବିଜୟା ଗଡ୍ଡେ ବଡ଼ ଭୂମିକା ନେଇଥିଲେ। ସେତେବେଳେ ଟୁଇଟର ହ୍ୟାକ୍ ହୋଇଯାଇଥିବାରୁ ଏପରି ଘଟିଥିବା ମ୍ୟାନେଜ୍ମେଣ୍ଟ ସଫେଇ ଦେଇଥିଲା। ତଇବ୍ବିଙ୍କ ମତରେ ସିଲିକନ୍ ଭ୍ୟାଲିରୁ ପ୍ରତିନିଧିକୁ ଯାଇଥିବା ଭାରତୀୟ ବଂଶୋଦ୍ଭବ ଡେମୋକ୍ରାଟିକ୍ କଂଗ୍ରେସମ୍ୟାନ୍ ରୋ ଖାନ୍ନା ବିଜୟାଙ୍କୁ ଏହି ବିଭ୍ରାଟ ଉପରେ ତାଗିଦ କରିଥିଲେ। ଏହା ଉପରେ ମସ୍କ ଟୁଇଟ୍ କରିଛନ୍ତି, ‘ରୋ ଖାନ୍ନା ମହାନ୍’। ଟୁଇଟର ଫାଇଲ୍ସର ଦ୍ୱିତୀୟ ଏପିସୋଡ୍ ଆସନ୍ତାକାଲି ପ୍ରକାଶ ପାଇବ ବୋଲି ମସ୍କ ପୋଷ୍ଟ କରିଛନ୍ତି।