ସଇଁତଲା/ବଲାଙ୍ଗୀର/ଟିଟିଲଗଡ, ୧୯ା୧୦(ରାଖାଲ ପ୍ରସାଦ ଶତପଥି/ବୀରେନ୍ଦ୍ର କୁମାର ଝାଙ୍କର/ଶରତ ମିଶ୍ର): ବଲାଙ୍ଗୀର ଜିଲା ସଇଁତଳା ଥାନା ପୋଲିସ ନିଖୋଜ ଜବଦୁ ବଗର୍ତ୍ତୀ ମୃତ୍ୟୁ ଘଟଣାର ପର୍ଦ୍ଦାଫାଶ କରିଛି। ଜଙ୍ଗଲ ଭିତରରେ ଶିକାରୀ ଲଗାଇଥିବା ବାର୍ହା ଫାଶରେ ପଡି ଜବଦୁଙ୍କ ମୃତ୍ୟୁ ଘଟିଥିବା ପ୍ରାଥମିକ ତଦନ୍ତରୁ ଜଣାପଡିଛି। ଘଟଣାଟି ସଇଁତଳା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ସଇଁତଳା ଥାନା କୁମ୍ଭାରୀ ଗ୍ରାମ ପଞ୍ଚାୟତ ଅଧୀନ ଡୁମେରମୁଣ୍ଡା ଗ୍ରାମର ଜବଦୁ ଜଙ୍ଗଲକୁ ଯାଇ ନିଖୋଜ ହୋଇଯାଇଥିବା ନେଇ ମଙ୍ଗଳବାର ତାଙ୍କ ସ୍ତ୍ରୀ ଡ଼ାଳିମ୍ବ ଥାନାରେ ଅଭିଯୋଗ କରିଥିଲେ। ଏପରିକି ଜବଦୁ ଏବଂ ତାଙ୍କ ଜଣେ ସମ୍ପର୍କୀୟ ଗେଥଲ କଠାର ଜଙ୍ଗଲ ଯାଇଥିବା ଚର୍ଚ୍ଚାର ହୋଇଥିଲା। ଟିଟିଲାଗଡ଼ ଏସ୍ଡ଼ିପିଓ ଅଙ୍କିତା କୁମ୍ଭାର, ସଇଁତଳା ଥାନା ଅଧିକାରୀ ଅବନୀ କୁମାର ସାହୁଙ୍କ ନେତୃତ୍ୱରେ ପୋଲିସ ଏବଂ ସଇଁତଳା ରେଞ୍ଜ କର୍ମଚାରୀମାନେ ଜଙ୍ଗଲକୁ ଯାଇ ଖୋଜାଖୋଜି କରିଥିଲେ। ଖୋଜାଖୋଜି ପରେ ମଧ୍ୟ ମଙ୍ଗଳବାର ସୁଦ୍ଧା ଜବଦୁଙ୍କ କୌଣସି ଖୋଜ ଖବର ମିଳି ନ ଥିଲା। ବୁଧବାର ବଲାଙ୍ଗୀର ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ସହାୟତାରେ ପୋଲିସ ଖୋଜାଖୋଜି କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିଲା।
ବୁଧବାର ସନ୍ଧ୍ୟାରେ ସଇଁତଳା ରେଞ୍ଜ କର୍ମଚାରୀ ଓ ପୋଲିସ କୌଣସି ସୂତ୍ରରୁ ଖବର ପାଇ ଜଙ୍ଗଲ ଭିତରେ ଏକ ବୁଦା ମୂଳରୁ ଜବଦୁଙ୍କ ମୃତଦେହ ଥିବା ଖବର ପାଇଥିଲା। ପରେ ପୋଲିସ ସେଠାକୁ ଯାଇ ମୃତଦେହ ଜବତ କରାଯାଇଥିଲା। ବାର୍ହା ଶିକାର ପାଇଁ ବିଦ୍ୟୁତ୍ ତାର ଲଗାଇ ବସାଯାଇଥିବା ଫାଶରେ ପଡି ଜବଦୁଙ୍କ ମୃତ୍ୟୁ ହୋଇଥିଲା। ପରେ ଶିକାରୀମାନେ ଧରା ପଡିଯିବା ଭୟରେ ତାଙ୍କ ମୃତଦେହ ଫାଶରୁ ଉଠାଇ ଜଙ୍ଗଲ ଭିତର ବୁଦାମୂଳରେ ଲୁଚାଇ ଫେରାର ହୋଇଯାଇଥିବା ପୋଲିସ ତଦନ୍ତ ପରେ ଜାଣିବାକୁ ପାଇଥିଲା।
ଗୁରୁବାର ଟିଟିଲାଗଡ଼ ହସ୍ପିଟାଲରେ ଜବଦୁଙ୍କ ମୃତଦେହ ବ୍ୟବଚ୍ଛେଦ କରାଯାଇଥିଲା। ୨୦୨୧ ମେ ୨୨ ତାରିଖରେ ମୃତ ଜବଦୁ କରମତଲା ଫରେଷ୍ଟର ସୁଧୀର ଜେନାଙ୍କ ସହ ରାତ୍ର ପାଟ୍ରୋଲିଂ କରୁଥିବା ପାରା ଫରେଷ୍ଟ ଗାର୍ଡ଼ ଯୁଗେଶ୍ୱର ଓରଫ ଜଟିଆ ବୁଡେକଙ୍କୁ ଗୁଳି କରିଥିଲେ। ଘଟଣାସ୍ଥଳରେ ଜଟିଆଙ୍କ ମୃତ୍ୟୁ ଘଟିଥିଲା । ପୋଲିସ ଜବଦୁଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଗତ କିଛି ମାସ ତଳେ ସେ ଜାମିନରେ ଜେଲରୁ ବାହାରି ଥିଲେ। ଘଟଣାରେ ଜଣକୁ ଅଟକ ରଖି ପୋଲିସ ତଦନ୍ତ ଜାରି ରଖିଥିବା ତଦନ୍ତକାରୀ ଅଧିକାରୀ ଆଲୋକ ଭୋଇ କହିଛନ୍ତି।