ୱାଶିଂଟନ,୨୧।୧୧: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋଶିଆଲ ମିଡିଆ ପ୍ଲାଟଫର୍ମ ଟୁଇଟର୍କୁ ଫେରିଛନ୍ତି। ଟ୍ରମ୍ପଙ୍କ ଟୁଇଟର୍ ଆକାଉଣ୍ଟ ଆକ୍ଟିଭ୍ ହେବା ପରେ ତାଙ୍କ ଫଲୋଅର୍ସ ମଧ୍ୟ ଦ୍ରୁତ ଗତିରେ ବଢୁଛନ୍ତି। କିନ୍ତୁ ଏଥିରେ ଖୁସି ନାହାନ୍ତି ଟ୍ରମ୍ପ। ସେ କହିଛନ୍ତି, ଟୁଇଟର୍କୁ ଫେରିବାକୁ କୌଣସି ଆଗ୍ରହ ନାହିଁ। ଟୁଇଟର୍ରେ ଏବେ ଅନେକ ନକଲି ଆକାଉଣ୍ଟ ଖୋଲାଯାଉଛି। ମୁଁ ସମ୍ମୁଖୀନ ହୋଇଥିବା ସମସ୍ୟା ଅବିଶ୍ୱସନୀୟ। ତେଣୁ ଆଉ ଟୁଇଟର୍କୁ ଆସିବାକୁ ସେତେଟା ଆଗ୍ରାହ ନାହିଁ। ଟ୍ରମ୍ପ ମିଡିଆ ଆଣ୍ଡ ଟେକ୍ନୋଲୋଜି ଗ୍ରୁପ (ଟିଏମଟିଜି) ଷ୍ଟାର୍ଟଅପ ଦ୍ୱାରା ବିକଶିତ ହୋଇଥିବା ‘ଟ୍ରୁଥ ସୋସିଆଲ’ ଆପ ସହିତ ସେ ରହିବେ। ଟୁଇଟର୍ ତୁଳନାରେ ଆମର ପ୍ଲାଟଫର୍ମ ବହୁତ ଭଲ ଏବଂ ଅଦ୍ଭୁତପୂର୍ବ କାର୍ଯ୍ୟ କରୁଛି ବୋଲି ଟ୍ରମ୍ପ କହିଛନ୍ତି।
ସୂଚନାଯୋଗ୍ୟ, ଗତବର୍ଷ ଜାନୁଆରୀ ୬ରେ ଯୁକ୍ତରାଷ୍ଟ୍ର ଆମେରିକା କ୍ୟାପିଟଲ ଆକ୍ରମଣ ଘଟଣାରେ ସମ୍ପୃକ୍ତି ଯୋଗୁ ଟ୍ରମ୍ପଙ୍କ ଟୁଇଟର୍ ଆକାଉଣ୍ଟ ଡି-ଆକ୍ଟିଭ କରାଯାଇଥିଲା। ୨୦୨୦ ଯୁକ୍ତରାଷ୍ଟ୍ର ଆମେରିକା ରାଷ୍ଟ୍ରପତି ନିର୍ବାଚନର ଫଳାଫଳକୁ ବାତିଲ କରାଇବା ପାଇଁ ଟ୍ରମ୍ପ୍ଙ୍କ ସମର୍ଥକମାନେ କ୍ୟାପିଟଲ ଆକ୍ରମଣ କରିଥିଲେ।
