ମାଲକାନଗିରି,୨୫ା୮(ଡି.ଏନ୍.ଏ./ସ୍ବ.ପ୍ର.): ମାଲକାନଗିରି ଜିଲାର ଜଣେ ମହିଳାଙ୍କ କିଡ୍ନୀକୁ ତାଙ୍କ ସ୍ବାମୀ ଛଳନା କରି ବିକ୍ରି କରିଦେଇଥିବା ଆଦର୍ଶ ଥାନାରେ ଅଭିଯୋଗ ହୋଇଛି। ପୀଡ଼ିତା ଜଣକ ହେଲେ ମାଲକାନଗିରି ସଦର ବ୍ଲକ କତାମେଟା ଗ୍ରାମର ରଞ୍ଜିତା କୁଣ୍ଡୁ। ସେ ବୁଧବାର ଗଣମାଧ୍ୟମକୁ କହିଛନ୍ତି, ବିବାହ ପରେ ସ୍ବାମୀ ପ୍ରଶାନ୍ତ କୁଣ୍ଡୁ ଓ ନଣନ୍ଦ ଯୌତୁକ ନିର୍ଯାତନା ଦେଉଥିଲେ। ୨୦୧୮ରେ ତାଙ୍କ କିଡ୍ନୀରେ ଷ୍ଟୋନ୍ ହେବାରୁ ଚିକିତ୍ସା ପାଇଁ ସ୍ବାମୀ ଏବଂ ନଣନ୍ଦ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲକୁ ନେଇଥିଲେ। ସେଠାରେ ରକ୍ତ ପରୀକ୍ଷା କରାଯିବ ବୋଲି ମିଛ କହି କିଡ୍ନୀ ବିକ୍ରି କରିଦେଲେ। ସ୍ବାମୀ ଏବଂ ନଣନ୍ଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ତାଙ୍କୁ ନ୍ୟାୟ ଦେବାକୁ ନିବେଦନ କରି ରଞ୍ଜିତା ବୁଧବାର ପରିବାରବର୍ଗ, ଗ୍ରାମବାସୀ ଏବଂ ସାମାଜିକ କର୍ମୀ ଶରତ ବୁରୁଦାଙ୍କ ସହ ଥାନାର ଦ୍ୱାରସ୍ଥ ହୋଇଛନ୍ତି।
ସାମାଜିକ କର୍ମୀ ଶରତ କହିଛନ୍ତି, ରଞ୍ଜିତା ୧୨ ବର୍ଷ ତଳେ ଏମ୍ଭି-୩୮ ଗ୍ରାମର ପ୍ରଶାନ୍ତଙ୍କୁ ପ୍ରଥମେ ପ୍ରେମ କରି ପରେ ବିବାହ କରିଥିଲେ। ତାଙ୍କର ଗୋଟିଏ ଝିଅ ଏବଂ ପୁଅ ରହିଛନ୍ତି। ବିବାହ ପରଠାରୁ ସ୍ବାମୀ ପ୍ରଶାନ୍ତ ଏବଂ ତାଙ୍କ ଭଉଣୀ(ନଣନ୍ଦ) ମିଶି ବାପଘରୁ ଟଙ୍କା ଆଣିବାକୁ କହି ମାଡ଼ ମାରୁଥିଲେ। ୨୦୧୮ରେ ଭୁବନେଶ୍ୱରରେ ମାଡ଼ମାରି ତାଙ୍କ ଇଚ୍ଛା ବିରୋଧରେ ଏମ୍ଭି-୩୮ ଗ୍ରାମର ଅସିମ୍ ହଲ୍ଦାର ନାମକ ବ୍ୟକ୍ତିଙ୍କୁ ରଞ୍ଜିତାଙ୍କ ଏକ କିଡ୍ନୀ ବିକିଦେଲେ। ସେ ବାବଦ ଟଙ୍କା ସ୍ବାମୀ ଏବଂ ନଣନ୍ଦ ନେଇ ଖର୍ଚ୍ଚ କରିଦେଲେ। ଗୋଟିଏ କିଡ୍ନୀ ଥିବାରୁ ଏବେ ଶରୀର ଅସୁସ୍ଥ। ଏଭଳି ପରିସ୍ଥିତିରେ ପ୍ରଶାନ୍ତ ଅନ୍ୟତ୍ର ବିବାହ କରିଛନ୍ତି। ୨ ଝିଅ ପୁଅଙ୍କୁ କେମିତି ପୋଷିବେ ସେନେଇ ରଞ୍ଜିତା ଚିନ୍ତାରେ ରହିଛନ୍ତି। ସ୍ବାମୀ ଏବଂ ନଣନ୍ଦଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସେ ଦାବି କରିଛନ୍ତି।
ଏ ନେଇ ରଞ୍ଜିତା ପ୍ରଥମେ ଜୁଲାଇ ୨୮ରେ ମାଲକାନଗିରି ଥାନାରେ ଏତଲା ଦେଇଥିବାବେଳେ ବୁଧବାର ପୁଣି ଥାନାକୁ ଆସି ନ୍ୟାୟ ଦାବି କରିଛନ୍ତି। ଏ ନେଇ ଥାନାରେ ୪୩୨/୨୨ ରେ ଏକ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ମାଲକାନଗିରି ଆଦର୍ଶ ଥାନା ଅଧିକାରୀ ରିଗାନ୍ କିଣ୍ଡୋ କହିଛନ୍ତି। ଅନ୍ୟପକ୍ଷରେ ଘଟଣା ନେଇ ରଞ୍ଜିତାଙ୍କ ସ୍ବାମୀ ପ୍ରଶାନ୍ତଙ୍କ ସହ ଯୋଗାଯୋଗ ହୋଇପାରି ନ ଥିବାରୁ ପ୍ରତିକ୍ରିୟା ମିଳିପାରିନାହିଁ।
