ନୂଆଦିଲ୍ଲୀ,୨୧।୯: ସଂସଦର ସ୍ବତନ୍ତ୍ର ଅଧିବେଶନରେ ମହିଳା ସଂରକ୍ଷଣ ବିଲ ଉପରେ ବିତର୍କ ଚାଲିଛି। ଗୁରୁବାର ଲୋକସଭାରେ ପ୍ରଧାନମନ୍ତ୍ରୀ ମୋଦି ଏଥିପାଇଁ ସମସ୍ତ ସାଂସଦଙ୍କୁ ଧନ୍ୟବାଦ ଦେଇଥିବା ବେଳେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟ ବିରୋଧୀଙ୍କ ସହଯୋଗକୁ ପ୍ରଶଂସା କରିଛନ୍ତି। ରାଜନାଥ ଭାଷଣ ଦେଉଥିବାବେଳେ କଂଗ୍ରେସ ବାରମ୍ବାର ଏହାକୁ ଭଣ୍ଡୁର କରିବାକୁ ଚେଷ୍ଟା କରିଥିଲା। ପରେ ପ୍ରତିରକ୍ଷା ମନ୍ତ୍ରୀ ଏହାର କଡ଼ା ଜବାବ ଦେଇଥିଲେ।
ମହିଳା ସଂରକ୍ଷଣ ବିଲ ପାଇଁ ରାଜନାଥ ସିଂ ଲୋକସଭାରେ ସାଂସଦମାନଙ୍କୁ ଧନ୍ୟବାଦ ଦେଉଥିବାବେଳେ କଂଗ୍ରେସ ନେତା ଅଧୀର ରଂଜନ ଚୌଧୁରୀ ତାଙ୍କୁ ଅନେକ ଥର ବାଧା ଦେବାକୁ ଚେଷ୍ଟା କରିଥିଲେ। ଅଧୀର ରଂଜନ ଚାଇନା ଉପରେ ରାଜନାଥଙ୍କୁ ପ୍ରଶ୍ନ କରିବାକୁ ଚେଷ୍ଟା କରିଥିଲେ। ରାଜନାଥ ତାଙ୍କୁ ଗୋଟିଏ କିମ୍ବା ଦୁଇଥର ଏଡାଇ ଯାଇଥିଲେ। ତଥାପି ସେ ନ ମାନି ପ୍ରଶ୍ନ ପଚାରି ଚାଲିଥିଲେ। ଯେତେବେଳେ ଲଦାଖରେ ଚାଇନା ସହ ମୁହାଁମୁହିଁ ପ୍ରସଙ୍ଗରେ ଆଲୋଚନା କରିବାକୁ ସରକାରଙ୍କର ସାହସ ଅଛି କି ନାହିଁ ବୋଲି ଅଧୀର ରଂଜନ ପଚାରିଥିଲେ, ରାଜନାଥ ଏଥିରେ ଦ୍ୱିଧାବୋଧ ନ କରି କହିଥିଲେ, ଅଧୀର ରଂଜନ ଜୀ, ଇତିହାସକୁ ଯାଅ ନାହିଁ। ଆଲୋଚନା ମଧ୍ୟ ଚାଇନା ଉପରେ ହେବ। ଆପଣ ଯାହା କହିଛନ୍ତି ତାହା ଆମେ ଶୁଣିଛୁ, ବର୍ତ୍ତମାନ ଆମ କଥା ମଧ୍ୟ ଶୁଣ। ମୁଁ ଛାତି ଚଉଡା କରି ଆଲୋଚନା ପାଇଁ ପ୍ରସ୍ତୁତ ଅଛି।
