ଢେଙ୍କାନାଳ ଅଫିସ, ୧୪।୨: ଗୁପ୍ତରେ ଚାଲିଥିଲା ଚୋରା ବନ୍ଧୁକ ତିଆରି ୟୁନିଟ୍। ଶସ୍ତାରେ ମିଳୁଥିବାରୁ ଏହାକୁ କିଣି ବନ୍ୟପ୍ରାଣୀ ଶିକାର କରୁଥିଲେ ଶିକାରୀ। ଢେଙ୍କାନାଳ ଜିଲା ହିନ୍ଦୋଳ ରେଞ୍ଜ୍ ବାଲିମୀ ଥାନା ମାହାଲୁଣ୍ଡା ଗ୍ରାମରେ ଦୀର୍ଘଦିନ ଧରି ଚାଲିଥିବା ଏଭଳି ବେଆଇନ ଏକ ଦେଶୀ ବନ୍ଧୁକ ତିଆରି ୟୁନିଟ୍କୁ ରବିବାର ରାତିରେ ଠାବ କରିଛି ବନ ବିଭାଗ ଏବଂ ପୋଲିସର ମିଳିତ ଟିମ୍। ଏହି ଘଟଣାରେ ବିଶୁ ମହାରଣା (୬୦) ନାମକ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି। ତାଙ୍କ ନିକଟରୁ ଗୋଟିଏ ଦେଶୀ ବନ୍ଧୁକ, ୨୦ ଜୀବନ୍ତ ଗୁଳି, ବିସ୍ଫୋରକ, ପିସ୍ତଲ ଓ ବନ୍ଧୁକ ତିଆରି ସାମଗ୍ରୀ ଜବତ ହୋଇଛି।
ସୂଚନାଯୋଗ୍ୟ, ଶନିବାର ରାତିରେ ୩ଜଣ ଶିକାରୀ ଶିକାର କରିବା ଉଦ୍ଦେଶ୍ୟରେ କୋଇ ସଂରକ୍ଷିତ ଜଙ୍ଗଲରେ ପଶିଥିଲେ। କୌଣସି ସୂତ୍ରରୁ ସୂଚନା ପାଇ ବନ ବିଭାଗ ଅତର୍କିତ ଚଢ଼ାଉ କରି ସେମାନଙ୍କୁ ଗିରଫ କରିଥିଲା। ସେମାନଙ୍କଠାରୁ ବନ୍ଧୁକ ଏବଂ ଅଫୁଟା ଗୁଳି ଜବତ କରାଯାଇଥିଲା। ଜେରାବେଳେ ମାହାଲୁଣ୍ଡା ଗ୍ରାମରେ ଚୋରା ଦେଶୀ ବନ୍ଧୁକ ୟୁନିଟ୍ ଚାଲୁଥିବା ଜଣାପଡ଼ିଥିଲା। ଏ ସମ୍ପର୍କରେ ବନ ବିଭାଗ ବାଲିମୀ ପୋଲିସକୁ ସୂଚନା ଦେଇଥିଲା। ଉଭୟ ବିଭାଗ ପକ୍ଷରୁ ଯୋଜନାବଦ୍ଧ ଭାବେ ଉକ୍ତ ୟୁନିଟ୍ ଉପରେ ଚଢ଼ାଉ କରାଯାଇଥିଲା। ଏ ନେଇ ହିନ୍ଦୋଳ ଥାନାରେ ନଂ. ୪୦/୨୩ରେ ଆର୍ମସ୍ ଆକ୍ଟରେ ମାମଲା ରୁଜୁ କରାଯାଇଛି। ସୋମବାର ହିନ୍ଦୋଳଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଏସ୍ଡିପିଓ ଦୀପକ ଜେନା ଏହି ସୂଚନା ଦେଇଛନ୍ତି। ଅନ୍ୟପଟେ ଉକ୍ତ ୟୁନିଟ୍ରେ ପିସ୍ତଲ କାହିଁକି ତିଆରି ହେଉଥିଲା। ଏହାର ଚେର କୁଆଡ଼େ ଲମ୍ବିଛି ତାହା ସନ୍ଦେହ ଘେରରେ ରହିଛି। ଏହାକୁ ଜାଣିବା ଲାଗି ଅଧିକ ତଦନ୍ତ ଜାରି ରହିଥିବା ଏସ୍ଡିପିଓ କହିଛନ୍ତି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନି କୁହନ୍ତି, ଉକ୍ତ ୟୁନିଟ୍ରୁ ଆର୍ମସ୍ ଜବତ ହୋଇଥିଲା। ତେବେ ନିୟମ ଅନୁଯାୟୀ ଏଭଳି ମାରଣାସ୍ତ୍ର ଜବତ ହେଲେ ବନ ବିଭାଗ ମାମଲା ରୁଜୁ କରିପାରିବ ନାହିଁ। ତେଣୁ ଏ ସଂକ୍ରାନ୍ତରେ ପୋଲିସକୁ ଜଣାଇଥିଲୁ। ଏହାପରେ ମିଳିତ ଚଢ଼ାଉ କରାଯାଇଥିଲା ବୋଲି ଡିଏଫ୍ଓ ସୂଚନା ଦେଇଛନ୍ତି।