ହାଇଦ୍ରାବାଦ,୨୦।୯: ତେଲେଙ୍ଗାନାରେ ବାଲାପୁର ଗଣେଶଙ୍କ ଠାରେ ଭୋଗ ଲାଗି କରାଯାଉଥିବା ସବୁଠାରୁ ପ୍ରସିଦ୍ଧ ୨୧ କିଲୋଗ୍ରାମ ଲଡୁ ନିଲାମ ହୋଇଛି। ଏହି ଲଡୁ ପ୍ରାୟ ୧୮ ଲକ୍ଷ ୯୦ ହଜାର ଟଙ୍କାରେ ନିଲାମ କରାଯାଇଥିଲା। ଆନ୍ଧ୍ରପ୍ରଦେଶ ବିଧାନ ପରିଷଦର ସଦସ୍ୟ ରମେଶ ଯାଦବ ତେଲେଙ୍ଗାନାର ନାଦରଗୁଲର ବ୍ୟବସାୟୀ ମେରି ଶଶନ ରେଡ୍ଡୀଙ୍କ ସହ ମିଶି ଏହି ଲଡୁ କିଣିଛନ୍ତି। ଏହି ଲଡୁ ପାଇଁ ଟେଣ୍ଡର ୧,୧୧୬ ଟଙ୍କାରୁ ଆରମ୍ଭ ହୋଇଥିଲା ଏବଂ କିଛି ମିନିଟ ମଧ୍ୟରେ ଶହ ଶହ ଭକ୍ତ ଏହାକୁ ଉଚ୍ଚ ଦାମ୍ରେ କିଣିବାକୁ ପ୍ରସ୍ତୁତ ହୋଇଯାଇଥିଲେ। ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଓ୍ବାଇଏସ୍ ଜଗନ ମୋହନ ରେଡ୍ଡୀଙ୍କୁ ରମେଶ ଯାଦବ ଏହି ଲଡୁକୁ ଉପହାର ସ୍ବରୂପ ଦେଇଛନ୍ତି।
ସୂଚନାଯୋଗ୍ୟ, ୨୦୧୯ ମସିହାରେ ବ୍ୟବସାୟୀ କୋଲାନୁ ରାମା ରେଡ୍ଡୀ ୧୭ ଲକ୍ଷ ୬୦ ହଜାର ଟଙ୍କାରେ ଲଡୁ କିଣିଥିଲେ ଏବଂ ସେ ଏହି ବର୍ଷ ନିଲାମରେ ମଧ୍ୟ ଅଂଶଗ୍ରହଣ କରିଥିଲେ। ରାଜ୍ୟ ଶିକ୍ଷା ମନ୍ତ୍ରୀ ପି ସବିତା ଇନ୍ଦ୍ରା ରେଡ୍ଡୀ, ପୂର୍ବତନ ବିଧାୟକ ଟି କୃଷ୍ଣା ରେଡ୍ଡୀ ଏବଂ ଅନ୍ୟାନ୍ୟ ନେତା ଲଡୁ ନିଲାମରେ ଉପସ୍ଥିତ ଥିଲେ।ବାଲାପୁର ଗ୍ରାମରେ ଲଡୁର ବାର୍ଷିକ ନିଲାମ ସହ ହାଇଦ୍ରାବାଦରେ ଗଣେଶ ବିସର୍ଜନ ଆରମ୍ଭ ହୋଇଛି। ପ୍ରତିବର୍ଷ ଲଡୁସ ନିଲାମ ଆୟୋଜନ କରୁଥିବା ବାଲାପୁର ଗଣେଶ ଉତ୍କଳ ସମିତି ଅନୁଯାୟୀ, ୧୯୯୪ରେ ଅନୁଷ୍ଠିତ ପ୍ରଥମ ନିଲାମରେ ଏହି ଲଡୁ ୪୫୦ ଟଙ୍କାରେ ବିକ୍ରି ହୋଇଥିଲା। ସେବେଠାରୁ ଏହି ଲଡୁର ଲୋକପ୍ରିୟତା ଏବଂ ମୂଲ୍ୟରେ କ୍ରମାଗତ ବୃଦ୍ଧି ଘଟିଛି। ବିଶ୍ୱାସ କରାଯାଏ ଯେ, ଏହି ଲଡୁ ବିଜେତାଙ୍କ ପାଇଁ ସମୃଦ୍ଧତା ଆଣିଥାଏ, ତେଣୁ ବଡ ବ୍ୟବସାୟୀ ଏବଂ ରାଜନେତାମାନେ ପ୍ରତିବର୍ଷ ଟେଣ୍ଡର ପାଇଁ ପ୍ରତିଦ୍ୱନ୍ଦ୍ୱିତା କରନ୍ତି। ବିଜେତା କେବଳ ନିଜ ପରିବାର ଏବଂ ସାଙ୍ଗମାନଙ୍କ ମଧ୍ୟରେ ଲଡୁ ଖଣ୍ଡ ବଣ୍ଟନ କରନ୍ତି ନାହିଁ, ବରଂ ତାଙ୍କ ଚାଷ, କାରଖାନା ଏବଂ ଘରେ ଲଡୁ ଖଣ୍ଡ ମଧ୍ୟ ଛିଞ୍ଚନ୍ତି।