ପାଟଣା,୨୩।୪(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ଉପାନ୍ତ ଅଞ୍ଚଳ ପଲାଣିଘାଟି ପଞ୍ଚାୟତ ଜାମୁଳେଇ ବେଡା ଗ୍ରାମର ପତ୍ନୀହନ୍ତା ସ୍ବାମୀଙ୍କୁ ଘଟଗାଁ ପୋଲିସ ଗିରଫ କରିଛି। ଏହାପରେ ଉକ୍ତ ଅଭିଯୁକ୍ତଙ୍କୁ ପୋଲିସ କୋର୍ଟ ଚାଲାଣ କରିଛି। ସୂଚନା ମୁତାବକ, ଜାମୁଳେଇ ବେଡା ଗ୍ରାମରେ ୩୨ବର୍ଷୀୟ କପିଳ ମୁଣ୍ଡା ତାଙ୍କ ୨୫ବର୍ଷୀୟ ପତ୍ନୀ କନକ ମୁଣ୍ଡା ବାସ କରନ୍ତି। ଗତ ବୁଧବାର ବିଳମ୍ବିତ ରାତ୍ରିରେ କପିଳଙ୍କ ନିଦ ଭାଙ୍ଗିବା ପରେ ସେ ଦେଖିବାକୁ ପାଇଥିଲେ ଯେ, ତାଙ୍କ ସ୍ତ୍ରୀ କନକ ବିଛଣାରେ ନାହାନ୍ତି। ଏହାର କିଛି ସମୟ ପରେ କନକ ଫେରିବା ପରେ କପିଳ ଏତେ ରାତିରେ କୁଆଡେ ଯାଇଥିଲୁ ବୋଲି ପ୍ରଶ୍ନ କରିଥିଲେ। ଏହାର କୌଣସି ସନ୍ତୋଷଜନକ ଉତ୍ତର ସ୍ତ୍ରୀ ଦେଇପାରି ନ ଥିବାରୁ କପିଳ ଉତ୍କ୍ଷିପ୍ତ ହୋଇପଡ଼ି ପାଖରେ ଥିବା ଏକ କାଠ ଫାଳିଆରେ ତାଙ୍କ ମୁଣ୍ଡକୁ ପିଟଦେଇଥିଲେ। ଗୁରୁତର ଅବସ୍ଥାରେ କନକଙ୍କୁ ପ୍ରଥମେ ପାଟଣା ଗୋଷ୍ଠି ସ୍ବାସ୍ଥ୍ୟକେନ୍ଦ୍ର ପରେ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ହେଲେ ଚିକିତ୍ସାଧୀନ ଅବସ୍ଥାରେ ଗୁରବାର ସକାଳୁ କନକଙ୍କ ମୃତ୍ୟୁ ଘଟିଥିଲା। ଏନେଇ ଘଟଗାଁ ଥାନାରେ ଆଇପିସି ଧାରା ୮୧/୨୨ରେ ପୋଲିସ ମାମଲା ରୁଜୁ କରି ଅଭିଯୁକ୍ତ କପିଳଙ୍କୁ ଗିରଫ କରଛି। ଏଥିସହ ପୋଲିସ ତାଙ୍କୁ କୋର୍ଟ ଚାଲାଣ କରିଛି ବୋଲି ଥାନା ଅଧିକାରୀ ପ୍ରତିଭା ସାହୁ କହିଛନ୍ତି।