ଭୁବନେଶ୍ୱର,୫ା୩(ବ୍ୟୁରୋ)
୨୦୨୧-୨୨ ଆର୍ଥିକ ବର୍ଷ ଶେଷ ହେବାକୁ ବସିବସିଥିବାବେଳେ ଅନେକ ବିଭାଗ ବଜେଟ ଅର୍ଥ ଖର୍ଚ୍ଚ କରିବାରେ ସକ୍ଷମ ହୋଇନାହାନ୍ତି। ଏପରି କି କେତେକ ବିଭାଗ ୪୦% ଅର୍ଥ ବି ଖର୍ଚ୍ଚ କରିପାରିନାହାନ୍ତି। ବିଭାଗଗୁଡ଼ିକ ବକେୟା ଅର୍ଥ ଖର୍ଚ୍ଚ ପାଇଁ ଏବେ ତରବର ହେଉଛନ୍ତି। ମାର୍ଚ୍ଚ ଶେଷବେଳକୁ ଏକକାଳୀନ ଅର୍ଥ ଖର୍ଚ୍ଚ ପାଇଁ ଭିଡ଼ ନ କରିବାକୁ ଅର୍ଥ ବିଭାଗ ପରାମର୍ଶ ଦେଇଛି। ବିଭାଗର ପ୍ରମୁଖ ସଚିବ ବିଶାଳ କୁମାର ଦେବ ଏ ନେଇ ସମସ୍ତ ଅତିରିକ୍ତ ମୁଖ୍ୟ ସଚିବ, ପ୍ରମୁଖ ସଚିବ, ସଚିବ ଏବଂ ବିଭାଗୀୟ ମୁଖ୍ୟଙ୍କୁ ଚିଠି ଲେଖିଛନ୍ତି।
ଅର୍ଥ ମଞ୍ଜୁରୀ, ପାଣ୍ଠି ଫେରସ୍ତ, ଟ୍ରେଜେରିରେ ବିଲ୍ ଦାଖଲ ଏବଂ ପାଣ୍ଠି ମଞ୍ଜୁରୀ ପାଇଁ ବିଭାଗରେ ପ୍ରସ୍ତାବ ଦାଖଲ ଲାଗି ଅର୍ଥ ବିଭାଗ ପକ୍ଷରୁ ଧାର୍ଯ୍ୟ ସମୟସୀମା ସଂକ୍ରାନ୍ତରେ ପୂର୍ବରୁ ଚିଠି ଲେଖି ଅବଗତ କରାଯାଇଥିଲା। ପ୍ରଶାସନିକ ବିଭାଗଗୁଡ଼ିକୁ ମଧ୍ୟ ଏନେଇ ଅବଗତ କରାଯାଇଛି। ମାର୍ଚ୍ଚ ଶେଷଭାଗରେ ଟ୍ରେଜେରିରେ ଏକକାଳୀନ ବିଭିନ୍ନ ପ୍ରକାରର ବିଲ୍ ଦାଖଲରେ ସମସ୍ୟା ଦେଖାଦେବାରୁ ଅର୍ଥ ବିଭାଗ ନୂତନ ସମୟ ଧାର୍ଯ୍ୟ କରିଥିଲା। ମାର୍ଚ୍ଚ ୯ ପୂର୍ବରୁ ସମସ୍ତ ପ୍ରକାର ଯନ୍ତ୍ରପାତି ଖରିଦ, ସାଜସରଞ୍ଜାମ ଏବଂ ଯାନବାହନ ଖରିଦ, ଅଂଶଧନ ନିବେଶ, ସମବାୟ ସଂସ୍ଥା ସପକ୍ଷରେ ବଜେଟ ସହାୟତା, ଶିଳ୍ପସଂସ୍ଥା, ପିଏସ୍ୟୁଗୁଡ଼ିକରେ ଋଣ କିମ୍ବା ଅଂଶଧନ ନିବେଶ ଓ ସବ୍ସିଡି ଆଦି କାର୍ଯ୍ୟ ଶେଷ କରିବା ପାଇଁ କୁହାଯାଇଛି। ମାର୍ଚ୍ଚ ୯ ପରେ ଟ୍ରେଜେରି ଆଉ ଏହା ଗ୍ରହଣ କରିବ ନାହିଁ ବୋଲି ଅର୍ଥ ସଚିବ ସତର୍କ କରାଇ ଦେଇଛନ୍ତି।
