ବିଜେପୁର,୨୩ା୮(ଡି.ଏନ୍.ଏ.): ବରଗଡ଼ ଜିଲା ବିଜେପୁର ଥାନା ଅନ୍ତର୍ଗତ ବେନିଆଁଚାଲ ଗାଁରେ କଳହର କରୁଣ ପରିଣତି ପାଇଁ କ୍ରଧାନ୍ବିତ ସ୍ବାମୀ ସ୍ତ୍ରୀ ଓ ଝିଅଙ୍କୁ ବିଷ ଦେବା ସହ ନିଜେ ମଧ୍ୟ ବିଷ ପିଇ ଜୀବନ ହାରିବା ଘଟଣା ଅଞ୍ଚଳବାସୀଙ୍କୁ ସ୍ତବ୍ଧ କରିଦେଇଛି। ସେମାନେ ହେଲେ ରଥ ମହାନନ୍ଦ (୪୫), କୁମୁଦିିନୀ ମହାନନ୍ଦ (୪୦), କବିତା ମହାନନ୍ଦ (୧୨)।
ପୋଲିସର ସୂଚନାନୁସାରେ, ନୂଆଁଖାଇ ପୂର୍ବଦିନ ରଥ ମହାନନ୍ଦଙ୍କର ପରିବାରରେ ଘରୋଇ କାରଣରୁ କଳହ ସୃଷ୍ଟି ହୋଇଥିଲା। ଫଳରେ ରଥ ମହାନନ୍ଦ ଉତ୍ତ୍ୟେକ୍ତ ହୋଇ ସ୍ତ୍ରୀ କୁମୁଦିନୀଙ୍କୁ ବିଷ ପିଆଇ ଦେଇଥିଲେ। ଝିଅ କବିତା ବାରଣ କରିବାରୁ ତାଙ୍କୁ ମଧ୍ୟ ସେ ବିଷ ପିଆଇ ଦେଇଥିଲେ। ଆଖି ସାମ୍ନାରେ ଝିଅ ସହ ସ୍ତ୍ରୀ ବିଷକ୍ରିୟାରେ ଛଟପଟ ହେଉଥିବା ଦେଖି ରଥ ମାନସିକ ଭାରସାମ୍ୟ ହରାଇ ନିଜେ ବିଷ ପିଇ ଆତ୍ମହତ୍ୟା କରିଥିଲେ। ଏହି ଖବର ପାଇବା ପରେ ଆତ୍ମୀୟସ୍ବଜନ ସେମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ବିଜେପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ହେଲେ ଡାକ୍ତର ସେଠାରେ କବିତାଙ୍କୁ ମୃତ ଘୋଷଣା କରିଥିଲେ। ଗୁରୁତର ଦମ୍ପତିଙ୍କୁ ଜିଲା ହସପିଟାଲକୁ ସ୍ଥାନାନ୍ତର କରାଯାଇଥିଲା। ସେମାନଙ୍କର ଅବସ୍ଥା ଉଦ୍ବେଗ ଜନକ ରହିଥିବାରୁ ଡାକ୍ତର ତୁରନ୍ତ ବୁର୍ଲା ପଠାଇଥିଲେ। ମାତ୍ର ଚିକିତ୍ସାଧୀନ ଅବସ୍ଥାରେ ଶନିବାର ବିଳମ୍ବିତ ରାତିରେ ଦମ୍ପତିଙ୍କ ମୃତ୍ୟୁ ଘଟିଛି। ମୃତକଙ୍କ ଭାଇ ଦିଲ୍ଲୀପ ମହାନନ୍ଦଙ୍କର ଏତଲା ଆଧାରରେ ୧୭୪/୨୦ ରେ ଏକ ହତ୍ୟା ମାମଲା ରୁଜୁ କରାଯାଇଛି। ମୃତଦେହଗୁଡ଼ିକୁ ଜବତ କରି ଅଧିକ ତଦନ୍ତ କରାଯାଉଥିବା ଆଇଆଇସି ରାଜେନ୍ଦ୍ର ସିଆଲ କହିଛନ୍ତି।