ଭୋପାଳ, ୧୬।୯: ଦୀର୍ଘ ୫ ବର୍ଷ ଧରି ନିଖୋଜ ଥିବା ମଧ୍ୟପ୍ରଦେଶ ରଓ୍ବେ ଜିଲାର ଅନିଲ ପାକିସ୍ତାନ ଜେଲରୁ ମୁକ୍ତି ହେଉଛନ୍ତି। ଏହି ଖବର ଅନିଲଙ୍କ ପରିବାରରେ ଖୁସିର ଲହରୀ ଖେଳାଇ ଦେଇଛି। ରଓ୍ବୋ ଜିଲା ଛନ୍ଦହଇ ଗ୍ରାମର ବାସିନ୍ଦା ଅନିଲ ସାକେତ୍ ୩ ଜାନୁୟାରୀ ୨୦୧୫ରୁ ହଠାତ୍ ଘରୁ ନିଖୋଜ ଥିଲେ। ଏହାପରେ ତାଙ୍କ ପରିବାର ଲୋକ ନିଖୋଜ ହୋଇଥିବା ନେଇ ଥାନାରେ ମାମଲା ରୁଜୁ କରିଥିଲେ। ତେବେ ଜୁନ୍ ୨୦୧୯ରେ ଅନିଲ ପାକିସ୍ତାନର ଲାହୋର ଜେଲରେ ବନ୍ଦୀ ଥିବା ବୈଦେଶିକ ବିଭାଗ ପକ୍ଷରୁ ସ୍ଥାନୀୟ ଥାନାକୁ ଖବର ଆସିଥିଲା। ଅନିଲଙ୍କ ମାନସିକ ଅବସ୍ଥା ଖରାପ ଥିଲା। ତେଣୁ ଆଶଙ୍କା କରାଯାଉଛି ସେ ସାରା ଦେଶ ବୁଲି ବୁଲି ପାକିସ୍ତାନରେ ପହଞ୍ଚି ଯାଇଥିବେ। ତେବେ ଅନିଲ ଏବେ ଲାହୋର ଜେଲରୁ ମୁକ୍ତି ହେଉଥିବା ଖବର ଶୁଣି ତାଙ୍କ ପରିବାରରେ ଖୁସିରେ ଆତ୍ମହରା ହୋଇପଡ଼ିଛନ୍ତି। ପରିବାର ଲୋକ କେତେ ଶୀଘ୍ର ଅନିଲ ଘରେ ପହଞ୍ଚିବ ଅନାଇ ବସିଛନ୍ତି।
କିନ୍ତୁ ଅନିଲଙ୍କ ସ୍ତ୍ରୀ ଏହି ଖବର ଶୁଣି ଦ୍ୱନ୍ଦ୍ୱରେ ପଡ଼ି ଯାଇଛନ୍ତି। ୩ ବର୍ଷ ଅପେକ୍ଷା କରି ଶେଷରେ ଅନିଲ ମରିଯାଇଥିବା ଭାବି ତାଙ୍କ ସ୍ତ୍ରୀ ବାପ ଘର ପଳାଇଥିଲେ। ଏବଂ ସେଠାରେ ଦ୍ୱିତୀୟ ବିବାହ କରିଥିଲେ। ଅନିଲ ଫେରୁଥିବାରୁ ତାଙ୍କ ସ୍ତ୍ରୀ ଏବେ କ’ଣ କରିବେ ସେ ନେଇ ଦ୍ୱନ୍ଦ୍ୱରେ ପଡ଼ି ଯାଇଛନ୍ତି।
