ଦେବଗଡ଼,୧୧ା୪(ଶଶାଙ୍କ ଶେଖର ଝାଙ୍କର): ବାରକୋଟ ବନାଞ୍ଚଳ ବଳମ ଫରେଷ୍ଟ ସେକ୍ସନ ଅନ୍ତର୍ଗତ ପଞ୍ଚମହଲା ଗ୍ରାମ ନିକଟ ଖସଡ଼ା ଜଙ୍ଗଲରେ ଏକ ବାର୍ହା ଶିକାର କରାଯାଇଛି। ଏହି ଘଟଣାରେ ୪ ଜଣଙ୍କୁ ଅଟକ ରଖି ବନବିଭାଗ ଅଧିକ ପଚରାଉଚରା କରୁଥିବା ଜଣାପଡ଼ିଛି। ଘୁରୁଡୁଖମଣ ଗ୍ରାମର ୨ ଜଣ, ଚକ୍ରପାଲି ଗ୍ରାମର ଜଣେ ଏବଂ ଘୁରୁଡୁଖମଣ ଗ୍ରାମରେ ରହୁଥିବା କେନ୍ଦୁଝର ଜିଲାର ଜଣେ ବ୍ୟକ୍ତି ଅଟକ ଥିବା ଜଣାପଡ଼ିଛି।
ସୂଚନାନୁଯାୟୀ ଉକ୍ତ ଖସଡ଼ା ଜଙ୍ଗଲରେ ଏକ ବାର୍ହା ପାଣି ପିଇବାକୁ ଆସିଥିବା ବେଳେ ପୂର୍ବରୁ ସେଠାରେ ଛପି ରହିଥିବା କେତେ ଜଣ ଶିକାରୀ ଶିକାର କରିଥିଲେ। ଏଥିସହ ୪ ଜଣ ବ୍ୟକ୍ତି ମୃତ ବାର୍ହାକୁ ଶିକାର କରି ଆଣୁଥିବା ବେଳେ ସମ୍ପୃକ୍ତ ଅଞ୍ଚଳରେ ପାଟ୍ରୋଲିଂ କରୁଥିବା ବନବିଭାଗ କର୍ମଚାରୀ ବିଶ୍ୱସ୍ତ ସୂତ୍ରରୁ ସୂଚନା ପାଇ ପଞ୍ଚମହଲା ପତ୍ରଫଡ଼ି ନିକଟରେ ଗୁରୁବାର ସନ୍ଧ୍ୟାରେ ଚଢ଼ାଉ କରିଥିଲେ। ଚଢ଼ାଉବେଳେ ମୃତ ବାର୍ହା ଜବତ କରିବା ସହିତ ଘଟଣାସ୍ଥଳରୁ ୪ ଜଣକୁ କାବୁ କରିଥିଲେ। ସେମାନଙ୍କୁ ବାରକୋଟ ବନାଞ୍ଚଳରେ ଅଟକ ରଖି ଅଧିକ ପଚରାଉଚରା କରାଯାଉଛି। ଆସନ୍ତାକାଲି ବାର୍ହାର ବ୍ୟବଚ୍ଛେଦ ପରେ ପ୍ରକୃତ ଘଟଣା ସାମ୍ନାକୁ ଆସିବ ଏବଂ ଏହି ଘଟଣାରେ ଯେଉଁମାନେ ସାମିଲ ଅଛନ୍ତି ତାଙ୍କୁ ଗିରଫ କରି କୋର୍ଟଚାଲାଣ କରାଯିବ ବୋଲି ଦେବଗଡ଼ ବନଖଣ୍ଡ ଅଧିକାରୀ ମଗର ଧାନାଜି ରାଓସୋ ସୂଚନା ଦେଇଛନ୍ତି।
