ଏକ ଛୋଟ ଫାଷ୍ଟଫୁଡ୍ ଦୋକାନରୁ ବ୍ୟବସାୟିକ ଯାତ୍ରା ଆରମ୍ଭ କରିଥିବା ଅନୁପ କୁମାର ବଗାଇ ବର୍ତ୍ତମାନ ଜଣେ ସଫଳ ଉଦ୍ୟୋଗୀ ଭାବେ ଘରେ ଘରେ ପରିଚିତ। ୩୦ ବର୍ଷର ବ୍ୟବସାୟିକ ଅଭିଜ୍ଞତା ସହ ବର୍ତ୍ତମାନ ସେ ଭୁବନେଶ୍ୱରର କ୍ୟାଟରିଂ ସଂସ୍ଥା ‘ଖଟାମିଠା’ର ପରିଚାଳନା ନିର୍ଦ୍ଦେଶକ ଭାବେ ଦାୟିତ୍ୱ ତୁଲାଉଛନ୍ତି। ଯୁବ ଉଦ୍ୟୋଗୀଙ୍କ ପାଇଁ ଜଣେ ପ୍ରେରଣା ପାଲଟିଥିବା ବଗାଇଙ୍କ ସହ ‘ଧରିତ୍ରୀ’ର ସ୍ବତନ୍ତ୍ର ଆଳାପ…
ପ୍ର-ବଜାରରେ ‘ଖଟାମିଠାର’ର
କ’ଣ ସ୍ବତନ୍ତ୍ରତା ରହିଛି?
ଉ-‘ଖଟାମିଠା’ ସଚ୍ଚୋଟତା, ପ୍ରତିଶ୍ରୁତିବଦ୍ଧତା ଏବଂ ଗୁଣାତ୍ମକ ଉପତ୍ାଦ ପାଇଁ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛି। ଆମ ପାଇଁ ଗ୍ରାହକ ସବୁଠାରୁ ଗୁରୁତ୍ୱପୂର୍ଣ୍ଣ। ସେମାନେ ଆମକୁ ଭରସା କରନ୍ତି, ତେଣୁ ସେମାନଙ୍କୁ ଉତ୍ତମ ସେବା ଯୋଗାଇବା ଆମର ଦାୟିତ୍ୱ।
ପ୍ର- ହସ୍ପିଟାଲିଟି (ଆତିଥ୍ୟ) ଉଦ୍ୟୋଗରେ ପ୍ରତିଯୋଗିତା ବଢ଼ିଚାଲିଥିବାବେଳେ କେଉଁ ସବୁ ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡ଼ୁଛି?
ଉ- ପ୍ରତିଯୋଗିତା ଜଣଙ୍କୁ ଭୟଭୀତ କରି ନ ଥାଏ। ବରଂ ଅଗ୍ରଗତିରେ ସହାୟକ ହୋଇଥାଏ। ସକାରାତ୍ମକ ପ୍ରତିଯୋଗିତା ସର୍ବଦା ଗୁଣାତ୍ମକ ସେବା ପ୍ରଦାନ କରିବାକୁ ପ୍ରୋତ୍ସାହିତ କରିଥାଏ। ମୁଁ ଅନ୍ୟମାନଙ୍କ ସହ ନୁହେଁ, ନିଜ ସହ ପ୍ରତିଯୋଗିତା କରିବାରେ ବିଶ୍ୱାସ କରେ। ଲଗାତର ଭାବେ ଗ୍ରାହକଙ୍କ ମତାମତ ଗ୍ରହଣ କରିଥାଏ ଏବଂ କିପରି ଆଉ କିଛି ଭଲ ହୋଇପାରିବ ସେ ଦିଗରେ ଚେଷ୍ଟା କରେ।
ପ୍ର- ବ୍ୟବସାୟରେ ଲାଭାନ୍ବିତ ହେବା ସହ ଖାଦ୍ୟର ମାନ ବଜାୟ ରଖିବା ଦିଗରେ କ’ଣ ପଦକ୍ଷେପ ନେଇଥା’ନ୍ତି? ବଳକା ଖାଦ୍ୟକୁ କ’ଣ କରନ୍ତି?