ତେବେ ନୂତନ ସମୟସୀମା ଅନୁଯାୟୀ ବିଲ୍ଗୁଡିକର ସମସ୍ତ ତ୍ରୁଟିବିଚ୍ୟୁତି ସୁଧାରି ମାର୍ଚ୍ଚ ୧୪ ସୁଦ୍ଧା ଦାଖଲ କରାଯିବ। କୌଣସି ସ୍ଥିତିରେ ମାର୍ଚ୍ଚ ୧୫ ପରେ ଏହି ସମୟସୀମା ଆଉ ବୃଦ୍ଧି କରାଯିବ ନାହିଁ। ତେବେ ରିଲିଫ ବ୍ୟୟ, ପ୍ରାକୃତିକ ବିପର୍ଯ୍ୟୟ, ବିଜୁଳି, ଟେଲିଫୋନ୍ ବିଲ୍, ଘରଭଡ଼ା, ଯାନବାହନ ଖର୍ଚ୍ଚ, ମେଡିକାଲ ଆଡ୍ଭାନ୍ସ, ବାର୍ଦ୍ଧକ୍ୟ, ଭିନ୍ନକ୍ଷମ ଓ ବିଧବା ଭତ୍ତା, ବିଭିନ୍ନ ପ୍ରକାର ବୃତ୍ତି, ମଧ୍ୟାହ୍ନଭୋଜନ, ପୋଲିସ ସଂଗଠନ, ନିର୍ବାଚନ ଆଦି ପାଇଁ ପ୍ରସ୍ତୁତ ବିଲ୍ଗୁଡିକୁ ମାର୍ଚ୍ଚ ୨୫ ସୁଦ୍ଧା ଦାଖଲ ପାଇଁ କୁହାଯାଇଛି।
କେନ୍ଦ୍ରୀୟ ଯୋଜନା, କେନ୍ଦ୍ରୀୟ ପ୍ରବର୍ତ୍ତିତ ଯୋଜନା, କେନ୍ଦ୍ର ସହାୟତା ଆଦି ଦାବି ମାର୍ଚ୍ଚ ୨୫ ପର୍ଯ୍ୟନ୍ତ ବଳବତ୍ତର ରହିବ ବୋଲି ଅର୍ଥ ବିଭାଗ ପକ୍ଷରୁ କୁହାଯାଇଛି। ମାର୍ଚ୍ଚ ୩୧ ପୂର୍ବରୁ ବ୍ୟୟ ହେବାକୁ ନ ଥିବା କୌଣସି ଅର୍ଥ ପାଇଁ ଟ୍ରେଜେରିରେ ବିଲ୍ ଦାଖଲ ହେବନାହିଁ। ଏହି ଅର୍ଥକୁ ସରେଣ୍ଡର କରାଯାଇପାରିବ।
୨୦୨୧-୨୨ ବଜେଟରେ ଉଠାଯାଇ ଖର୍ଚ୍ଚ ହୋଇପାରି ନ ଥିବା ଅର୍ଥ ମାର୍ଚ୍ଚ ଶେଷସୁଦ୍ଧା ସରକାରୀ ଆକାଉଣ୍ଟରେ ଜମାହେବ। ବ୍ୟୟ ହୋଇପାରି ନ ଥିବା ଅର୍ଥ ପରବର୍ତ୍ତୀ ଆର୍ଥିକ ବର୍ଷରେ ବ୍ୟୟ ହୋଇପାରିବ। ଧାର୍ଯ୍ୟ ସମୟସୀମା ମଧ୍ୟରେ ଯେଭଳି ଟ୍ରେଜେରିରେ ବିଲ୍ ସବୁ ଦାଖଲ ହୁଏ ସେଥିପ୍ରତି ପଦକ୍ଷେପ ନେବାକୁ ଡିଡିଓମାନଙ୍କୁ ପରାମର୍ଶ ଦିଆଯାଇଛି।
ସରକାରୀ ଅର୍ଥକୁ ବେଆଇନ ଭାବେ ବ୍ୟାଙ୍କରେ ଜମା ନ କରିବାକୁ ନିର୍ଦ୍ଦେଶ ଦିଆଯାଇଛି। ଅର୍ଥ ବିଭାଗ ଜାରି କରିଥିବା ନିର୍ଦ୍ଦେଶନାମା ଅନୁଯାୟୀ ଯଦି କୌଣସିଠାରେ ସରକାରୀ ଅର୍ଥ ଏଭଳି ଭାବେ ବ୍ୟାଙ୍କରେ ଜମାହେବ ତେବେ ସେଥିପାଇଁ ଡିଡିଓମାନେ ଦାୟୀ ରହିବେ। ଏପରି କି ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି।