ନୂଆଦିଲ୍ଲୀ,୨୪।୧୨: ଟିଏମସି ଏମ୍ପି ପରିହାସ କରିବା ପରେ ଉପରାଷ୍ଟ୍ରପତି ଜଗଦୀପ ଧନଖର ମୁହଁ ଖୋଲିଛନ୍ତି। ଉପରାଷ୍ଟ୍ରପତି ତାଙ୍କ ସରକାରୀ ବାସଭବନରେ ଇଣ୍ଡିଆନ୍ ଷ୍ଟାଟିଟିକାଲ୍ ସର୍ଭିସର ପ୍ରୋବେସନର୍ସଙ୍କୁ ସମ୍ବୋଧିତ କରି କହିଛନ୍ତି, ମୁଁ ଜଣେ ପୀଡିତ। ମୋତେ ବାରମ୍ବାର ଅପମାନର ସମ୍ମୁଖୀନ ହେବାକୁ ପଡୁଛି। ନିକଟରେ ବିରୋଧୀ ଏମ୍ପିଙ୍କ ଦ୍ୱାରା ରାଜ୍ୟ ସଭା ଅଧ୍ୟକ୍ଷଙ୍କ ଅନୁକରଣକୁ ନେଇ ଅନେକ ବିବାଦ ଦେଖାଦେଇଥିଲା। ଏ ସମ୍ପର୍କରେ ସରକାର ବିରୋଧୀଙ୍କୁ ଟାର୍ଗେଟ କରିଥିଲେ।
ଉପରାଷ୍ଟ୍ରପତି କହିଛନ୍ତି,ମୁଁ ଜଣେ ଏମିତି ପୀଡିତ, ଯିଏ ଜାଣନ୍ତି ଏହାକୁ କିପରି ମୁକାବିଲା କରିବେ ଏବଂ ସମସ୍ତ ଅପମାନ ସହି ଭାରତ ମାତାର ସେବା କରିବେ। ମୁଁ ରାଜ୍ୟ ସଭାର ସଭାପତି ଏବଂ ମୁଁ ଉପରାଷ୍ଟ୍ରପତି, ଲୋକମାନେ ମୋତେ ରକ୍ଷା କରନ୍ତି ନାହିଁ! କିନ୍ତୁ ଏହା ମୋର ମାନସିକତାକୁ ପରିବର୍ତ୍ତନ କରିବା ଉଚିତ କି? ଏହା ମୋତେ ମୋ ପଥରୁ ବିଚ୍ଛିନ୍ନ କରିପାରିବ କି? ନା! ମୁଁ ସତ୍ୟର ପଥରେ ଅଛି ଏବଂ ଆମକୁ ସର୍ବଦା ଆଗକୁ ବଢିବାକୁ ପଡିବ।
ନିକଟରେ ସଂସଦର ଶୀତକାଳୀନ ଅଧିବେଶନରେ ବିରୋଧୀ ଏମ୍ପିମାନେ ସଂସଦର ସୁରକ୍ଷା କ୍ଷେତ୍ରରେ ଅବହେଳା ପ୍ରସଙ୍ଗରେ ଗୃହରେ ହଙ୍ଗାମା ସୃଷ୍ଟି କରିଥିଲେ। ଏଥିରେ ବିରୋଧୀ ଏମ୍ପିମାନେ ସଂସଦର ଉଭୟ ଗୃହରୁ ନିଲମ୍ବିତ ହୋଇଥିଲେ। ସଂସଦ ଗୃହ କମ୍ପ୍ଲେକ୍ସରେ ବିରୋଧୀ ଦଳର ନେତାମାନେ ଏହାକୁ ବିରୋଧ କରିଥିଲେ। ଏହି ପ୍ରତିବାଦ ସମୟରେ ଟିଏମସି ଏମ୍ପି କଲ୍ୟାଣ ବାନାର୍ଜୀ ଉପରାଷ୍ଟ୍ରପତି ଜଗଦୀପ ଧନଖରଙ୍କୁ ପରିହାସ କରିଥିଲେ ଏବଂ ତାଙ୍କୁ ଅନୁକରଣ କରିଥିଲେ। କଂଗ୍ରେସ ଏମ୍ପି ରାହୁଲ ଗାନ୍ଧୀ କଲ୍ୟାଣ ବାନାର୍ଜୀଙ୍କର ଏକ ଭିଡିଓ କରୁଥିବା ଦେଖିବାକୁ ମିଳିଥିଲା। ରାଜ୍ୟ ସଭା ଅଧ୍ୟକ୍ଷ ଜଗଦୀପ ଧନଖର ଏଥିରେ ଅସନ୍ତୋଷ ବ୍ୟକ୍ତ କରି ଏହାକୁ ବ୍ୟକ୍ତିଗତ ଆକ୍ରମଣ ବୋଲି କହିଛନ୍ତି।
