![](https://www.dharitri.com/wp-content/uploads/2023/08/Supreme-Court.jpg)
ନୂଆଦିଲ୍ଲୀ,୧୧।୧୧: ସୁପ୍ରିମକୋର୍ଟରେ ଏକ ହତ୍ୟା ମାମଲାର ଶୁଣାଣି ସମୟରେ ଘଟିଛି ଏକ ଆଶ୍ଚର୍ଯ୍ୟକର ଘଟଣା ଘଟିଛି। ଶୁଣାଣି ସମୟରେ ପୀଡିତ ୧୧ ବର୍ଷର ନାବାଳକ ବିଚାରପତିଙ୍କ ସାମ୍ନାରେ ଆସି କହିଛନ୍ତି ଯେ ସେ ଜୀବିତ ଅଛନ୍ତି, ଏବଂ ଏହି ହତ୍ୟା ମାମଲା ମିଥ୍ୟା ଅଟେ। ଖବର ମୁତାବକ ନାବାଳକର ପିତା ଅଜା ଏବଂ ମାମୁଙ୍କ ବିରୋଧରେ ହତ୍ୟା ଅଭିଯୋଗ ଆଣିବା ପରେ ମାମଲା ଆରମ୍ଭ ହୋଇଥିଲା। ଏହି ହତ୍ୟା ମାମଲା ଉତ୍ତରପ୍ରଦେଶର ପିଲିବିଟରେ ପୋଲିସ ଦ୍ୱାରା ପଞ୍ଜିକୃତ ହୋଇଥିଲା।
ପୋଲିସ ନିକଟରେ ଦାଖଲ ହୋଇଥିବା ଏହି ମାମଲା ମିଥ୍ୟା ଉପରେ ଆଧାରିତ ଏବଂ ସେ ଜୀବିତ ବୋଲି ଅଭୟ ସିଂ ନାମକ ପିଲାଟି ମାମଲା ବନ୍ଦ କରିବା ପାଇଁ ଅନେକ ଦପ୍ତର ଦ୍ୱାରସ୍ତ ହେଲେଣି। ସେ ଏହି ମାମଲାରେ ଆହ୍ଲାବାଦ ହାଇକୋର୍ଟର ଏକ ବେଞ୍ଚରେ ହାଜର ହୋଇଥିଲେ ମଧ୍ୟ ତାଙ୍କ ଆବେଦନ ଖାରଜ ହୋଇଯାଇଥିଲା ଯାହା ପରବର୍ତ୍ତୀ ସମୟରେ ତାଙ୍କୁ ସୁପ୍ରିମକୋର୍ଟଙ୍କ ନିକଟକୁ ଯିବାକୁ ବାଧ୍ୟ କରିଥିଲା।
ଶୁକ୍ରବାର ଦିନ ସେ ସୁପ୍ରିମକୋର୍ଟର ଏକ ଡିଭିଜନ୍ ବେଞ୍ଚ ସମ୍ମୁଖରେ ଠିଆ ହୋଇ କହିଛନ୍ତି ଯେ ମୁଁ ଜୀବିତ ଅଛି। ଏହି ମାମଲାକୁ ଦୃଷ୍ଟିରେ ରଖି କୋର୍ଟ ଉତ୍ତରପ୍ରଦେଶ ସରକାର, ପିଲିବିଟ ଆରକ୍ଷୀ ଅଧ୍ୟକ୍ଷ ଏବଂ ନେଉରିଆ ପୋଲିସ ଷ୍ଟେସନ ଷ୍ଟେସନ ଅଧିକାରୀଙ୍କଠାରୁ ରିପୋର୍ଟ ମାଗିଛନ୍ତି।
ଅଭୟ କହିଛନ୍ତି, “ମୁଁ ନିରାପଦରେ ଅଛି ଏବଂ ମୋର ଅଜାଙ୍କ ସହ ରହୁଛି। ପୋଲିସ ଆମ ଘରକୁ ଆସୁଛି ଏବଂ ମୋର ଅଜାଙ୍କୁ ଧମକ ଦେଉଛି। ମୁଁ ସେମାନଙ୍କ ସହ ରହିବାକୁ ଚାହେଁ ଏବଂ ତେଣୁ ମାମଲା ବନ୍ଦ ହେଉ ବୋଲି ଚାହୁଁଛି।” ତେବେ ବାଳକର ଓକିଲ କୁଲଦୀପ ଜୌହରୀ କହିଛନ୍ତି ଯେ ତାଙ୍କ ପିତା ତାଙ୍କ ମା’ଙ୍କୁ ମାଡ ମାରିବା ସହ ଅଧିକ ଯୌତୁକ ଦାବି କରୁଥିବା ହେତୁ ୨୦୧୩ ମସିହାରୁ ତାଙ୍କ ମା’ ଆସି ବାପ ଘରେ ରହୁଥିଲେ। ମା’ଙ୍କ ମୃତ୍ୟୁ ପରେ ପୁଅର ଅଜାଙ୍କ ବିରୋଧରେ ମାମଲା ଦାୟର କରିଥିଲେ।