ବ୍ରହ୍ମପୁର ଅଫିସ,୧୯ ।୬: ଅତିରିକ୍ତ ଜିଲା ଜଜ(ଏଡିଜେ)-୧ ସଂଘମିତ୍ରା ଶର୍ମା ଏକ ଯୌତୁକ ଜନିତ ହତ୍ୟା ମାମଲାର ଶୁଣାଣି କରିଥିଲେ। ପ୍ରମାଣ ଅଭାବରୁ ଶାଶୁ ଓ ଦିଅରଙ୍କୁ ସେ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ଅଭିଯୁକ୍ତମାନେ ହେଲେ ଉମେଶ ସିଂ ସ୍ତ୍ରୀ ରଶ୍ମି ରେଖା ପଟ୍ଟନାୟକ ଓରଫ ସିଂ ଓ ତାଙ୍କ ପୁଅ ଅମିତ କୁମାର ପଟ୍ଟନାୟକ ଓରଫ ସିଂ। ମାମଲାର ମୁଖ୍ୟ ଅଭିଯୁକ୍ତ ତଥା ମୃତ ମହିଳା ପ୍ରୀତି ପୁନମ ମିଶ୍ରଙ୍କ ସ୍ବାମୀ ସୁମିତ ସିଂ ଏବେବି ଫେରାର ରହିଛନ୍ତିି। ପୋଲିସ ଘଟଣାର ୧୩ ବର୍ଷ ପରେ ମଧ୍ୟ ମୁଖ୍ୟ ଅଭିଯୁକ୍ତଙ୍କୁ ଧରିପାରିନଥିବା ଜଣାପଡିଛି।
ପ୍ରକାଶ ଯେ, ବାରିପଦା ଅଞ୍ଚଳର ପ୍ରୀତି ପୁନମ ମିଶ୍ର ବ୍ରହ୍ମପୁରରେ ଏମ୍ବିଏ ପଢିବା ବେଳେ ସୁମିତ ସିଂଙ୍କ ସହ ତାଙ୍କର ପ୍ରେମ ବିବାହ ହୋଇଥଲା। ସୁମିତ ସ୍ତ୍ରୀଙ୍କୁ ନେଇ ନିଜ ବାପା ଉମେଶ ସିଂ, ମା ଓ ଭାଇଙ୍କ ସହ ନୂଆ ବସ୍ଷ୍ଟାଣ୍ଡ ରୋଡରେ ଥିବା ଏକ ଆପାର୍ଟମେଣ୍ଟରେ ରହୁଥିଲେ। ୨୦୦୯ ସେପ୍ଟେମ୍ବର ୨୨ରେ ପ୍ରୀତିଙ୍କୁ ସ୍ବାମୀ ଓ ଶଶୁର ଘର ଲୋକ ଅଧିକ ଯୌତୁକ ଦାବିକରି ତଣ୍ଟି ଚିପି ହତ୍ୟା କରିଥିଲେ। ଏନେଇ ମୃତ ମହିଳାଙ୍କ ମଉସା ସୂର୍ଯ୍ୟ କାନ୍ତ ଶତପଥୀ ମହିଳା ଥାନାରେ ଅଭିଯୋଗ କରିଥିଲେ। ପୋଲିସ ୩୨/୦୯ ରେ ସୁମିତ ସିଂ, ତାଙ୍କ ମା ଓ ଭାଇଙ୍କ ନାମରେ ଏକ ମାମଲା ରୁଜୁ କରିଥିଲା। ଘଟଣା ପରେ ଅଭିଯୁକ୍ତମାନେ ଫେରାର ଥିବା ବେଳେ ରଶ୍ମିରେଖା ପଟ୍ଟନାୟକ ଓରଫ ସିଂ ଓ ତାଙ୍କ ପୁଅ ଅମିତ ହାଇକୋର୍ଟରୁ ଜାମିନ ପାଇଥିଲେ। ଏହି ମାମଲାର ବିଚାର ବେଳେ ଜାମିନରେ ଥିବା ଉପରୋକ୍ତ ମା’ ରଶ୍ମିରେଖା ଓ ଅମିତଙ୍କୁ ଏଡିଜେ କୋର୍ଟରେ ହାଜର କରାଯାଇଥିଲା। ୧୦ ଜଣ ସାକ୍ଷୀଙ୍କ ବୟାନ ଓ କୋର୍ଟରେ ପୋଲିସ ଦାଖଲ କରିଥିବା ଚାର୍ଜଶିଟକୁ ଆଧାର କରି ଉପଯୁକ୍ତ ପ୍ରମାଣ ମିଳି ନ ଥିବାରୁ ଜଜ ଉଭୟ ରଶ୍ମିରେଖା ଓ ତାଙ୍କ ପୁଅ ଅମିତଙ୍କୁ ନିର୍ଦ୍ଦୋଷ ବୋଲି ରାୟ ଦେଇଛନ୍ତି। ସରକାରଙ୍କ ପକ୍ଷରୁ ଏପିପି ଜ୍ଞାନେନ୍ଦ୍ର ନାଥ ଜେନା ଓ ମୁଦାଲାଙ୍କ ପକ୍ଷରୁ ଆଇନଜୀବୀ ସାୟଦ ଇକ୍ବାଲ ମକଦ୍ଦମା ପରିଚାଳନା କରିଥିଲେ।