ମୁଁ ଡରିବି ନାହିଁ, ଏଏପି ଏମ୍ପି ଚିରିଲେ ଉପରାଜ୍ୟପାଳଙ୍କ ମାନହାନୀ ନୋଟିସ୍…
01 ନୂଆଦିଲ୍ଲୀ, ୭।୯ : ଦିଲ୍ଲୀରେ ଆମ ଆଦମୀ ପାର୍ଟି (ଏଏପି) ସରକାର ଏବଂ ଉପରାଜ୍ୟପାଳ ଭି.କେ ସାକ୍ସେନାଙ୍କ ମଧ୍ୟରେ ବିବାଦ କ୍ରମାଗତ ଭାବେ ତୀବ୍ର ହେଉଛି। ଉପରାଜ୍ୟପାଳ ଦ୍ୱାରା ଏଏପି ନେତାଙ୍କ ନିକଟକୁ ପଠାଯାଇଥିବା ଆଇନଗତ ମାନହାନୀ ନୋଟିସକୁ ରାଜ୍ୟସଭା ଏମ୍ପି ସଞ୍ଜୟ ସିଂ ଚିରି ଦେଇଛନ୍ତି। ଉପରାଜ୍ୟପାଳ କୋଟି କୋଟି ଟଙ୍କା ଅପବ୍ୟବହାର କରିଥିବା ସଞ୍ଜୟ ଅଭିଯୋଗ କରିଛନ୍ତି। ଖନୀ ଗ୍ରାମୋଦ୍ୟୋଗର ମୁଖ୍ୟ ଥିବାବେଳେ ଶ୍ରମିକ ଓ କର୍ମଚାରୀମାନଙ୍କୁ ମଜୁରୀ ଦେବାରେ ତ୍ରୁଟି ଦେଖାଦେଇଥିଲା। ଏହାକୁ ଉପରାଜ୍ୟପାଳ ହେରଫେର କରିଥିବା ସେ କହିଛନ୍ତି।
ମାନହାନୀ ନୋଟିସର କପି ଚିରି ସଞ୍ଜୟ କହିଛନ୍ତି ଯେ ମୁଁ ଭି.କେ ସାକ୍ସେନାଙ୍କୁ କହିବାକୁ ଚାହେଁ ଭାରତର ସମ୍ବିଧାନ ମୋତେ ସତ କହିବାର ଅଧିକାର ଦେଇଛି। ଦେଶର ସର୍ବୋଚ୍ଚ ଗୃହର ଜଣେ ସଦସ୍ୟ ଭାବରେ ମୋର ସତ କହିବାର ଅଧିକାର ଅଛି। ମୁଁ ଅଟକି ଯିବି ନାହିଁ, ଡରିବି ନାହିଁ ଏବଂ କିଛି ଦୁର୍ନୀତିଗ୍ରସ୍ତ ବ୍ୟକ୍ତିଙ୍କୁ ନୋଟିସ ପଠାଇବା ନେଇ ଭୟ କରିବି ନାହିଁ । ମୁଁ ଏପରି ନୋଟିସକୁ ୧୦ ଥର ଚିରି ଫୋପାଡି ଦେଇଛି ।
ମଦ ନୀତିକୁ ନେଇ ଭାଜପା ଏବଂ ଏଏପି ମଧ୍ୟରେ ଆରୋପ ପ୍ରତ୍ୟାରୋପ ଜାରି ରହିଛି। ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ମଦ ନୀତିରେ ଭାଜପା ଏକ ଷ୍ଟିଙ୍ଗ ଅପରେଶନ ଭିଡ଼ିଓ ଜାରି କରି ଏଥିରେ କମିଶନ ଗ୍ରହଣ କରାଯାଇଥିବା ଅଭିଯୋଗ କରିଥିଲା।
ଭାଜପା ମୁଖପାତ୍ର ସମ୍ବିତ ପାତ୍ର କହିଥିଲେ ଯେ ଷ୍ଟିଙ୍ଗ ମାଷ୍ଟରଙ୍କର ଷ୍ଟିଙ୍ଗ ହୋଇଛି। ଏହା ଉପରେ ଦିଲ୍ଲୀର ଉପ-ମୁଖ୍ୟମନ୍ତ୍ରୀ ମନୀଷ ସିସୋଡିଆ କହିଛନ୍ତି ଯେ ଦୀର୍ଘ ଦିନ ଧରି ଭାଜପା ପାଟିତୁଣ୍ଡ କରୁଛି ଯେ ଏକ ଦୁୂର୍ନୀତି ହୋଇଛି।
ବେଳେବେଳେ ୧୩୦୦ କୋଟି ଟଙ୍କା, ପୁଣି କେତେବେଳେ୮,୦୦୦କୋଟି, କେବେ ୫୦୦, କେବେ ୧୪୪ କୋଟି, କେବେ ୩୦ କୋଟି ଟଙ୍କା ଦୁର୍ନୀତି ହୋଇଛି ବୋଲି କୁହାଯାଉଛି। ଏସବୁ ମିଥ୍ୟା ଆରୋପ। ଏହାର କୌଣସି ସତ୍ୟାସତ୍ୟ ନାହିଁ ବୋଲୀ ସିସୋଡିଆ କହିଥିଲେ।