ଶାରଜା, ୨୮।୧୦ : ଚଳିତ ଟି୨୦ ବିଶ୍ୱକପ୍ରେ ଦକ୍ଷିଣ ଆଫ୍ରିକାର ପରବର୍ତ୍ତୀ ମ୍ୟାଚ୍ ଲାଗି ନିଜକୁ ଉପଲବ୍ଧ କରିଛନ୍ତି କୁଇଣ୍ଟନ ଡି’କକ୍। ଏହି ଉଇକେଟକିପର ବ୍ୟାଟ୍ସମ୍ୟାନ ମଙ୍ଗଳବାର ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ଖେଳି ନ ଥିଲେ। ‘ବ୍ଲାକ ଲାଇଫ୍ ମ୍ୟାଟର୍ସ’ ଅଭିଯାନ ପ୍ରତି ସମର୍ଥନ ଜାହିର କରିବା ପାଇଁ ମ୍ୟାଚ୍ ପୂର୍ବରୁ କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ) ତା’ର ଖେଳାଳିଙ୍କୁ ଗୋଟିଏ ଆଣ୍ଠୁରେ ଆଣ୍ଠେଇବାକୁ ନିର୍ଦ୍ଦେଶ ଦେଇଥିଲା। କିନ୍ତୁ ଏହାକୁ ବିରୋଧ କରି ମ୍ୟାଚ୍ରେ ନ ଖେଳିବାକୁ ନିଷ୍ପତ୍ତି ନେଇଥିଲେ ଡି’କକ୍। ଏଥି ଯୋଗୁ ସୋସିଆଲ ମିଡିଆରେ ଡି’କକ୍ଙ୍କୁ ପ୍ରବଳ ସମାଲୋଚିତ ହେବାକୁ ପଡ଼ିଥିଲା।
“ମୋ କାରଣରୁ ସୃଷ୍ଟି ହୋଇଥିବା ଦ୍ୱନ୍ଦ୍ୱ ଓ ତିକ୍ତତା ପାଇଁ ମୁଁ ଦୁଃଖିତ। ମୁଁ ଏଭଳି ଗୁରୁତ୍ୱପୂର୍ଣ୍ଣ ଘଟଣା ଉପରେ ଏପର୍ଯ୍ୟନ୍ତ ଚୁପ ଥିଲି। କିନ୍ତୁ ଏବେ ମୋତେ ନିଜ ପକ୍ଷ ରଖିବାକୁ ପଡ଼ିବ। ପ୍ରାୟତଃ ପ୍ରତ୍ୟେକ ଥର ଆମେ ବିଶ୍ୱକପ୍ରେ ଖେଳିବା ପୂର୍ବରୁ କିଛି ନା କିଛି ଡ୍ରାମା ହେଉଛି। ତାହା ଉଚିତ ନୁହେଁ। ଯେଉଁମାନେ ଜାଣି ନାହାନ୍ତି, ସେମାନଙ୍କୁ କହି ଦେବାକୁ ଚାହେଁ ମୁଁ ମିଶ୍ରିତ ପରିବାରରୁ ଆସିଛି। ମୋ ସାବତ ଭଉଣୀ ଓ ମା’ ଶ୍ୟାମଳବର୍ଣ୍ଣର। ଜନ୍ମ ହେବା ପରଠାରୁ ମୋ ପାଇଁ ଶ୍ୟାମଳବର୍ଣ୍ଣର ଲୋକଙ୍କ ଜୀବନ ମାନେ ରଖେ। କେବଳ ଅନ୍ତର୍ଜାତୀୟ ସ୍ତରରେ ଏକ ଅଭିଯାନ ଚାଲିଛି ବୋଲି ମୁଁ ଏହା କହୁନାହିଁ। ଆଉ ମୁଁ ବର୍ଣ୍ଣ ବଷୈମତାକୁ ବିରୋଧ କରେ। ମୋ ମତରେ ସଭିଙ୍କ ଅଧିକାର ସମାନ। ସିଏସ୍ଏ ପକ୍ଷରୁ ନିର୍ଦ୍ଦେଶ ଜାରି ହେବା ପରେ ମୋ ଅଧିକାର ଛଡ଼ାଇ ନିଆଯାଉଥିବା ଭଳି ମନେ ହୋଇଥିଲା। ମୋତେ ସମର୍ଥନ କରିଥିବାରୁ ଅଧିନାୟକ ତେମ୍ବା ବଭୁମାଙ୍କୁ ଧନ୍ୟବାଦ୍” ବୋଲି ଡି’କକ୍ ଲେଖିଛନ୍ତି।