ନୂଆଦିଲ୍ଲୀ: ଅଯୋଧ୍ୟାରେ ନିର୍ମାଣ ହେବାକୁ ଯାଉଛି ଭଗବାନ ରାମଙ୍କ ଭବ୍ୟ ମନ୍ଦିର। ଏଥିନେଇ ପ୍ରସ୍ତୁତି ଆଗେଇ ଚାଲିଥିବା ବେଳେ ଶ୍ରଦ୍ଧାଳୁମାନେ ମନ୍ଦିର ନିର୍ମାଣ ନେଇ ଦାନ କରୁଛନ୍ତି। ଏହି କ୍ରମରେ ରାଜସ୍ଥାନର ଜୋଧପୁରରେ ରହୁଥିବା ଜଣେ ବ୍ୟକ୍ତି ସ୍ତ୍ରୀଙ୍କ ଇଚ୍ଛା ପୂରଣ କରିବାକୁ ଯାଇ ତାଙ୍କର ୭ ଲକ୍ଷ ଟଙ୍କାର ଗହଣା ବିକ୍ରି କରି ଦାନ କରିଛନ୍ତି। ଏଭଳି କାର୍ଯ୍ୟ ଏବେ ଚର୍ଚ୍ଚାର ବିଷୟ ପାଲଟିଛି।
ରାମ ମନ୍ଦିର ନିର୍ମାଣ ପାଇଁ ସମର୍ପଣ ନିଧି ଅଭିଯାନ ଜାରି ରହିଛି। ଭକ୍ତମାନେ ସ୍ବଇଚ୍ଛାରେ ଟଙ୍କା ଦାନ କରୁଛନ୍ତି। ସେହିଭଳି ଜୋଧପୁରରେ ରହୁଥିବା ଆଶା କମ୍ବର ଜଣେ ରାମଭକ୍ତ। ସେ ଅଯୋଧ୍ୟାରେ ମନ୍ଦିର ନିର୍ମାଣ ହେବା ଦେଖିବାକୁ ଚାହୁଁଥିଲେ। ହେଲେ ନିକଟରେ ୫୪ ବର୍ଷ ବୟସରେ ତାଙ୍କର ନିଧନ ହୋଇଥିଲା। ରୋଗଗ୍ରସ୍ତ ଥିବା ବେଳେ ସେ ସ୍ବାମୀ ଓ ପୁଅଙ୍କୁ ନିଜର ଶେଷ ଇଚ୍ଛା ବିଷୟରେ କହିଥିଲେ। ରାମ ମନ୍ଦିର ଲାଗି ସେ କିଛି ଦାନ ଦେବାକୁ ଚାହୁଁଥିବା କହିଥିଲେ। ପରିବାରଲୋକେ ସମର୍ପଣ ନିଧି ରାଶି ଏକତ୍ରିତ କରୁଥିବା ଦଳଙ୍କୁ ଏ ନେଇ ଜଣାଇଥିଲେ। ହେଲେ ଫେବୃୟାରୀ ୪ ତାରିଖରେ ଆଶାଙ୍କ ମୃତ୍ୟୁ ହୋଇଥିଲା। ମୃତ୍ୟୁ ପରେ ତାଙ୍କର ଗହଣା ବିକ୍ରି କରି ସ୍ବାମୀ ୭ଲକ୍ଷ ୮ ହଜାର ଟଙ୍କା ଜମା କରିଥିଲେ। ଏବେ ଏହି ଟଙ୍କା ସେ ସ୍ତ୍ରୀଙ୍କ ଶେଷଇଚ୍ଛା ପୂରଣ କରିବାକୁ ଯାଇ ଦାନ କରିଛନ୍ତି। ଆଶାଙ୍କ ଭଗବାନଙ୍କ ପ୍ରତି ଶ୍ରଦ୍ଧା ଅନେକଙ୍କୁ ଭାବବିହ୍ବଳ କରୁଥିବା ବେଳେ ସେ ଅନ୍ୟମାନଙ୍କ ପାଇଁ ଉଦାହରଣ ବୋଲି କୁହାଯାଉଛି।