ପୁଣେ,୨୯।୭: ଆଜିକାଲି ମହାରାଷ୍ଟ୍ର ନବନିର୍ମାଣ ସେନା ମୁଖ୍ୟ ରାଜ ଠାକରେ ନିଜର ଏକ ମନ୍ତବ୍ୟକୁ ନେଇ ଚର୍ଚ୍ଚାରେ ଅଛନ୍ତି। ରାଜ ଠାକରେ ତିନି ଦିନିଆ ପୁଣେର ଗସ୍ତରେ ଅଛନ୍ତି। ଏହି ସମୟରେ ଗଣମାଧ୍ୟମ ବ୍ୟକ୍ତିମାନେ ରାଜ ଠାକରେଙ୍କ ଫଟୋ ଉଠାଇବା ଆରମ୍ଭ କରିଥିଲେ, ସେତେବେଳେ ସେ କହିଥିଲେ ଯେ, ମୁଁ କ’ଣ ରାଜ କୁନ୍ଦ୍ରା, ମୋର ଫଟୋ ନେଉଛ। ରାଜ ଠାକରେ ବୋଧହୁଏ ତାଙ୍କ ଫଟୋ ଉଠାଇବାକୁ ପସନ୍ଦ କରୁ ନ ଥିଲେ ଏବଂ ଥଟ୍ଟା କରି ଏପରି କହିଥିଲେ। ଏକଥା ଶୁଣିବା ପରେ ସେଠାରେ ଏକ ହାସ୍ୟରୋଳ ପରିବେଶ ସୃଷ୍ଟି ହୋଇଥିଲା। ତାଙ୍କର ଏହି ବିବୃତ୍ତି ବର୍ତ୍ତମାନ ଚାରିଆଡେ ଆଲୋଚନା ହେଉଛି। ସୋସିଆଲ ମିଡିଆରେ ଏହା ମଧ୍ୟ ଭାଇରାଲ ହେବାରେ ଲାଗିଛି। ଆଗାମୀ ପୌରସଂସ୍ଥା ନିର୍ବାଚନ ପାଇଁ ଦଳର ରଣନୀତି ପ୍ରସ୍ତୁତ କରିବାକୁ ରାଜ ଠାକରେ ପୁଣେରେ ପହଞ୍ଚିଥିଲେ। ଏହି ମନ୍ତବ୍ୟ ପୂର୍ବରୁ ରାଜ ଠାକରେଙ୍କ ଆଉ ଏକ ମନ୍ତବ୍ୟ ମଧ୍ୟ ଚର୍ଚ୍ଚାରେ ରହିଥିଲା। ଯେଉଁଥିରେ ତାଙ୍କୁ ମାସ୍କ ପିନ୍ଧିବାକୁ କୁହାଯାଇଥିଲା। ଏହା ଉପରେ ଠାକରେ କହିଥିଲେ ଯେ, ମୁଁ ପିନ୍ଧେ ନାହିଁ, ମୁଁ ମାସ୍କ ବ୍ୟବହାର କରେ ନାହିଁ।
ସୂଚନାଯୋଗ୍ୟ,ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ସ୍ବାମୀ ରାଜ କୁନ୍ଦ୍ରାଙ୍କୁ ଅଶ୍ଳୀଳ ଚଳଚ୍ଚିତ୍ର ନିର୍ମାଣ କରି ଆପରେ ଅପଲୋଡ କରି କିଛି ଦିନ ପୂର୍ବରୁ ମୁମ୍ବାଇ ପୋଲିସ ଗିରଫ କରିଥିଲା।
