ଭଦ୍ରକ ଅଫିସ, ୧୩।୩-ଧାନ ବିକି ନ ପାରି ସରକାରୀ ଧାନ ସଂଗ୍ରହ କେନ୍ଦ୍ର ଆଗରେ ବିଷପିଇ ଆତ୍ମହତ୍ୟା ଉଦ୍ୟମ କରିଥିଲେ ଭଦ୍ରକ ବ୍ଲକ ବନ୍ଧଗଁାର ଚାଷୀ ରାମକୃଷ୍ଣ ପଣ୍ଡା। ଜିଲା ଚିକିତ୍ସାଳୟରେ ଚିକିତ୍ସିତ ହୋଇ ସେ ଘରକୁ ମଧ୍ୟ ଫେରିଲେଣି। ସେତେବେଳେ ଘଟଣାର ବିଭାଗୀୟ ତଦନ୍ତ କରାଗଲା। ବିକ୍ରି ହୋଇ ନ ଥିବା ଧାନ ସଂଗ୍ରହ କରାଯିବ ବୋଲି ବିଭାଗୀୟ ଅଧିକାରୀ ସେତେବେଳେ ତାଙ୍କୁ ପ୍ରତିଶ୍ରୁତି ଦେଇଥିଲେ। ଏହାମଧ୍ୟରେ ୧୫ ଦିନ ବିତିଗଲାଣି। ହେଲେ ତାଙ୍କର ବଳକା ଧାନ ଏଯାଏ କିଣାଯାଇ ନ ଥିବା ସେ ଅଭିଯୋଗ କରି ଶୁକ୍ରବାର ସକାଳୁ ଜିଲା ଯୋଗାଣ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି।
ସୂଚନାଯୋଗ୍ୟ, ବନ୍ଧଗଁା ପଞ୍ଚାୟତରେ ଏକ ମହିଳା ଗୋଷ୍ଠୀ ଧାନକିଣା ଦାୟିତ୍ୱ ତୁଲାଉଛି। ଟୋକନ ତାରିଖ ବିତିଯାଇଥିଲେ ମଧ୍ୟ ଧାନ ନେଉ ନ ଥିବାରୁ ରାମକୃଷ୍ଣ କେନ୍ଦ୍ରକୁ ଯାଇ ଫେରୁଥିଲେ। ଟୋକନ ତାରିଖ ଯିବା ପରେ ମଧ୍ୟ ତାଙ୍କ ଧାନ କିଣାଯାଇ ନ ଥିଲା। ଗତ ଫେବୃୟାରୀ ୨୭ରେ ସେ ଧାନ ସଂଗ୍ରହ କେନ୍ଦ୍ରକୁ ଯାଇ କୀଟନାଶକ ପିଇ ଦେଇଥିଲେ। ଏହି ଘଟଣା ପରେ ଉପଜିଲାପାଳ ପିତାମ୍ବର ସାମଲ ଓ ଜିଲା ଯୋଗାଣ ଅଧିକାରୀ ରଞ୍ଜନ ସେଠ୍ ଉକ୍ତ ଧାନ କ୍ରୟ କେନ୍ଦ୍ରକୁ ଯାଇ ତଦନ୍ତ କରି ଫେରିଥିଲେ। ରିପୋର୍ଟ ଲେଖା ହେବା ସୁଦ୍ଧା ଧାରଣାରେ ବସିଥିବା ରାମକୃଷ୍ଣଙ୍କ ପାଖକୁ କେହି ଅଧିକାରୀ ଯାଇ ନ ଥିବା କୁହାଯାଇଛି। ପ୍ରଶାସନିକ ଅଧିକାରୀଙ୍କ ଚାଷୀମାରଣ ନୀତି ବିରୋଧରେ ଭାଜପା ପୁଣି ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବ ବୋଲି ଭାଜପା ୨୫ ନଂ. ଜୋନ୍ ମଣ୍ଡଳ ସଭାପତି ପ୍ରଭାକର ସାମଲ କହିଛନ୍ତି।