ଲକ୍ଷ୍ନୌ,୨୮।୮: ଉତ୍ତରପ୍ରଦେଶର ମାଉ ଜିଲାର ଜଣେ ବ୍ୟକ୍ତି ସ୍ତ୍ରୀଙ୍କ ସହ ଝଗଡା କରି ତାଳ ଗଛ ଉପରେ ରହୁଥିଲେ। ଦୀର୍ଘ ୩୨ ଦିନ ପରେ ରବିବାର ପ୍ରାୟ ୭୫ ଘଣ୍ଟାର ପରିଶ୍ରମ କରି ପୋଲିସ ତାଙ୍କୁ ତଳକୁ ଆଣିଛି। ବ୍ୟକ୍ତିଙ୍କୁ ତଳକୁ ଆଣିବାକୁ ପୋଲିସ ଟିମ୍କୁ ବହୁ କଷ୍ଟ କରିବାକୁ ପଡିଥିଲା। ପୋଲିସ ତିନି ଘଣ୍ଟା ଧରି ତାଳ ଗଛକୁ ଘେରି ରହିଥିଲେ। ଶେଷରେ ତଳେ ବିଛାଯାଇଥିବା ଏକ ଜାଲ ଉପରେ ବ୍ୟକ୍ତିଙ୍କୁ ଖସାଯାଇଥିଲା। ସେ ଓହ୍ଲାଇବା ମାତ୍ରେ ପୋଲିସ ତାଙ୍କୁ ନିଜ ଆୟତକୁ ନେଇ ଡାକ୍ତରୀ ପରୀକ୍ଷା ପାଇଁ ପଠାଇଥିଲା। ଏହାପୂର୍ବରୁ ଶନିବାର ପୋଲିସ ଟିମ ଦିନସାରା ସମ୍ପୃକ୍ତ ବ୍ୟକ୍ତିଙ୍କୁ ଓହ୍ଲାଇବାକୁ ଚେଷ୍ଟା କରିଥିଲା। ଆଠ ଘଣ୍ଟାର ପରିଶ୍ରମ ପରେ ମଧ୍ୟ ପୋଲିସ-ପ୍ରଶାସନ ସଫଳ ହୋଇପାରିଲା ନ ଥିଲା।
ସୂଚନାଯୋଗ୍ୟ, କୋପାଗଞ୍ଜ ପୋଲିସ ଷ୍ଟେଶନ ଅଞ୍ଚଳର ବସରାଥପୁରର ରାମପ୍ରବେଶ ରାମ (୪୨) ଶ୍ରମିକ ଭାବେ କାର୍ଯ୍ୟ କରନ୍ତି। ୩୨ ଦିନ ପୂର୍ବେ କିଛି ପ୍ରସଙ୍ଗରେ ସ୍ତ୍ରୀଙ୍କ ସହ ଝଗଡା ପରେ ସେ ପରିବାର ଛାଡି ତାଳ ଗଛ ଉପରେ ରହିବାକୁ ଲାଗିଲେ। ଖାଇବା, ପିଇବା ଏବଂ ଗାଧୋଇବା ମଧ୍ୟ ଗଛରେ ଉପରେ ହିଁ ସେ କରୁଥିଲେ। ତାଙ୍କୁ ବୁଝାଇବା ଏବଂ ଗଛରୁ ଓହ୍ଲାଇବା ପାଇଁ ପ୍ରତ୍ୟେକ ଦିନ ଚେଷ୍ଟା କରାଯାଉଥିଲା କିନ୍ତୁ କୌଣସି ସୁଫଳ ମିଳି ନ ଥିଲା। ସ୍ବାମୀ ଗଛରେ ରହୁଥିବାରୁ ସ୍ତ୍ରୀ ଘର ଚଳାଇବାରେ ଅସୁବିଧାର ସମ୍ମୁଖୀନ ହୋଇଥିଲେ। ଶେଷରେ ପୋଲିସର ସହାୟତା ନିଆଯାଇଥିଲା।