କୋଲକାତା,୨୦।୬: ପଶ୍ଚିମବଙ୍ଗର ରାଜ୍ୟପାଳ ସି.ଭି. ବୋଷ ନିକଟରେ ରାଜଭବନ ପରିସର ଖାଲି କରିବାକୁ ପୋଲିସ କର୍ମଚାରୀଙ୍କୁ ନିର୍ଦ୍ଦେଶ ଦେବାର କିଛି ଦିନ ପରେ ଏକ ଚାଞ୍ଚଲ୍ୟକର ମନ୍ତବ୍ୟ ଦେଇଛନ୍ତି। ତେବେ ରାଜ୍ୟପାଳ ଭବନରେ ଏବେ ବି ପୋଲିସ ନିୟୋଜିତ ଥିବା ନେଇ ବୋଷ କହିଛନ୍ତି, ମୁଁ ଭାବୁଛି ଏବେ ରାଜଭବନରେ ନିଯୁକ୍ତ ପୋଲିସ ମୋର ବ୍ୟକ୍ତିଗତ ସୁରକ୍ଷା ପ୍ରତି ବିପଦ। ମୁଁ ରାଜଭବନରେ କୋଲକାତା ପୋଲିସ ସହ ନିଜକୁ ଅସୁରକ୍ଷିତ ମନେ କରୁଛି ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ସୂଚନା ଦେଇଥିଲି। କିନ୍ତୁ ଏପର୍ଯ୍ୟନ୍ତ କୌଣସି କାର୍ଯ୍ୟନୁଷ୍ଠାନ ନିଆଯାଇ ନାହିଁ।
ରାଜଭବନ ପକ୍ଷରୁ ସୂଚନା ଦିଆଯାଇଛି ଯେ, ବୋଷ ରାଜ୍ୟ ପୋଲିସ ବିରୋଧରେ କ୍ରମାଗତ ଗୁପ୍ତଚର କରୁଥିବା ଅଭିଯୋଗ ଆଣିଛନ୍ତି। ବାହାରର କିଛି ପ୍ରଭାବଶାଳୀ ଲୋକଙ୍କ ପ୍ରରୋଚନାରେ ସେମାନେ ଏଭଳି କାମ କରୁଥିବା ଅଭିଯୋଗ ହେଉଛି।
ସୂଚନାଯୋଗ୍ୟ, ନିକଟରେ ରାଜ୍ୟପାଳ ସିଭି ଆନନ୍ଦ ବୋଷ ରାଜ ଭବନରେ ନିୟୋଜିତ କୋଲକାତା ପୋଲିସ କର୍ମଚାରୀଙ୍କୁ ତୁରନ୍ତ ଘର ଖାଲି କରିବାକୁ ନିର୍ଦ୍ଦେଶ ଦେଇଥିଲେ। ବୋଷ ରାଜ ଭବନର ଉତ୍ତର ଫାଟକ ନିକଟରେ ଅବସ୍ଥିତ ପୋଲିସ ପୋଷ୍ଟକୁ ‘ଜନ ମଞ୍ଚ’ରେ ପରିଣତ କରିବାକୁ ଯୋଜନା କରୁଛନ୍ତି।
କିଛି ଦିନ ପୂର୍ବରୁ ପୋଲିସ ଭାଜପା ନେତା ଶୁଭେନ୍ଦୁ ଅଧିକାରୀ ଏବଂ ରାଜ୍ୟରେ ନିର୍ବାଚନ ହିଂସାର ଶିକାର ହୋଇଥିବା ବ୍ୟକ୍ତିମାନେ ବୋଷଙ୍କୁ ଭେଟିବା ପାଇଁ ରାଜ ଭବନରେ ପ୍ରବେଶ କରିବା ବନ୍ଦ କରିଦେଇଥିଲେ ମଧ୍ୟ ରାଜ୍ୟପାଳ ଏହା ପାଇଁ ଲିଖିତ ଅନୁମତି ଦେଇଥିଲେ। ଏହା ପରେ ରାଜ୍ୟପାଳଙ୍କ ଏହି ଆଦେଶ ଆସିଥିଲା।