ଛାପ୍ରା: ଚଳଚ୍ଚିତ୍ର ‘ହମ୍ ଦିଲ୍ ଦେ ଚୁକେ ସନମ୍’ର କାହାଣୀକୁ ଥରେ ମନେ ପକାନ୍ତୁ। ନାୟକ ଅଜୟ ଦେବଗନ ଏଥିରେ ସ୍ତ୍ରୀ ଐଶ୍ୱର୍ଯ୍ୟାଙ୍କୁ ତାଙ୍କ ପ୍ରେମିକ(ସଲମାନ୍ ଖାନ୍)ଙ୍କ ସହ ମିଶାଇବାକୁ ଯଥା ସମ୍ଭବ ଚେଷ୍ଟା କରିଥିଲେ। ଠିକ୍ ଏଭଳି ସାମଞ୍ଜସ୍ୟ ଥିବା ଏକ କାହାଣୀ ବିହାରର ଛାପ୍ରାରେ ଦେଖିବାକୁ ମିଳିଛି। ଏଠାରେ ଜଣେ ବ୍ୟକ୍ତି ନିଜର ସ୍ତ୍ରୀଙ୍କ ବିବାହ ତାଙ୍କ ପ୍ରେମିକଙ୍କ ସହ କରାଇଦେଇଛନ୍ତି। ଘଟଣାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ଘଟଣାଟି ଏପରି। ଛାପ୍ରାର ଓ୍ବାର୍ଡ ନଂ ୪୫ରେ ଘେଘଟା ଗାଁର ଜଣେ ବିବାହିତା ଅନ୍ୟ ଜଣେ ବ୍ୟକ୍ତିଙ୍କ ପ୍ରେମରେ ପଡ଼ିଥିଲେ। ଏହାପରେ ସ୍ବାମୀଙ୍କ ସହ ତାଙ୍କର ସମ୍ପର୍କ ଠିକ୍ ଚାଲି ନ ଥିଲା। ସ୍ତ୍ରୀ ପ୍ରେମରେ ପଡ଼ିଥିବା ଜାଣିବା ପରେ ସ୍ବାମୀ ବୁଝାଇବାକୁ ଚେଷ୍ଟା କରିଥିଲେ। ଶେଷରେ ତାହା ଅସଫଳ ମନେ ହେବା ପରେ ସ୍ବାମୀ ତାଙ୍କ ବିବାହ ପ୍ରେମିକଙ୍କ ସହ କରାଇଦେଇଛନ୍ତି। ମହିଳାଜଣଙ୍କ ପ୍ରଥମେ ମଧ୍ୟ ପ୍ରେମ ବିବାହ କରିଥିବା ବେଳେ ପୁଣିଥରେ ପ୍ରେମରେ ପଡ଼ିବାକୁ ନେଇ ନାନାଦି ଚର୍ଚ୍ଚା ହେଉଛି।
ଅପରପକ୍ଷେ ମହିଳାଜଣଙ୍କ ସ୍ବାମୀ ମାର୍ପିଟ କରୁଥିବା ଅଭିଯୋଗ ଆଣିଛନ୍ତି। ଏଥିପାଇଁ ସେ ପୁଣିଥରେ ବିବାହ କରିବାକୁ ନିଷ୍ପତ୍ତି ନେଇଛନ୍ତି। ନିଜ ଇଚ୍ଛାରେ ସେ ଏହି ବିବାହ କରିଛନ୍ତି। ଆଗାମୀ ଦିନରେ ନିଜ ଝିଅଙ୍କୁ ଠିକ୍ ଭାବେ ଲାଳନପାଳନ କରିପାରିବେ ବୋଲି ସେ କହିଛନ୍ତି।
