ବଳାତ୍କାରରୁ ବର୍ତ୍ତିବା ପାଇଁ ଟ୍ରେନ୍‌ରୁ ଡେଇଁଲେ

ହାଇଦ୍ରାବାଦ, ୨୫ା୩: ହାଇଦ୍ରାବାଦରେ ଜଣେ ଯୁବତୀ (୨୩) ବଳାତ୍କାରରୁ ବର୍ତ୍ତିବା ପାଇଁ ଚଳନ୍ତା ଟ୍ରେନ୍‌ରୁ ଡେଇଁ ପଡ଼ିଛନ୍ତି। ତାଙ୍କୁ ଆହତ ଅବସ୍ଥାରେ ହାଇଦ୍ରାବାଦର ରାହୋଗିରୋସ୍ଥିତ ଏକ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି। ଟ୍ରେନ୍‌ ମଧ୍ୟରେ ଜଣେ ଯୁବକ ତାଙ୍କୁ ବଳାତ୍କାର କରିବାକୁ ଉଦ୍ୟମ କରିଥିଲେ ବୋଲି ଯୁବତୀ ଜଣକ କହିଛନ୍ତି।

ହସ୍ପିଟାଲରେ ଚିକିତ୍ସିତ ହେଉଥିବା ଅବସ୍ଥାରେ ରେଲଓ୍ବେ ପୋଲିସ (ଜିଆର୍‌ପି)କୁ ବୟାନ ଦେଇ ପୀଡ଼ିତା କହିଛନ୍ତି, ରବିବାର ରାତିରେ ସେ ସିକନ୍ଦରାବାଦ ରେଲଓ୍ବେ ଷ୍ଟେଶନରୁ ମେଡ୍‌ଚଲ ଅଭିମୁଖେ ଏକ ମଲ୍ଟି ମୋଡାଲ ଟ୍ରାନ୍ସପୋର୍ଟ ସର୍ଭିସ (ଏମ୍‌ଏମ୍‌ଟିଏସ୍‌) ଟ୍ରେନର ମହିଳା କୋଚ୍‌ରେ ଯାଉଥିଲେ। ଅଲ୍‌ଓ୍ବଲ ରେଲଓ୍ବେ ଷ୍ଟେଶନରେ ୨ ଜଣ ମହିଳା ଯାତ୍ରୀ ଟ୍ରେନ୍‌ରୁ ଓହ୍ଲାଇ ପଡ଼ିବା ପରେ ସେ ଉକ୍ତ କୋଚ୍‌ରେ ଏକୁଟିଆ ହୋଇଯାଇଥିଲେ।

ତେବେ ଏହି ସମୟରେ ଜଣେ ଅଚିହ୍ନା ଯୁବକ ଆସି ତାଙ୍କ ସହ ଯୌନ ସମ୍ପର୍କ ରଖିବାକୁ ଇଚ୍ଛା ଜାହିର କରିଥିଲେ। ଏଥିରେ ପୀଡ଼ିତା ଜଣକ ଅସହମତି ପ୍ରକାଶ କରିବାରୁ ଯୁବକ ଜଣକ ତାଙ୍କୁ ବଳାତ୍କାର କରିବାକୁ ଉଦ୍ୟମ କରିଥିଲେ। ଫଳରେ ସେ ଜୀବନ ବିକଳରେ ଚଳନ୍ତା ଟ୍ରେନ୍‌ରୁ ଡେଇଁ ପଡ଼ିଥିଲେ ବୋଲି ପୀଡ଼ିତା କହିଛନ୍ତି। ପୀଡ଼ିତାଙ୍କ ମୁଣ୍ଡ, ଓଠ, ଡାହାଣ ହାତ ଏବଂ ଅଣ୍ଟାରେ ଆଘାତ ଲାଗି ରକ୍ତସ୍ରାବ ହୋଇଥିଲା ବୋଲି ସ୍ଥାନୀୟ ଜିଆର୍‌ପି ଅଧିକାରୀ କହିଛନ୍ତି।

ପୀଡ଼ିତାଙ୍କ ଅଭିଯୋଗ ଆଧାରରେ ପୋଲିସ ଭାରତୀୟ ନ୍ୟାୟ ସଂହିତା (ବିଏନ୍‌ଏସ୍‌)ର ଧାରା ୭୫ (ମହିଳାଙ୍କୁ ଆକ୍ରମଣ) ଓ ୧୩୧ (ଆପରାଧିକ ବଳ ପ୍ରୟୋଗ) ଅନୁଯାୟୀ, ମାମଲା ରୁଜୁ କରିଛି। ଗତ ୨୨ରେ ପୀଡ଼ିତା ନିଜ ମୋବାଇଲ ଫୋନ୍‌ର ଡିସପ୍ଲେ ଠିକ୍‌ କରାଇବାକୁ ମେଡ୍‌ଚଲରୁ ସିକନ୍ଦରାବାଦ ଆସିଥିଲେ।