ଭୋପାଳ, ୯।୯: ମଧ୍ୟପ୍ରଦେଶର ରାଜଧାନୀ ଭୋପାଳରୁ ଝଡ଼ାଫୁଙ୍କା ବାହାନାରେ ଜଣେ ମହିଳାଙ୍କୁ ବଳାତ୍କାର କରାଯାଇଥିବା ଭଳି ସମ୍ବେଦନଶୀଳ ଘଟଣା ସାମ୍ନାକୁ ଆସିଛି। ଘଟଣାରୁ ଜଣାପଡ଼ିଛି ଯେ, ମହିଳାଙ୍କ କୌଣସି ପିଲାଛୁଆ ହଉ ନ ଥିଲା। ତେଣୁ ଏଥିରେ ବିବ୍ରତ ହୋଇ ତାଙ୍କ ସ୍ବାମୀ ଓ ଶାଶୁ ଜଣେ ବାବାଙ୍କ ପାଖକୁ ନେଇଯାଇଥିଲେ। କିନ୍ତୁ ବାବାଜଣଙ୍କ ମହିଳାଙ୍କୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ମହିଳାଙ୍କ ଅଭିଯୋଗ ଆଧାରରେ ପୋଲିସ ବାବାଙ୍କ ସମେତ ତାଙ୍କ ସ୍ବାମୀ ଓ ଶାଶୁଙ୍କୁ ଗିରଫ କରିଛି।
ଜଣାପଡ଼ିଛି ଯେ, ପୀଡ଼ିତା ମହିଳାଜଣଙ୍କ ବିବାହ ୧୦ ଜୁନ୍ ୨୦୧୯ରେ ଆଗର ଗ୍ରାମରେ ହୋଇଥିଲା। ବିବାହର ବର୍ଷକ ପରେ ମଧ୍ୟ ମହିଳାଙ୍କ କୌଣସି ପିଲାଛୁଆ ନ ଥିଲେ। ତେଣୁ ଗତ ମାସ ୮ରେ ମହିଳାଙ୍କ ସ୍ବାମୀ ଓ ଶାଶୁ ତାଙ୍କୁ କଲ୍ଲା ଶାହ ନାମକ ଜଣେ ବାବାଙ୍କ ପାଖକୁ ନେଇଯାଇଥିଲେ। ଏହାପରେ ବାବାଜଣଙ୍କ ମହିଳାଙ୍କୁ ଗୋଟିଏ ରୁମ୍କୁ ନେଇ ସେଠାରେ ବଳାତ୍କାର କରିଥିଲେ। ଏହି ଘଟଣା ବାହାରେ ପ୍ରକାଶ କଲେ ତାଙ୍କୁ ଜୀବନରୁ ମାରି ଦେେବେ ବୋଲି ମହିଳାଙ୍କୁ ଧମକ ଦେଇଥିଲେ। ଏହାପରେ ପୁନର୍ବାର ୧୮ ତାରିଖରେ ମହିଳାଙ୍କୁ ତାଙ୍କ ସ୍ବାମୀ ଓ ଶାଶୁ ପୁଣିଥରେ ବାବାଙ୍କ ପାଖକୁ ନେଇଥିଲେ। ବାବା ପୁଣିଥରେ ମହିଳାଙ୍କୁ ଅଲଗା ରୁମ୍କୁ ନେଇ ବଳାତ୍କାର କରିଥିଲେ। ଏଥର କିନ୍ତୁ ମହିଳାଜଣଙ୍କ ସମସ୍ତ ଘଟଣା ତାଙ୍କ ସ୍ବାମୀ, ଶାଶୁ ଓ ମାମୁଁଙ୍କୁ ଜଣାଇଥିଲେ। ଏହାପରେ ପୋଲିସରେ ଅଭିଯୋଗ ହୋଇଥିଲା। ପୋଲିସ ଏହି ଘଟଣାରେ ପ୍ରଥମେ ମହିଳାଙ୍କ ସ୍ବାମୀ ଓ ଶାଶୁଙ୍କୁ ଗିରଫ କରିଥିଲା। ପରେ ଫେରାର୍ ହୋଇଯାଇଥିବା ବାବାଙ୍କୁ ଗିରଫ କରିବାରେ ସଫଳ ହୋଇଥିଲା।
