ଇଂଲଣ୍ଡ,୩୦।୧: ‘ଘର ସବୁ ସଫାସଫି କାମ ସରିଛି। ଘରେ ଥିବା ବଡ ସୋଫ ସହ ଛୋଟ ଛୋଟ ସୋଫା, ଚେୟାର ଟେବୁଲ ସହ ୩ଟି ବେଡରୁମର କାର୍ପେଟ ଓ ଚଟାଣକୁ ମଧ୍ୟ ସଫା କରିଛି। ଏଥର ମୋତେ ଅନଲାଇନ ପେମେଣ୍ଟ କରନ୍ତୁ’। କୌଣସି ଚାକରଙ୍କୁ ନୁହେଁ ଖୋଦ୍ ସ୍ବାମୀ ନିଜ ସ୍ତ୍ରୀଙ୍କୁ ଏପରି ମେସେଜ କରୁଛନ୍ତି। ଯାହାର ସ୍କ୍ରିନଶଟ୍ ସୋସିଆଲ ମିଡିଆରେ ଭାଇରାଲ ହେଉଛି।
ବ୍ୟକ୍ତିଜଣକ ନିଜ ଘରକୁ ଲଗାତାର ୬ଘଣ୍ଟା ଧରି ସଫା କରିଥିଲେ। ଯାହାପରେ ସେ ହ୍ବାଟସଆପ୍ରେ ଗୋଟିଏ ଲିଷ୍ଟ କରି ସ୍ତ୍ରୀଙ୍କୁ ଏକ ବିଲ୍ ପଠେଇଥିଲେ। ଏହାପରେ ସେ ଅନଲାଇନରେ ପଠାଇଥିବା ଲିଙ୍କ୍ରେ ପେମେଣ୍ଟ କରିବାକୁ କହିଥିଲେ। ଯାହାକୁ ଦେଖି ସ୍ତ୍ରୀ ସାଙ୍ଗେ ସାଙ୍ଗେ ରାଗି ଯାଇଥିଲେ। ତେବେ ସ୍ବାମୀ-ସ୍ତ୍ରୀଙ୍କ କଥୋପକଥନ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଲୋକେ ଏଥିରେ ଖୁବ୍ କମେଣ୍ଟ ମଧ୍ୟ ଦେଉଛନ୍ତି।
ବ୍ରିଟେନରେ ରହୁଥିବା ଏହି ବ୍ୟକ୍ତିଜଣକ ହେଉଛନ୍ତି ମାର୍କ। ମାର୍କ ନିଜ ସ୍ତ୍ରୀ ଜସ୍ମିନଙ୍କୁ ଘରକାମର ଲିଷ୍ଟ ପଠାଇ ତାଙ୍କୁ ୭୪ହଜାର ଟଙ୍କାର ପାରଶ୍ରମିକ ଦେବାକୁ କହିଥିଲେ। ଯାହାପରେ ସ୍ତ୍ରୀଙ୍କ ରାଗ ପଞ୍ଚମରେ। ଜସ୍ମିନ ରାଗିଯାଇ କହିଥିଲେ, ଆମେ ବିବାହିତ ଆଉ ଆମର ୩ଟି ସନ୍ତାନ ଅଛନ୍ତି। ଏହି କଥାବାର୍ତ୍ତାର ସ୍କ୍ରିନଶଟ୍ ମାର୍କ ଫେସବୁକ୍ରେ ଶେୟାର କରିଛନ୍ତି।
ସବୁଠୁ ମଜାଦାର କଥା ହେଉଛି, ମାର୍କ ଫେସବୁକ୍ରେ ସ୍କ୍ରିନଶଟ୍ ଶେୟାର କରି ମଜାଳିଆ ଢଙ୍ଗରେ ଲେଖିଛନ୍ତି,ଗତ ସପ୍ତାହରେ ଆମ ସହ ଏକ ର୍ଦୁଭାଗ୍ୟପୂର୍ଣ୍ଣ ଘଟଣା ଘଟିଥିଲା। ଜଣେ ଗ୍ରାହକ ଆମକୁ ପାରଶ୍ରମିକ ଦେବାକୁ ମନା କରିଦେଇଛନ୍ତି! ଏକ ବଡ ସୋଫା, ୩ଟି ବେଡରୁମ୍ କାର୍ପେଟ ଓ ଏକ ପଥର ଚଟ୍ଟାଣକୁ ସଫା କରିବା ପରେ ମଧ୍ୟ ଗ୍ରାହକ ଜଣକ ଏଥିରେ ଖୁସି ନ ଥିବା କହିଛନ୍ତି। ପରେ ଚାଟ୍ ଦେଖି ୟୁଜର୍ସ ଜାଣିପାରିଥିଲେ କି, ଗ୍ରାହକ ଜଣକ ମାର୍କଙ୍କ ସ୍ତ୍ରୀ ଅଟନ୍ତି।