ଉ- ଖାଦ୍ୟର ଉତ୍ତମ ଗୁଣବତ୍ତା ବଜାୟ ରଖିବା ପାଇଁ ଉତ୍ତମମାନର ରୋଷେଇ ସାମଗ୍ରୀ ଉପରେ ଗୁରୁତ୍ୱ ଦେଇଥାଉ। କିଚେନର ସ୍ବଚ୍ଛତା ଉପରେ ଗୁରୁତ୍ୱ ଦେବା ସହ ରୋଷେଇରେ ସ୍ବଚ୍ଛ ଜଳ ବ୍ୟବହାର କରିଥାଉ। ଆମେ ସର୍ବଦା ଯେତିକି ଆବଶ୍ୟକ, ସେତିକି ଖାଦ୍ୟ ପ୍ରସ୍ତୁତ କରିବାକୁ ଚେଷ୍ଟା କରିଥାଉ। ତଥାପି ଯଦି କେଉଁଦିନ ଖାଦ୍ୟ ବଳକା ହୋଇଯାଏ, ଆମେ ଗରିବ ତଥା ଖାଦ୍ୟ ଲୋଡୁଥିବା ଲୋକଙ୍କ ମଧ୍ୟରେ ବାଣ୍ଟିଦେଉ।
ପ୍ର- ଆପଣଙ୍କ ପ୍ରତିଷ୍ଠାନରେ ଗ୍ରାହକଙ୍କ ଭିନ୍ନ ଭିନ୍ନ ଚାହିଦା ରହୁଥାଇପାରେ। ଗ୍ରାହକଙ୍କ ଚାହିଦା ଓ ଅଭିଯୋଗକୁ କିପରି ଗ୍ରହଣ କରନ୍ତି?
ଉ- ଗ୍ରାହକ ସ୍ବଳ୍ପଖର୍ଚ୍ଚରେ ଉତ୍ତମମାନର ସେବା ଆଶା ରଖନ୍ତି। ଆମେ ଆମ ଗ୍ରାହକଙ୍କ ଆଶାନୁରୂପ ସେବା ପ୍ରଦାନ ଉପରେ ଗୁରୁତ୍ୱ ଦେଉ। ସେମାନଙ୍କୁ ଅନେକ ବିକଳ୍ପ ପ୍ରଦାନ କରିଥାଉ। ସେମାନଙ୍କ ପ୍ରଶଂସା ଆମ ମନୋବଳକୁ ଦୃଢ଼ କରୁଥିବାବେଳେ ଯଦି କେବେ କିଛି ଅଭିଯୋଗ ଆସେ, ଆମେ ତାହା ଉପରେ ଧ୍ୟାନ ଦେଉ। ଗ୍ରାହକଙ୍କ ଚାହିଦାକୁ ଦୃଷ୍ଟିରେ ରଖି ବ୍ୟବସ୍ଥାରେ ସୁଧାର ଆଣିବାକୁ ସଦାଚେଷ୍ଟିତ।
ପ୍ର- କମ୍ପାନୀର ପରିଚାଳନା ନିର୍ଦ୍ଦେଶକ ଭାବେ ଆପଣ ଦାୟିତ୍ୱ ତୁଲାଉଛନ୍ତି। ଏ କ୍ଷେତ୍ରରେ ଭବିଷ୍ୟତ ଗଢ଼ିବାକୁ ଚାହଁୁଥିବା ଉଦ୍ୟୋଗୀଙ୍କୁ କି ପରାମର୍ଶ ଦେବେ?
ଉ- ପ୍ରତିଶ୍ରୁତି ରକ୍ଷା କରିବା ଏବଂ ଗୁଣାତ୍ମକ ମାନ ବଜାୟ ରଖିବା ଦ୍ୱାରା ସଫଳତା ମିଳେ। ଗତ ୩୦ ବର୍ଷର ଅଭିଜ୍ଞତା ମଧ୍ୟରେ ମୁଁ ଏହି ଶିକ୍ଷା ଲାଭ କରିଛି। ମୁଁ ସଚ୍ଚୋଟତାକୁ ସବୁବେଳେ ପ୍ରାଧାନ୍ୟ ଦେବା ସହ ଏବେ ମଧ୍ୟ ପ୍ରତିଦିନ କିଛି ନୂଆ କଥା ଶିଖୁଛି। ନୂତନ ଭାବେ ଯାତ୍ରା ଆରମ୍ଭ କରୁଥିବା ଉଦ୍ୟୋଗୀଙ୍କୁ ୨ଟି କଥା କହିବାକୁ ଚାହିଁବି। ସଫଳତା ପାଇବା ପାଇଁ କୌଣସି ଗଳାବାଟ ନାହିଁ, ତେଣୁ ହୃଦୟରୁ କଠିନ ପରିଶ୍ରମ କରିବା ଉଚିତ୍। ପାରୁ ପର୍ଯ୍ୟନ୍ତ ଚେଷ୍ଟା କରିବା ଏବଂ ଫଳ ପାଇଁ ଆଶା ନ ରଖି ଈଶ୍ୱରଙ୍କ ଉପରେ ସବୁକିଛି ଛାଡ଼ିଦେବା। ତେବେ ଏ କ୍ଷେତ୍ରରେ ଧୈର୍ଯ୍ୟ ରକ୍ଷା କରିବା ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ।