ପୁରୁଷୋତ୍ତମପୁର,୯।୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅଧୀନ ଧୋବାପଲ୍ଲୀ ଗ୍ରାମରେ ସୋମବାର ଏକ ଅଭାବନୀୟ ଘଟଣା ଘଟିଛି। ଯୌତୁକ ଲୋଭୀ ସ୍ବାମୀ ସ୍ତ୍ରୀଙ୍କ ତଣ୍ଟିଚିପି ହତ୍ୟା କରିଥିବା ଜଣାପଡ଼ିଛି। ମୃତ ମହିଳା ଜଣକ ହେଲେ ମାମା ସ୍ବାଇଁ।
ଖବର ପାଇ ପୁରୁଷୋତ୍ତମପୁର ଏସ୍ଡିପିଓ ରଜନୀକାନ୍ତ ସାମଲ, ଆଇଆଇସି ପ୍ରିୟସ ରଞ୍ଜନ ଛୋଟରାୟଙ୍କ ସହ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଛନ୍ତି। ତଦନ୍ତ ପରେ ପ୍ରକୃତ ଘଟଣା ଜଣାପଡ଼ିବ ବୋଲି ଆଇଆଇସି ଛୋଟରାୟ କହିଛନ୍ତି। ଏଥିନେଇ ଥାନାରେ ଏକ ମାମଲା(ନଂ. ୧୬।୨୩) ରୁଜୁ ହୋଇଛି।
ଆସିକା ଥାନା ଅଧୀନ ପାକଲାପଲ୍ଲୀ ଗ୍ରାମର ଧୋବା ପଲେଇଙ୍କ ଝିଅ ମାମା ଗତ ୩ ବର୍ଷ ତଳେ ଚିଙ୍ଗୁଡ଼ିଘାଇ ପଞ୍ଚାୟତ ଧୋବାପଲ୍ଲୀ ଗ୍ରାମର ରଞ୍ଜିତ ସ୍ବାଇଁଙ୍କୁ ବିବାହ କରିଥିଲେ। ବିବାହ ସମୟରେ ଦିଆଯାଇଥିବା ଯୌତୁକରେ ସନ୍ତୁଷ୍ଟ ନ ହୋଇ ରଞ୍ଜିତ ଅଧିକ ଯୌତୁକ ଦାବିକରି ନିର୍ଯାତନା ଦେଉଥିଲେ।
ଇତିମଧ୍ୟରେ ରଞ୍ଜିତ ସୁରଟ ଚାଲିଯାଇଥିବା ବେଳେ ଗତ ୪ଦିନ ତଳେ ସେଠାରୁ ଗ୍ରାମକୁ ଫେରି ପୁଣି ସ୍ତ୍ରୀଙ୍କୁ ନିର୍ଯାତନା ଦେଇଥିଲେ। ରବିବାର ରାତିରେ ପରିବାର ଲୋକେ ଶୋଇଥିବା ବେଳେ ରଞ୍ଜିତ ଓ ମାମା ଅନ୍ୟ ଏକ କୋଠରିରେ ଶୋଇଥିଲେ। ଏହି ସମୟରେ ରଞ୍ଜିତ ସ୍ତ୍ରୀଙ୍କ ତଣ୍ଟିଚିପି ହତ୍ୟା କରିଥିଲେ। ସକାଳୁ ପରିବାର ଲୋକେ ଏହା ଦେଖି ଗ୍ରାମବାସୀଙ୍କୁ ଜଣାଇଥିଲେ।