ଲକ୍ଷ୍ନୌ,୨୭ା୮: ସ୍ତ୍ରୀଙ୍କ ଯୁକ୍ତି ଓ ଗାଳିରେ କ୍ଷୁବ୍ଧ ହୋଇ ଉତ୍ତରପ୍ରଦେଶର ଜଣେ ବ୍ୟକ୍ତି ମାସେ କାଳ ୮୦ ଫୁଟ ଉଚ୍ଚ ତାଳଗଛରେ ରହିବା ଘଟଣା ଚର୍ଚ୍ଚାର ବିଷୟ ହୋଇଛି। ୟୁପି ମାଉ ଜିଲା କୋପାଗଞ୍ଜ ଅଞ୍ଚଳରେ ଏଭଳି ବିଚିତ୍ର ଘଟଣା ଘଟିଛି। ୪୨ ବର୍ଷୀୟ ରାମ ପ୍ରବେଶଙ୍କର ୬ ମାସ ହେଲା ତାଙ୍କ ସ୍ତ୍ରୀଙ୍କ ସହ ଝଗଡ଼ା ଲାଗୁଥିଲା। ଏପରିକି ସ୍ତ୍ରୀ ତାଙ୍କୁ ମାଡ଼ ମାରୁଥିଲେ ବୋଲି ରାମ ଅଭିଯୋଗ କରିଛନ୍ତି। ସ୍ତ୍ରୀଙ୍କ ବ୍ୟବହାରରେ ସେ ଏଭଳି ଅତିଷ୍ଠ ହୋଇଯାଇଥିଲେ ଯେ, ତାଳଗଛରେ ଚଢ଼ିଯାଇ ସେଠାରେ ଗୋଟିଏ ମାସ ରହିଥିଲେ। ତାଙ୍କ ପରିବାର ଲୋକେ ଦଉଡ଼ିରେ ଖାଦ୍ୟ ଓ ପାଣି ବାନ୍ଧି ଝୁଲାଇ ଦେଉଥିଲେ ଓ ରାମ ତାହାକୁ ଉପରକୁ ଟାଣି ନେଇ ଖାଉଥିଲେ। ସେ ରାତିରେ କିଛି ସମୟ ପାଇଁ ଓହ୍ଲାଉଥିଲେ ଓ ନିତ୍ୟକର୍ମ ସାରି ପୁଣି ଗଛରେ ଚଢ଼ିଯାଉଥିଲେ ବୋଲି ଗ୍ରାମବାସୀ କହିଛନ୍ତି। ପରେ ଗାଁ ଲୋକେ ଏ ସମ୍ପର୍କରେ ପୋଲିସକୁ ଜଣାଇଥିଲେ। ପୋଲିସ ବାରମ୍ବାର ଅନୁରୋଧ କରିବା ସତ୍ତ୍ୱେ ରାମ ତଳକୁ ନ ଓହ୍ଲାଇବାରୁ ସେମାନେ ତାଙ୍କର ଭିଡିଓ କରି ଫେରିଯାଇଥିଲେ। ତେବେ ତାଳଗଛରେ ସେ ଅଧିକ ଦିନ ରହିବାକୁ ଗଁାର କେତେଜଣ ବିରୋଧ କରିଥିଲେ। ସେ ଗଛରେ ଥାଇ ଅନ୍ୟମାନଙ୍କ ଘରେ କ’ଣ ଘଟୁଛି, ତାହା ଦେଖୁଛନ୍ତି। ତେଣୁ ସେମାନଙ୍କ ଘରର ଗୋପନୀୟତା ଉଲ୍ଲଂଘନ ହେଉଛି ବୋଲି ମହିଳାମାନେ ଅଭିଯୋଗ କରିଥିଲେ।
