ଯୋଡ଼ା,୧୭।୭(ଡି.ଏନ୍.ଏ.): କେନ୍ଦୁଝର ଜିଲା ଯୋଡ଼ା ସହର ଉପକଣ୍ଠ ଦେଇ ଯାଇଥିବା ୫୨୦ ନଂ. ଜାତୀୟ ରାଜପଥର ରଣାଶାଳ ଘାଟି ନିକଟରୁ ଗୁରୁବାର ଯୋଡ଼ା ପୋଲିସ ବିସ୍ଫୋରକ ଓ ବାରୁଦ ସାମଗ୍ରୀ ବୋଝେଇ ଏକ ଗାଡିକୁ ଜବତ କରିଛି। ଏଥିରେ ସମ୍ପୃକ୍ତ ଜଣଙ୍କୁ ପୋଲିସ ଅଟକ ରଖିଛି। ସେ ହେଲେ ଝାଡଖଣ୍ଡର ଚାଇଁବସା ବଡ଼ ନିମିଡିହି ଅଞ୍ଚଳର କୁନାଲ କୁମାର ମିଶ୍ର(୩୦)।
ସୂଚନାନୁଯାୟୀ, ରଣାଶାଳ ଘାଟି ନିକଟରେ ପୋଲିସ ଗାଡି ଯାଞ୍ଚ କରୁଥିଲା। ଏହି ସମୟରେ ଉକ୍ତ ବିସ୍ଫୋରକ ବୋଝେଇ ଗାଡିକୁ ପୋଲିସ ଜବତକରି କୁନାଲଙ୍କୁ ଅଟକ ରଖିଛି। କୁନାଲ ସ୍ତ୍ରୀଙ୍କୁ ହତ୍ୟାକରି ଫେରାର ଥିବା ତଦନ୍ତ ପରେ ପୋଲିସ ଜାଣିବାକୁ ପାଇଛି । ଏ ନେଇ ତାଙ୍କ ନାମରେ ଝାଡଖଣ୍ଡ ରାଜଚାଇଁବସା ମୁଫାସିଲ ଥାନାରେ ଏକ ମାମଲା (ନଂ. ୮୨/୨୦୧୯)ରୁଜୁ ହୋଇ କେସ୍ ଜାରି ରହିଛି। ତେବେ କୁନାଲ ଯୋଡା ଭୂୟାଁ ବସ୍ତିରେ ଆଉ ଜଣେ ମହିଳାଙ୍କୁ ବିବାହକରି ତାଙ୍କ ସହ ରହୁଥିଲେ। ତେବେ କୁନାଲଙ୍କ ନାମରେ ବେଆଇନ ବିସ୍ଫୋରକ ଚୋରା ଚାଲାଣ ନେଇ ଯୋଡ଼ା ଥାନାରେ କେଶ୍ ନଂ ୧୧୫/୨୦ରେ ଆଉ ଏକ ମାମଲା ରୁଜୁ ହୋଇଥିବା ପୋଲିସ ସୂଚନା ଦେଇଛି । ଜବତ ହୋଇଥିବା ଇନୋଭା କାରଟି ଚୋରା ବୋଲି ପୋଲିସ ଜାଣିବାକୁ ପାଇଛି। ଏହି ଘଟଣାର ଅଧିକ ତଦନ୍ତ ଜାରି ରଖିଥିବା ପୋଲିସ କହିଛି।