ଭଞ୍ଜନଗର,୨୯।୮(ଡି.ଏନ.ଏ)- ଗଞ୍ଜାମ ଜିଲା ତାରସିଂ ଥାନା ଝାଲିଆଗୋଚ୍ଛା ଗ୍ରାମରେ ୨୦୧୫ରେ ଘଟିଥିବା ଏକ ଅପମୃତ୍ୟୁ ମାମଲା ୫ବର୍ଷ ପରେ ହତ୍ୟା ମାମଲାରେ ପରିଣତ ହୋଇଛି। ଅଭିଯୁକ୍ତ ସ୍ବାମୀ ରାଜୁ ନାଇକ ସ୍ତ୍ରୀ ମାଧୁରି ନାଇକଙ୍କୁ ହତ୍ୟା କରିଥିବା ପୋଲିସ ନିକଟରେ ଶନିବାର ସ୍ବୀକାର କରିଛି। ଫଳରେ ହତ୍ୟା ଅଭିଯୋଗରେ ରାଜୁଙ୍କୁ ଗିରଫ କରି ଭଞ୍ଜନଗର କୋର୍ଟ ଚାଲାଣ କରାଯାଇଛି।
ପ୍ରକାଶ ଯେ, ରାଜୁ ପ୍ରଥମ ସ୍ତ୍ରୀଙ୍କୁ ଛାଡି ଦେଇଥିଲେ। ତାଙ୍କର ୨ ପୁଅ ଥିଲା। ୨୦୧୨ରେ ରୁଢ଼ାପଦରର ମାଧୁରିଙ୍କୁ ଦ୍ୱିତୀୟ ବିବାହ କରିଥିଲେ। ମାଧୁରି ମଧ୍ୟ ପ୍ରଥମ ସ୍ବାମୀଙ୍କୁ ଛାଡି ରାଜୁଙ୍କୁ ଦ୍ୱିତୀୟ ବିବାହ କରିଥିଲେ। ବିବାହର କିଛି ମାସ ପରେ ରାଜୁ ମାଧୁରିର ଚରିତ୍ରକୁ ସନ୍ଦେହ କରି ବିଭିନ୍ନ ସମୟରେ ପାଟିତୁଣ୍ଡ କରୁଥିଲେ। ଏହାପରେ ତାଙ୍କୁ ହତ୍ୟା ପାଇଁ ଯୋଜନା କରିଥିଲେ। ୨୦୧୫ ଫେବୃୟାରୀ ୫ରେ ରାଜୁ ଓ ମାଧୁରି ମିଶି ଗ୍ରାମ ଜଙ୍ଗଲକୁ କାଠ ଆଣିବାକୁ ଯାଇଥିଲେ। ପୂର୍ବ ଯୋଜନା ପ୍ରକାରେ ମାଧୁରିଙ୍କୁ ଜଙ୍ଗଲରେ ରାଜୁ ଟାଙ୍ଗିଆରେ ହାଣି ହତ୍ୟା କରିଥିଲେ। ପରେ ଚେନ୍ନାଇ ଚାଲିଯାଇଥିଲେ। ଉଭୟଙ୍କ ନିଖୋଜ ନେଇ ପରିବାର ଲୋକେ ଥାନାରେ ଅଭିଯୋଗ କରିଥିଲେ। ପୋଲିସ ନଂ.୨/୧୫ରେ ପ୍ରଥମେ ଏକ ନିଖୋଜ ମାମଲା କରିଥିଲା। ଘଟଣାର ୪୦ଦିନ ପରେ ଜଙ୍ଗଲରୁ ମାଧୁରିଙ୍କ କଙ୍ଗାଳ ମିଳିଥିଲା। ଫଳରେ ପୋଲିସ ନଂ.୪/୧୫ରେ ଏକ ଅପମୃତ୍ୟୁ ମାମଲା ରୁଜୁ କରିଥିଲା। ଏହାପରେ ରାଜୁ ଉପରେ ପୋଲିସର ସନ୍ଦେହ ହୋଇଥିଲା। କିନ୍ତୁ ତାର ପତ୍ତା ମିଳି ନ ଥିଲା। ଇତିମଧ୍ୟରେ ରାଜୁ ଚେନ୍ନାଇରୁ ଗ୍ରାମକୁ ଫେରିଥିଲେ। ସୂଚନା ପାଇ ପୋଲିସ ଥାନାକୁ ନେଇ ପଚରାଉଚରା ପରେ ସ୍ତ୍ରୀଙ୍କୁ ହତ୍ୟା କରିଥିବା ସ୍ବୀକାର କରିଛି ବୋଲି ଥାନା ଅଧିକାରୀ ସବ୍ୟସାଚ୍ଚୀ ମଲ୍ଲ ସୂଚନା ଦେଇଛନ୍ତି। ନଂ.୧୭୯/୨୦ରେ ଏକ ହତ୍ୟା ମାମଲା ରୁଜୁ ହୋଇଛି।