ନୂଆଦିଲ୍ଲୀ,୮।୧୨: ଆର୍ମି ଅଫିସର(ସେନା ଅଧିକାରୀ) ହେବାର ସ୍ବପ୍ନ ଥିଲା। ହେଲେ ମା’ଙ୍କ ପରାମର୍ଶ ମୁତାବକ ସେ କ୍ରିକେଟର ହୋଇଥିଲେ ବୋଲି କହିଛନ୍ତି ଭାରତୀୟ କ୍ରିକେଟ ଟିମ୍ର ପୂର୍ବ ଓପନର୍ ଗୌତମ ଗମ୍ଭୀର। ୟୁଟ୍ୟୁବର ଗୌରବ କପୁରଙ୍କ ଶୋ’ ବ୍ରେକ୍ଫାଷ୍ଟ ଉଇଥ୍ ଚାମ୍ପିଆନ୍ସରେ କେଉଁ କଥାକୁ ସେ ସବୁବେଳେ ମନେପକାନ୍ତି ପ୍ରଶ୍ନରେ ଗମ୍ଭୀର କହିଛନ୍ତି, ପିଲାଟିବେଳୁ ସେନାରେ ଭର୍ତ୍ତି ହେବାକୁ ସେ ଲକ୍ଷ୍ୟ ରଖିଥିଲେ। ଦ୍ୱାଦଶ ପରେ ଏନ୍ଡିଏରେ ଦାଖଲ ହୋଇଥାନ୍ତେ। ସେଠାରୁ ଆଇଏମ୍ଏ ଯାଇଥାନ୍ତେ। ହେଲେ ଠିକ୍ ସେତିକିବେଳେ ରଣଜୀ ଟ୍ରଫି ଖେଳିବା ପାଇଁ ତାଙ୍କୁ ସୁଯୋଗ ମିଳିଥିଲା। କ୍ରିକେଟ ଖେଳିବେ ନା ସେନାରେ ଯୋଗଦେବେ, ଉଭୟକୁ ନେଇ ଦ୍ୱନ୍ଦରେ ଥିଲେ ସେ। ଏଭଳି ପରିସ୍ଥିତି ଦେଖି ତାଙ୍କ ମା’ ରଣଜୀ ଖେଳିବାକୁ ପରାମର୍ଶ ଦେଇଥିଲେ। ଭାରତ ପାଇଁ ଖେଳିବାରୁ ସେ ଗୋଟିଏ ପାଦ ଦୂରରେ ବୋଲି ସେ କହିଥିଲେ। ସେତେବେଳେ କ୍ରିକେଟରେ ତିନୋଟି ସୋପାନ ଥିଲା। ଗୋଟିଏ ଅଣ୍ଡର-୧୯, ରଣଜୀ ଟ୍ରଫି ଏବଂ ତା ପରେ ସିଧା ଭାରତ ପାଇଁ ଖେଳିବା। ଯଦି ସେ କଠିନ ପରିଶ୍ରମ କରନ୍ତି ତେବେ ରଣଜୀରେ ଭଲ ପ୍ରଦର୍ଶନ କରିବେ। ଏହାପରେ ଭାରତ ପାଇଁ ଖେଳିବାକୁ ତାଙ୍କୁ ସୁଯୋଗ ମିଳିଯିବ ବୋଲି ମା’ କହିଥିଲେ। ଏହାପରେ ସେ ତାହା ହିଁ କରିଥିଲେ। ହେଲେ ସେନାବାହିନୀ ପ୍ରତି କିଛି କରିବାକୁ ସେ ନିର୍ଣ୍ଣୟ ନେଇଥିଲେ। ଏବେ ସେ ସୁକମା ଆକ୍ରମଣରେ ଶହୀଦ ହୋଇଥିବା ସିଆର୍ପିଏଫ୍ର ୨୫ଜଣ ଯବାନଙ୍କ ପିଲାମାନଙ୍କୁ ସାରା ଜୀବନ ଭରଣପୋଷଣ ଦେବାକୁ ନିଷ୍ପତ୍ତି ନେଇଛନ୍ତି। ସେମାନଙ୍କୁ ଶିକ୍ଷାଦାନ ନିମନ୍ତେ ସବୁ ଚେଷ୍ଟା କରୁଛନ୍ତି। ଆଗାମୀ ଦିନରେ ମଧ୍ୟ ସେ ଅଧିକ କାମ କରିବେ ବୋଲି ଗମ୍ଭୀର କହିଛନ୍ତି।