ସୀତାପୁର, ୨୯।୭: ଉତ୍ତର ପ୍ରଦେଶର ସୀତାପୁର ଜିଲାରୁ ଏକ ଜଘନ୍ୟ ହତ୍ୟାକାଣ୍ଡ ଘଟଣା ସାମ୍ନାକୁ ଆସିଛି। ସୀତାପୁର ହରଗ୍ରାମ ପୋଲିସ ଷ୍ଟେସନ ଅନ୍ତର୍ଗତ ମୋହାଲ ମିଲ୍ ବାଗିଆ ବଜାରରେ ଜଣେ ଯୁବକ ଅତି ନୃଶଂସ ଭାବେ ତାଙ୍କ ସ୍ତ୍ରୀକୁ ଧାରୁଆ ଅସ୍ତ୍ରରେ ଆକ୍ରମଣ କରିବା ପରେ ପେଟ୍ରୋଲ ପକାଇ ଜୀବନ୍ତ ଜାଳି ହତ୍ୟା କରିଛି। ଏହି ଘଟଣାରେ ପୋଲିସ ଅଭିଯୁକ୍ତ ସ୍ବାମୀକୁ ଗିରଫ କରିଛି। ଘଟଣାରୁ ଜଣାପଡ଼ିଛି ଯେ, ଏହି ଅଞ୍ଚଳରେ ନବିଉଲ୍ଲା ଖାନ୍ ସ୍ତ୍ରୀ ଖଲିକୁନ୍ ନିଶାନ୍ଙ୍କୁ ନେଇ ରୁହନ୍ତି। ତେବେ ଉଭୟଙ୍କ ମଧ୍ୟରେ ଗତକାଲି କୌଣସି କାରଣକୁ ନେଇ ଝଗଡ଼ା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ଖଲିକୁନ୍ଙ୍କୁ ନବିଉଲ୍ଲା ନିର୍ମମ ଭାବେ ପିଟିଥିଲେ। ଏତିକିରେ ତାଙ୍କ ରାଗ ଶାନ୍ତ ନ ହେବାରୁ ସେ ଏକ ଧାରୁଆ ଅସ୍ତ୍ର ଆଣି ସ୍ତ୍ରୀଙ୍କୁ ଆକ୍ରମଣ କରିବା ସହିତ ପେଟକୁ ଚିରି ଦେଇଥିଲେ। ଏହାପରେ ରାଗରେ ଅନ୍ଧ ହୋଇଯାଇଥିବା ନବିଉଲ୍ଲା ଘରେ ଥିବା ପେଟ୍ରୋଲ ଆଣି ଖଲିକୁନ୍ଙ୍କ ଉପରେ ଢ଼ାଳି ନିଆଁ ଲଗାଇ ଦେଇଥିଲେ। ଖଲିକୁନ ଯନ୍ତ୍ରଣାରେ ଚିତ୍କାର କରି ଛଟପଟ ହେଉଥିବାବେଳେ ନବିଉଲ୍ଲା ଘଟଣାସ୍ଥଳରୁ ଫେରାର୍ ହୋଇଯାଇଥିଲେ। ପରେ ସ୍ଥାନୀୟ ଲୋକ ପୋଲିସକୁ ଏନେଇ ସୂଚନା ଦେବାପରେ ଖଲିକୁନ୍ଙ୍କୁ ହସ୍ପିଟାଲ ନିଆଯାଇଥିଲା। କିନ୍ତୁ ଗୁରୁତର ଥିବା ଖଲିକୁନ୍ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଥିଲେ। ଏହି ଘଟଣାରେ ପୋଲିସ ଖଲିକୁନଙ୍କ ଭାଇଙ୍କ ଏତଲା ଆଧାରରେ ନବିଉଲ୍ଲାଙ୍କୁ ଗିରଫ କରି ଘଟଣାର ତଦନ୍ତ ଚଳାଇଛି।
